| សាលាក្តីខ្មែរក្រហម : សវនាការជំនុំជម្រះឌុចខិត ចូលមកដល់ |
| ααα កាសែត | |
| 18-07-2008 |
|
សហព្រះរាជអាជ្ញានៃអង្គជំនុំជម្រះវិសាមញ្ញក្នុងតុលាការកម្ពុជា (ECCC) បានដាក់ដីកាសន្និដ្ឋានស្ថាពរក្នុងសំណុំរឿងរបស់ឌុច អតីតប្រធានមន្ទីរឃុំឃាំងស២១។ ឯកសារចំនួនជិត២០០ទំព័រនេះជួយដល់សហចៅក្រមស៊ើបអង្កេតក្នុងការធ្វើសេចក្តីព្រាងដីកាដំណោះស្រាយរបស់ខ្លួនដែលនឹងក្លាយជាដីកាបញ្ជូនសំណុំរឿងរបស់ឌុច ទៅជម្រះនៅមុខអង្គជំនុំជម្រះ។ កាលបរិច្ឆេទកំណត់នៃការដាក់ដីកាសន្និដ្ឋានស្ថាពរនេះគឺនៅថ្ងៃទី៧ ខែសីហា។ សេចក្តីប្រកាសព័ត៌មានរបស់ ECCC គូសបញ្ជាក់យ៉ាងដូច្នេះថា ការិយាល័យសហព្រះរាជអាជ្ញាបានធ្វើយ៉ាងល្អនៅក្នុងការងារនេះ «ដោយអាចដាក់ដីកានេះបាន៣សប្តាហ៍មុនថ្ងៃកំណត់» បើទោះជា«ធនធានមានកម្រិតក៏ដោយ»។
នៅថ្ងៃទី១៨ ខែកក្កដា ឆ្នាំ២០០៧ សហព្រះរាជអាជ្ញាបានចេញដីកាសន្និដ្ឋានបញ្ជូនសំណុំរឿងអោយស៊ើបសួរ ដោយស្នើអោយបើកកិច្ចស៊ើបសួរទៅលើទីតាំងឧក្រិដ្ឋកម្មចំនួន២៥កន្លែង ព្រមទាំងស្នើអោយនាំនិងឃុំខ្លួនជនសង្ស័យចំនួន៥នាក់ពីបទឧក្រិដ្ឋនានា ដូចជាបទមនុស្សឃាត និងបទប្រល័យពូជសាសន៍ជាដើម។ ម្យ៉ាងវិញទៀត ចៅក្រមស៊ើបអង្កេតបានចេញសេចក្តីបង្គាប់នៅថ្ងៃទី១៩ ខែកញ្ញា ឆ្នាំ២០០៧ ថា«សំណុំរឿងទាក់ទងនឹងស២១ និងឌុចត្រូវធ្វើការស៊ើបអង្កេតដាច់ដោយឡែក»ពីសំណុំរឿងជនត្រូវចោទ៤នាក់ផ្សេងទៀត។
អតីតប្រធានមន្ទីរស២១ និងបុគ្គលិកក្រោមបង្គាប់បានធ្វើឯកសារយ៉ាងល្អិតល្អន់ទាក់ទងនឹងឧក្រិដ្ឋកម្មរបស់ខ្លួន។ ឯកសារទាំងនោះ ពួកគេបានបន្សល់ទុកនៅពេលរត់គេចខ្លួនពីការវាយចូលរបស់កងទ័ពវៀតណាមមកក្នុងទីក្រុងភ្នំពេញនៅថ្ងៃទី៧ មករា ១៩៧៩ ដែលបានបញ្ចប់របបប៉ុល ពត។ ឯកសាររាប់សែនទំព័រនេះត្រូវបានរក្សាទុកនៅមន្ទីរ២១ ដែលបានក្លាយទៅជាសារមន្ទីរប្រល័យពូជសាសន៍ទួលស្លែង និងនៅមជ្ឈមណ្ឌលឯកសារកម្ពុជា (DC-Cam)។ ជាងនេះទៅទៀត ចាប់តាំងពីការចាប់ខ្លួនមក ឌុចបានទទួលយកការសួរយកចម្លើយចំនួន២៧លើកដែលធ្វើឡើងដោយសហចៅក្រមស៊ើបអង្កេត ហើយបានចូលរួមក្នុងការស៊ើបអង្កេតដល់កន្លែងកើតហេតុ។ នៅកន្លែងនោះ ឌុចត្រូវបានដាក់អោយពិភាក្សាតទល់គ្នាជាមួយជនរងគ្រោះ និងអតីតបុគ្គលិកមន្ទីរស២១។ ឌុចបានឆ្លើយសំណួរផ្សេងៗរបស់សហព្រះរាជអាជ្ញា និងដើមបណ្តឹងរដ្ឋប្បវេណី។ ប៉ុន្តែកិច្ចសហការដ៏ល្អនេះមិនអាចលុបរឿងរន្ធត់ប្រព្រឹត្តនៅមន្ទីរឃុំឃាំងដែលគាត់គ្រប់គ្រង ហើយដែលសាក្សី៦៣នាក់បានពណ៌នាយ៉ាងលម្អិតប្រាប់ទៅសហចៅក្រមស៊ើបអង្កេត បានឡើយ។
សវនាការជំនុំជម្រះឌុច ជនត្រូវចោទទី១ក្នុងចំណោមជនត្រូវចោទ៥នាក់ដែលត្រូវបង្ហាញមុខនៅសាលាជំនុំជម្រះដំបូងរបស់សាលាក្តីខ្មែរក្រហម អាចនឹងបើកធ្វើឡើងចាប់ពីខែកញ្ញាខាងមុខ។ |
