| នៅសវនាការថ្ងៃចុងក្រោយៈ អៀង សារីត្អូញត្អែរពីការទទួល បានការព្យាបាលមិនគ្រប់គ្រាន់ |
| ααα កាសែត | |
| 04-07-2008 |
|
អង្គបុរេជំនុំជម្រះនៃអង្គជំនុំជម្រះវិសាមញ្ញក្នុងតុលាការកម្ពុជា(អ.វ.ត.ក) បានបញ្ចប់ការបើកសវនការលើករណីរបស់អៀង សារី អតីតឧបនាយករដ្ឋមន្ត្រី និងជារដ្ឋមន្រ្តីការបរទេសរបបខ្មែរក្រហម នៅថ្ងៃព្រហស្បតិ៍ ទី៣ ខែកក្កដានេះ។ នៅក្នុងពាក្យបណ្តឹងឧទ្ធរណ៍ប្រឆាំងនឹងដីកាឃុំខ្លួនបណ្តោះអាសន្នរបស់អៀង សារី មេធាវីការពារក្តីបានលើកឡើងពីសុខភាពទន់ខ្សោយរបស់កូនក្តីរបស់ពួកគាត់ ដែលបច្ចុប្បន្ននេះមានអាយុ៨២ឆ្នាំ។ មេធាវីបានបញ្ជាក់មូលហេតុនៃការសុំនៅក្រៅឃុំបណ្តោះអាសន្ននេះ ដោយបានលើកឡើងពីការព្រួយបារម្ភខ្លាចក្រែងថាមានបញ្ហាសុខភាពកើតឡើងចំពោះកូនក្តីរបស់គាត់ ប្រសិនជាគាត់បន្តស្ថិតនៅជាប់ឃុំឃាំងតទៅទៀត។
នៅថ្ងៃទីបួន និងជាថ្ងៃចុងក្រោយនៃសវនាករ ជនត្រូវចោទបានឡើងនិយាយ ដោយបានប្រកាសអំពីបញ្ហាសុខភាព និងកង្វះថ្នាំសង្កូវ ដែលគាត់ត្រូវជួបប្រទះនៅក្នុងបន្ទប់ឃុំឃាំងរបស់ អ.វ.ត.ក។ លោកទាមទារចង់បានជំនួយមួយ សម្រាប់រូបលោក។ សហព្រះរាជអាជ្ញាបានបញ្ជាក់អោយដឹងថាការព្យាបាលដែលពិរុទ្ធជនអៀង សារីបានទទួល ពិតជាមានភាពគ្រប់គ្រាន់ល្អប្រសើរជាងជនរួមជាតិភាគច្រើន ដែលទទួលបានទៅទៀត។
ចៅក្រមនឹងចេញសេចក្តីសម្រេចទាក់ទិននឹងសុពលភាពនៃការអភ័យទោស និងការលើកលែងទោស ដល់អៀង សារី ក្នុងឆ្នាំ១៩៩៦ ហើយនឹងសម្រេចថាតើគោលការណ៍ «Neb is in idem» នឹងត្រូវបានអនុវត្តនៅក្នុងករណីនេះដែររឺទេ។ គោលការណ៍ «Neb is in idem» បានចែងថាមនុស្សម្នាក់មិនអាចត្រូវបានជំនុំជម្រះ រឺចោទប្រកាន់ពីរលើក ពីបទឧក្រិដ្ឋតែមួយបាននោះទេ (អៀង សារី ធ្លាប់ត្រូវបានកាត់ទោសប្រហារជីវិតកំបាំងមុខ ពីបទឧក្រិដ្ឋកម្មប្រល័យពូជសាសន៍ ដោយតុលាការមួយ កាលពីឆ្នាំ១៩៧៩)។ ប្រសិនជាចៅក្រមវិនិច្ឆ័យថាអតីតមេដឹកនាំខ្មែរក្រហមអាចត្រូវបានចោទប្រកាន់ដោយអ.វ.ត.ក យ៉ាងស្របច្បាប់ ចៅក្រមនឹងត្រូវធ្វើការសម្រេចចិត្តលើបណ្តឹងឧទ្ធរណ៍របស់មេធាវីការពារក្តីរបស់អៀង សារី ស្នើសុំអោយដោះលែងក្រៅឃុំបណ្តោះអាសន្ន។
សេចក្តីសម្រេចរបស់តុលាការលើករណីបណ្តឹងឧទ្ធរណ៍ដូចគ្នានេះ ដែលប្តឹងដោយមេធាវីរបស់ភរិយារបស់លោកអៀង សារី គឺអ្នកស្រីអៀង ធីរិទ្ធិ ដែលត្រូវបានចោទប្រកាន់ដោយអ.វ.ត.ក ពីបទឧក្រិដ្ឋកម្មដែលអ្នកស្រីបានប្រព្រឹត្ត នៅសម័យប៉ុល ពត កាលនៅជារដ្ឋមន្ត្រីក្រសួងសង្គមកិច្ច មិនទាន់ត្រូវបានប្រកាសអោយដឹងជាសាធារណៈនោះទេ។ |
