នៅថ្ងៃចុង​ក្រោយ​ដែលជា​ថ្ងៃ​បញ្ចប់​​ការ​ចុះបញ្ជី​គណបក្សនយោបាយនិង​បេក្ខជន​ មានគណបក្ស​​​ចំនួន​១២ បាន​ចុះ​បញ្ជី​ចូលរួម​ការ​ប្រកួត​ប្រជែងការ​បោះឆ្នោត​ជ្រើស​រើស​តំណាង​អាណត្តិ​ទីបួន នៅថ្ងៃ​២៧ កក្កដាខាងមុខនេះ នៅ​ឯ​

គណៈកម្មាធិការជាតិរៀបចំការ​បោះឆ្នោត​(គជប)។ លោក​ទេព នីថា អគ្គលេខា​ធិការ​គជប បាន​ប្រកាស​អោយដឹង​នៅថ្ងៃ​ច័ន្ទនេះថា គណបក្ស​ដែល​បាន​ចុះឈ្មោះ​ផ្លូវការ​ទាំង​១២នោះ រួមមានគណបក្ស​សំខាន់​ៗ ដូចជា គណបក្ស​​ប្រជាជនកម្ពុជា គណបក្សនរោត្តម​ រណឫទ្ធិ គណបក្សហ្វ៊ុន ស៊ិនប៉ិច គណបក្ស​​សិទ្ធិមនុស្ស គណបក្សសម រង្ស៊ី ។ល។ មន្ត្រីជាន់ខ្ពស់រូបនេះ​បាន​បញ្ជាក់​ថា​បញ្ជីឈ្មោះ​បេក្ខជន​របស់​គណបក្ស​ប្រជាជន​កម្ពុជា និង​គណបក្ស​នរោត្តម រណឫទ្ធិ ត្រូវ​បាន​គជប​ផ្តល់​សុពលភាព​ហើយ។ គជប​ក៏បានស្នើ​អោយ​​គណបក្សហង្សដារ៉ា​ចលនា​ប្រជាធិបតេយ្យ​ និង​គណបក្ស​សង្គម​ខ្មែរ​និយម​​ធ្វើការ​បំពេញ​បែប​បទ​បន្ថែមផង​ដែរ។​ លោក​ ហង្ស​ ពុទ្ធា ប្រធាន​អង្គការ​ឃ្លាំមើល​ការ​បោះឆ្នោត(និក​ហ្វិច )បាន​​វាយ​តម្លៃថា ការ​ធ្លាក់​ចុះ​នូវ​ចំនួន​គណបក្ស​នយោបាយ​ដែលចូល​រួម​ការ​បោះ​ឆ្នោតសភា​លើក​នេះ (គណបក្ស​ចំនួន​​២៣ បាន​ចូលរួមការ​បោះឆ្នោត​នៅឆ្នាំ​២០០៣) ពាក់​ព័ន្ធ​នឹង​៤​ចំណុចៈ ការ​ខ្វះខាត​ថវិកា​របស់​គណបក្ស ការ​សម្រេច​ផ្ទៃក្នុង​របស់​គណបក្សមិនចូល​រួម​ប្រកួត​ ភាព​គ្មានជំនឿថា​ការ​បោះឆ្នោត​ប្រព្រឹត្ត​ទៅ​ដោយសេរី យុត្តិធម៌ និង​ការយល់​ថា​គណបក្សរបស់​ខ្លួនអាច​នឹង​មិនទទួល​ការ​គាំទ្រ​ពីប្រជាពលរដ្ឋ​។