| មេដឹកនាំគណបក្សប្រឆាំងទាំងពីរនឹងប្តឹងទៅកាន់ ប្រធានាធិបតីបារាំងនិងឥណ្ឌូណេស៊ី |
| ααα ដួង សុខា | |
| 28-08-2008 |
|
លោកស្រី មូរ សុខហូរ អគ្គលេខាធិការរងនៃគណបក្សសម រង្ស៊ី និងជាតំណាងរាស្រ្តមណ្ឌលកំពត បានអោយដឹងនៅថ្ងៃព្រហស្បតិ៍ ទី២៨ សីហានេះថា នៅសប្តាហ៍ក្រោយនេះ លោកសម រង្ស៊ី និងលោកកឹម សុខា មេដឹកនាំគណបក្សប្រឆាំងនឹងប្តឹងតវ៉ាជំទាស់លទ្ធផលនៃការបោះឆ្នោតបណ្តោះអាសន្ន ទៅកាន់សហគមន៍អន្តរជាតិ។
គម្រោងប្តឹងតវ៉ានេះបានកើតមានឡើង ក្រោយពេលក្រុមប្រឹក្សាធម្មនុញ្ញបានសម្រេចបដិសេធពាក្យបណ្តឹងទាំងពីរករណីរបស់គណបក្សសម រង្ស៊ី នៅថ្ងៃអង្គារ ទី២៦ និងថ្ងៃពុធ ទី២៧។ បណ្តឹងទីមួយ ពាក់ព័ន្ធនឹងសំណើសុំរៀបចំការរាប់សន្លឹកឆ្នោតសារជាថ្មី នៅខេត្តស្វាយរៀង ចំណែកបណ្តឹងទីពីរ ពាក់ព័ន្ធនឹងការបដិសេធលទ្ធផលបោះឆ្នោតបណ្តោះអាសន្ន ថ្ងៃទី២៧ កក្កដា និងទាមទារអោយមានការរៀបចំដំណើរការបោះឆ្នោតសារជាថ្មី នៅខេត្តកំពត ស្វាយរៀង និងពោធិសាត់។ លោកស្រីមូរ សុខហួរ បានអោយដឹងថា «ក្រុមប្រឹក្សាធម្មនុញ្ញបានច្រានចោលបណ្តឹងរបស់គណបក្សសម រង្ស៊ី ដោយសំអាងថាមិនមានភស្តុតាងគ្រប់គ្រាន់»។
នៅក្នុងលិខិត ផ្ញើទៅកាន់លោកប្រធានាធិបតីឥណ្ឌូណេស៊ី Susilo Bambang Yudhoyono និងលោកប្រធានាធិបតីបារាំង នីកូឡា សាកូហ្ស៊ី មេគណបក្សប្រឆាំងទាំងពីរដែលមានសម្លេងឆ្នោតស្ថិតនៅក្នុងលំដាប់ទីពីរ និងទីបី នៅក្នុងការបោះឆ្នោតជ្រើសតាំងតំណាងរាស្រ្ត ថ្ងៃទី២៧ កក្កដា បានបរិហារ«ពីការលួចបន្លំសន្លឹកឆ្នោតជាប្រព័ន្ធ ដែលអាចធ្វើអោយ លទ្ធផលនៃការបោះឆ្នោតថ្ងៃទី២៧ កក្កដា មិនទាន់ទទួលយកជាការបាន»។
ប៉ុន្តែ ពួកគេបានសរសេរថា «ការបោះឆ្នោតបែបបន្លំសន្លឹកឆ្នោតនេះផ្ទុយទៅនឹងសន្ធិសញ្ញាទីក្រុងប៉ារីស ដែលបានចែងថាប្រទេសកម្ពុជាមាន «ដំណើការបោះឆ្នោតជាទៀងទាត់ និងត្រឹមត្រូវ» រួមទាំង «នីតិវិធីនៃការបោះឆ្នោត» ដែលអនុញ្ញាតអោយប្រជាពលរដ្ឋគ្រប់រូបចូលរួម «ដំណើការបោះឆ្នោតយ៉ាងពេញលេញ និងប្រកបដោយសមភាព»។
ម្យ៉ាងវិញទៀត គណបក្សប្រឆាំងគ្រោងនឹងធ្វើពហិការមិនចូលរួមពិធីផឹកទឹកសម្បថ ដែលកំណត់ដោយគណបក្សប្រជាជនកម្ពុជា នៅថ្ងៃទី២៤ កញ្ញា និងជាទូទៅ ពិធីនេះប្រព្រឹត្តទៅក្រោមអធិបតីភាពព្រះមហាក្សត្រ បើសិនជា«បណ្តឹងរបស់ពួកយើងមិនត្រូវបានដោះស្រាយដោយសមហេតុផល»។ គណបក្សប្រជាជនកម្ពុជា «បានប្រកាសអោយដឹងជាសាធារណៈ»ថាប្រសិនបើតំណាងរាស្រ្តគណបក្សសម រង្ស៊ី និងគណបក្សសិទ្ធិមនុស្សមិនព្រមចូលរួមពិធីនេះ «គណបក្សនឹងទទួលយកអាសនៈទាំង២៩របស់យើង ដើម្បីបែងចែកអោយសមាជិកគណបក្សបក្សនេះ ដែលមានអាសនៈទាំងអស់៩០រួចទៅហើយ (លើ១២៣)»។
ប្រសិនបើគម្រោងគិតទុកជាមុននេះកើតឡើងពិតមែន មេគណបក្សប្រឆាំងទាំងពីរបានមើលឃើញពីការរំលោភបំពានសន្ធិសញ្ញាក្រុងប៉ារីសមួយផ្សេងទៀត។ «ប្រសិនជាគណបក្សប្រជាជនកម្ពុជានៅតែគំរាមកំហែង ដោយចោទប្រកាន់ពួកយើងថាបានបោះបង់អាសនៈតំណាងរាស្រ្តរបស់យើង និងបានបកស្រាយថាច្បាប់បោះឆ្នោតមានលក្ខណៈត្រឹមត្រូវល្អ នោះនឹងលែងមានសម្លេងប្រឆាំងនៅក្នុងប្រទេសយើង ហើយករណីនេះផ្ទុយទៅនឹងសន្ធិសញ្ញាក្រុងប៉ារីសយ៉ាងធ្ងន់ធ្ងរ ដែលបានចែងថាប្រទេសកម្ពុជាគឺជាប្រទេសគោរពលទ្ធិប្រជាធិបតេយ្យ សេរី ពហុបក្ស»។
|
