ក្រ​សួង​​ការ​បទេសនៃព្រះរាជាណាចក្រថៃ បានធ្វើការតវ៉ាកាលពីថ្ងៃព្រហស្បតិ៍ ទី១០ ខែមេសា  ប្រឆាំងនឹងការបញ្ជូនកងកម្លាំងទាហានកម្ពុជា ចូលទៅ​ក្នុង​តំបន់​ប្រាសាទព្រះវិហារ ដែលស្ថិតនៅព្រំប្រទល់កម្ពុជា-ថៃ។ ពាក្យ​បណ្តឹង​ជា​ផ្លូវ​ការនេះត្រូវបានធ្វើឡើងដោយលោកប្រធាន​នាយកដ្ឋាន​នៃ​អនុសញ្ញា​និង កិច្ចការច្បាប់ថៃ ផ្ញើរជូនលោក អុង ស៊ាន ឯកអគ្គរាជ​ទូតកម្ពុជា​ប្រចាំ​ប្រទេស​ថៃ។ នៅ​ក្នុងការចេញផ្សាយអត្ថបទ ថ្ងៃទី ១១ មេសា នៃសារព័ត៌មាន​​ប្រចាំ​ថៃ​ជា​ភាសាអង់គ្លេស បាងកកប៉ុស្តិ៍  ប្រធាននាយកដ្ឋាន​បានគួស​បញ្ជាក់ថា​នេះ​គឺជាការតវ៉ាលើកទីបួនរបស់អាជ្ញាធរ​ប្រទេស​ថៃ ក្នុង​រយៈពេលប្រាំឆ្នាំ  ទាក់​ទងនឹងបញ្ហាតំបន់នេះ។
ដោយ​ត្រូវបានធ្វើការទាក់ទងសាកសួរព័តមាននៅព្រឹកថ្ងៃសុក្រនេះ លោក កែ ពិសិដ្ឋ ប្រធាននាយកដ្ឋានទទួលបន្ទុកកិច្ចការកុងស៊ុលនៃក្រសួង​ការបទេស​ប្រទេសកម្ពុជា បានអះអាងថាលោកមិនបានទទួលដំណឹង​ទាក់ទងនឹងការ​តវ៉ា​នេះ​ទេ។

លោក ហង់ សុទ្ធ អគ្គនាយកនៃអាជ្ញាធរជាតិព្រះវិហារដែលទើបបង្កើតថ្មី សំដែង​នូវការសោកស្តាយចំពោះការយល់ខុសនេះ។ លោកបានបញ្ជាក់​តាម​ទូរស័ព្ទថា «ជនជាតិថៃមានការយល់ច្រឡំ។ ជាការពិតណាស់ មានទាហាន​កម្ពុជា​ប៉ុន្មាននាក់មានវត្តមាននៅតំបន់នេះ ក្នុងពិធីសម្ពោធការដ្ឋានផ្លូវថ្មី ក្រោម​អធិបតីភាពរបស់សម្តេច ហ៊ុន សែន កាលពីថ្ងៃទី ៥ មេសា។ ទាហាន​ទាំង​នោះ​​ចង់ទស្សនាប្រាសាទ ហើយពួកគេប្រហែលជាភ្លេចដូរ​ឯកសណ្ឋាន​របស់​ពួកគេ។ ប៉ុន្តែ វាគឺរឿងធម្មតា»។

យោងតាមសាលដីការបស់​តុលាការអន្តរជាតិទីក្រុងឡាអេ ចុះថ្ងៃទី ១៥ មិថុនា ១៩៦២ ប្រសាទព្រះវិហារគឺជាអធិបតេយ្យភាពកម្ពុជា។ នៅឆ្នាំ២០០១ ប្រទេស​កម្ពុជា  បានធ្វើការស្នើសុំដាក់បញ្ជូល​ប្រាសាទនេះទៅក្នុងបញ្ជី​បេតិកភណ្ឌ​មនុស្ស​​ជាតិ តាមរយៈអង្គការយូណេស្កូ។ រាជរដ្ឋាភិបាលថៃមានប្រតិកម្មចំពោះ​ការស្នើសុំនេះយ៉ាងខ្លាំង។ ប្រទេសថៃចង់រៀបចំសំណុំឯកសារស្នើសុំរួមមួយ ព្រោះ​ថាការកំណត់បែងចែកព្រំប្រទល់រវាង​ព្រះរាជាណាចក្រ​ទាំងពីរ​មិនទាន់​បាន​បញ្ចប់នៅឡើយ។