| ទស្សនកិច្ចរបស់នាយករដ្ឋមន្រ្តីថៃនៅកម្ពុជាត្រូវ ជំនួសដោយរដ្ឋមន្រ្តីការបរទេសថៃ |
| ααα ដួង សុខា | |
| 10-10-2008 |
|
លោកស៊ិន ប៊ុនធឿន អ្នកនាំពាក្យក្រសួងការបរទេសកម្ពុជា បានមានប្រសាសន៏ប្រាប់ កាសែត នៅរសៀលថ្ងៃសុក្រ ទី១០ តុលានេះថា ដំណើរទស្សនកិច្ចរបស់លោកស៊ុមឆាយ វង្សសាវ៉ាត នាយករដ្ឋថៃថ្មី មកកាន់កម្ពុជាពីថ្ងៃ១២ ដល់ ១៣តុលា ត្រូវបានលើកពេល ហើយនឹងត្រូវជំនួសដោយរដ្ឋមន្រ្តីការបរទេសថៃថ្មី លោក សមពុង អាម៉នវីវ៉ាល (Sompong Amornvival)។
លោកស៊ិន ប៊ុនធឿន ថ្លែងថា «តាមការប៉ាន់ស្មានរបស់យើង ការលុបចោលដំណើរទស្សកិច្ចនេះបណ្តាលមកពីបញ្ហាផ្ទៃក្នុងនៅថៃដែលត្រូវគ្រប់គ្រង»។
លោករដ្ឋមន្រ្តីការបរទេសថៃនឹងមកកាន់កម្ពុជារយៈត្រឹមតែមួយថ្ងៃ នៅថ្ងៃច័ន្ទ ទី១៣ តុលា។ លោកនឹងត្រូវជួបសមភាគីរបស់លោក គឺលោកហោ ណាំហុង រដ្ឋមន្រ្តីការបរទេសកម្ពុជា នាព្រឹកថ្ងៃច័ន្ទ។ លោកស៊ិន ប៊ុនធឿន បញ្ជាក់ថា «ដំណើរទស្សនកិច្ចនេះផ្តោតលើចំនុចពីរ៖ ទីមួយ ជាទម្លាប់ រដ្ឋមន្រ្តីការបរទេសអាស៊ានថ្មីតែងបង្ហាញខ្លួនដល់ប្រទេសជាសមាជិក។ ទីពីរ គឺការដោះស្រាយបញ្ហាព្រំដែននៅតំបន់ប្រាសាទព្រះវិហារ»។ |
