| មាននិន្នាការនយោបាយ ? រឺបញ្ហាច្រលំកាលបរិច្ឆេទ... |
| ααα កាសែត | |
| 23-07-2008 |
កាលពីថ្ងៃអង្គារទី ២២ កក្កដាកន្លងមកនេះ គណបក្សសិទ្ធមនុស្ស ( PDH) បានរៀបចំពិធីលាសម្បថតាមបែបព្រះពុទ្ធសាសនាអោយប្រជាជនដែលត្រូវគណបក្សនយោបាយផ្សេងទៀតបង្ខំអោយពួកគេស្បថស្បែថាត្រូវតែបោះឆ្នោតអោយគណបក្សគេ នៅពេលដែលគេទទួលអំណោយពីគណបក្សទាំងនោះ ។ គោលបំណងនៃពិធីនេះ គឺចង់អោយប្រជាជនដែលត្រូវទៅបោះឆ្នោតនៅថ្ងៃ អាទិត្យ ទី ២៧ កក្កដានេះ មានសិទ្ធសេរីភាពពេញលេញនិងមិនមានកង្វល់ក្នុងការជ្រើសរើសគណបក្សណាមួយដែលខ្លួនពេញចិត្ត ។ នៅក្នុងកម្មវិធីនេះមានអ្នកចូលរួមចំនួន ៣០០នាក់ ដែលក្នុងនោះរួមមានទាំងព្រះសង្ឃ និងមន្រ្តីជាន់ខ្ពស់នៃគណបក្សជាច្រើនរូបទៀតចូលរួមផងដែរ ។ កម្មវិធីបានប្រព្រឹត្តតាមបែបលក្ខណៈសាសនា ដោយមានទាំងអាចារ្យដ៏ឆ្នើមម្នាក់ផងដែរ។ មុននឹងបញ្ជប់កម្មវិធីតាមបែបសាសនារបស់ខ្លួនលោកអាចារ្យបានឆ្លៀតស្រែកជយឃោសថា៖ « ជយោ ! គណបក្សសិទ្ធមនុស្ស បោះឆ្នោតអោយគណបក្សសិទ្ធមនុស្ស និងគាំទ្រដល់បេក្ខភាពលោក គឹម សុខា ជានាយករដ្ឋមន្រ្តី ! » ។ ជាមួយនឹងសម្លេងទះដៃគាំទ្ររបស់អ្នកចូលរួមយ៉ាងកងរំពង ។ បន្ទាប់មកគាត់បានស្រែកបន្តទៀតថា៖ «ជយោ ! ៧ មករា» អ្នកចូលរួមមួយចំនួនបានទះដៃអបអរសាទរ ហើយមួយចំនួនទៀតស្រឡាំងកាំងនឹងជយឃោសរបស់គាត់ ភ្លាមនោះភាពស្ងប់ស្ងាត់មួយបានកើតឡើង...។ លោកប្រធានគណបក្សសិទ្ធមនុស្សពេលបានលឺសំដីនេះភ្លាមលោកក៏បានយកមេក្រូពីលោកតាអាចារ្យហើយបានមានប្រសាសន៍កែតម្រូវឡើងវិញថា៖ « មិនមែនថ្ងៃ៧មករាទេ គឺថ្ងៃ ២៧កក្កដា»។ មនុស្សនៅខាងក្រៅទីស្នាក់ការឯណោះវិញបានខ្សឹបខ្សៀវដាក់គ្នាទាំងអស់សំណើចថា៖ « តាអាចារ្យនេះច្បាស់ជាអត់លុយហើយ ! » ។
|
