| ប្រទេសជាច្រើនអំពាវនាវសុំអោយមានការចរចារទ្វេ ភាគីដើម្បីដោះស្រាយជម្លោះខ្មែរ-ថៃ |
| ααα ឡូរ៉ង់ឡឺហ្គូអង់វិក និងស្ទេហ្វានី ហ្សេ | |
| 24-07-2008 |
|
យោងតាមសេចក្តីប្រកាសព័ត៌មានមួយ ចេញផ្សាយនៅថ្ងៃព្រហស្បតិ៍ នៅលើវិបសាយរបស់ក្រសួងការបរទេសថៃ នៅថ្ងៃពុធ ទី២៣ កក្កដា លោក Sahas Bunditkul ឧបនាយករដ្ឋមន្ត្រីថៃបានរៀបចំជំនួបពិភាក្សាទ្វេភាគីជាបន្តបន្ទាប់ នៅក្រៅកិច្ចប្រជុំអន្តរក្រសួងអាស៊ាន ដើម្បីបញ្ចុះបញ្ចូលសមាជិកអាស៊ាននិងប្រទេសសមាជិកក្រុមប្រឹក្សាសន្តិសុខនៃអង្គការសហប្រជាជាតិ កុំអោយចូលមកពាក់ព័ន្ធនៅក្នុងជម្លោះព្រំដែនរវាងប្រទេសថៃនិងកម្ពុជា។
នៅក្នុងសេចក្តីប្រកាសព័ត៌មាននេះ លោកឧបនាយករដ្ឋមន្ត្រីថៃបានអះអាងជាពិសេសថាអ្នកស្រី ខុនឌូលីសារ៉ាយ (Condoleeza Rice) រដ្ឋលេខាធិការសហរដ្ឋអាមេរិក បានសង្ឃឹមថា «ប្រទេសថៃនិងប្រទេសកម្ពុជា នឹងអាចដោះស្រាយជម្លោះរបស់ខ្លួនបានដោយជោគជ័យ តាមរយៈការពិភាក្សាទ្វេភាគី»។ សារព័ត៌មានប្រចាំថ្ងៃ ថៃ ឌឺណេសិន ក៏បានផ្សព្វផ្សាយនូវព័ត៌មានមួយ ក្នុងនោះអ្នកស្រី ខុនឌូលីសារ៉ាយ បានវាយតម្លៃថា ការដោះស្រាយជម្លោះនៅចំពោះមុខអង្គការសហប្រជាជាតិ «នៅមិនទាន់ដល់ពេលវេលា» នៅឡើយនោះទេ ព្រោះការពិភាក្សាទ្វេភាគីនៅតែបន្តធ្វើឡើង ហើយអាស៊ានក៏មានតួនាទីមួយក្នុងការដោះស្រាយផងដែរ»។
លោក Sahas Bunditkul ក៏បានជួបពិភាក្សាជាមួយនឹងរដ្ឋមន្ត្រីក្រសួងការបរទេសនៃសហព័ន្ធរុស្ស៊ី ដែលជាសមាជិកអចិន្ត្រៃយ៍នៃក្រុមប្រឹក្សាសន្តិសុខ ដូចសហរដ្ឋអាមេរិក។ រដ្ឋមន្ត្រីនៃសហព័ន្ធរុស្សីបានវាយតម្លៃថាការចរចារទ្វេភាគីលើសំណុំរឿងនេះ «អាចទទួលយកបាន» ដោយមិនចាំបាច់ឈានដល់ក្រុមប្រឹក្សាសន្តិសុខដោយផ្ទាល់នោះទេ»។
បន្ទាប់ពីកិច្ចប្រជុំគណៈកម្មាធិការព្រំដែនចម្រុះកម្ពុជា-ថៃ កាលពីថ្ងៃច័ន្ទ ទី២១ កក្កដា បានទទួលបរាជ័យ ប្រទេសកម្ពុជាបានសម្រេចចិត្តស្វែងរកជំនួយពីក្រុមប្រឹក្សាសន្តិសុខដើម្បីដោះស្រាយវិបត្តិនេះ ដោយព្រួយបារម្ភខ្លាចក្រែងថាវិបត្តិអាចវិវត្តន៍ទៅមុខ និងអាចឈានរហូតមានការផ្ទុះអាវុធ។
យោងតាមលោកហោ ណាំហុង រដ្ឋមន្ត្រីក្រសួងការបរទេស កិច្ចប្រជុំវិសាមញ្ញនៃក្រុមប្រឹក្សាសន្តិសុខនៃអង្គការសហប្រជាជាតិ ស្តីពីជម្លោះរវាងប្រទេសថៃនិងកម្ពុជា ជុំវិញតំបន់ព្រំដែនប្រាសាទព្រះវិហារ អាចនឹងធ្វើឡើងនៅថ្ងៃច័ន្ទ ទី២៨ កក្កដាខាងមុខនេះ។ ប្រមុខការទូតខ្មែររូបនេះនឹងធ្វើដំណើរទៅសហរដ្ឋអាមេរិក នៅថ្ងៃសុក្រ ទី២៥ កក្កដា។
ក្រៅអំពីកាលបរិច្ឆេទរបៀបនៃកិច្ចប្រជុំពិសេសរបស់ក្រុមប្រឹក្សាសន្តិសុខក៏នៅមិនទាន់ត្រូវបានបញ្ជាក់ច្បាស់លាស់នៅឡើយទេ (ធ្វើឡើងជាសាធារណៈ រឺជាសម្ងាត់)។ ស្ថាប័នអន្តរជាតិមួយនេះអាចនឹងចេញសេចក្តីសម្រេចមួយ ដែលមានលក្ខណៈបង្ខិតបង្ខំ រឺ អាចជាសេចក្តីប្រកាសរបស់ប្រធានក្រុមប្រឹក្សាសន្តិសុខ រឺមួយក៏គ្រាន់តែជាសេចក្តីប្រកាសព័ត៌មានធម្មតាមួយ។
|
