សមាជិកគណបក្សសម រង្ស៊ី ស្ថិតនៅក្រោមការគាបសង្កត់
អង្គការឃ្លាំមើលសិទ្ធិមនុស្ស   បានលើកឡើងវិញម្តងទៀតនូវសំដីរបស់សម្តេចនាយកមន្រ្តី ហ៊ុន សែន ដែលបានចាត់ទុកគណបក្សសមរង្ស៊ី    ជា«គណបក្សផ្តាច់ការ» និងចោទ​ប្រកាន់​មេដឹក​នាំបច្ចុប្បន្ន ថាបានគំរាមកំហែងសមាជិកណាដែលបានចូលរួម​ជាមួយនឹង​គណបក្សប្រជាជនកម្ពុជា ។ ប្រមុខរាជរដ្ឋាភិបាលបានអះអាងថាអ្នក ទទួលខុសត្រូវគណបក្សសម រង្ស៊ី ក្នុងខេត្តកំពង់ធំ បានឃុំខ្លួនមនុស្សម្នាក់ក្នុង​ចំណោមសកម្មជនរបស់ពួកគេ ដើម្បីរារាំងគាត់កុំអោយមកចូលរួមជាមួយនឹង​គណបក្សប្រជាជន។ នៅថ្ងៃ បន្ទាប់ អាជ្ញាធរបានឃាត់ខ្លួនលោក ទួន សារ៉ន មេឃុំមកពីគណបក្សសម រង្ស៊ី ពីបទបង្ខាំងខ្លួនសកម្មជនមួយរូបនៃគណបក្ស​របស់ខ្លួនដោយខុសច្បាប់។ អង្គការដែលមានមូលដ្ឋាននៅទីក្រុងញូវយ៉កនេះ សង្ស័យថានឹងមានការចាប់ខ្លួនសមាជិកគណបក្សសម រង្ស៊ីក្រោយៗទៀត។ អង្គការនេះយល់ឃើញថា ការចោទប្រកាន់ទាំងនេះ គឺជាផ្នែកមួយនៃ​ការបង្ខំទៅ​លើសមាជិកគណបក្សសម រង្ស៊ី ដែលធ្វើឡើងដោយរដ្ឋាភិបាល ដើម្បីអោយ​ពួក​គេចូលរួមជាមួយនឹងគណបក្សប្រជាជន។

អង្គការឃ្លាំមើលសិទ្ធិមនុស្ស: ជាមធ្យោបាយមួយដែលត្រូវបានគេមើលឃើញគ្រប់គ្នា 

អង្គការនេះបានបរិហារថា «ក្នុងអំឡុងពេលប៉ុន្មានខែចុងក្រោយនេះ សម្តេច ហ៊ុន សែន បានតែងតាំងជាសាធារណៈនូវសមាជិកជាន់ខ្ពស់មួយចំនួនរបស់​គណបក្ស សម រង្ស៊ី ជាទីប្រឹក្សារាជរដ្ឋាភិបាល បន្ទាប់ពីអ្នកទាំងនោះបានចាក​ចេញពីគណបក្សរបស់ខ្លួន។ សម្តេច ហ៊ុន សែន ក៏បានច្រានចោលរាល់​ការរិះគន់​ដែល​មានន័យថា គាត់បានបម្រើប្រយោជន៍នយោបាយផ្ទាល់ខ្លួន ដោយ​ប្រើប្រាស់មធ្យោបាយមិនត្រឹមត្រូវនូវលុយរបស់រាជរដ្ឋាភិបាល ដើម្បីធ្វើ​ការសូកប៉ាន់»។ អង្គការឃ្លាំមើលសិទ្ធិមនុស្សបានសង្កត់ធ្ងន់ថា គណបក្សប្រជាជនកម្ពុជា មានបទពិសោធយ៉ាងរឹងមាំ ក្នុងការប្រើអំណាច ដើម្បី​ធ្វើអោយបែកបាក់ផ្ទៃក្នុងគណបក្សនយោបាយផ្សេងៗ។ អង្គការបាន​បង្ហាញពីករណីគណបក្សប្រជាធិបតេយ្យសេរីព្រះពុទ្ធសាសនា ដែលបាន​ជួប​ប្រទះនូវបញ្ហាបែបនេះក្នុងទសវត្សឆ្នាំ១៩៩០ និងករណីគណបក្សរាជា​និយម​ហ្វ៊ុន ស៊ិនប៉ិច ដែលកំពុងជិតដួលរលំ។  

អង្គការឃ្លាំមើលសិទ្ធិមនុស្សបានគូសបញ្ជាក់និងរម្លឹកថា គណបក្សសម រង្ស៊ី ធ្លាប់​ត្រូវបានធ្វើទុក្ខបុកម្នេញម្តងរួចមកហើយ កាលពីពេលកន្លងមក ដែលពេល​នោះ លោកតំណាងរាស្រ្ត ជាម ច័ន្ទនី ត្រូវបានជាប់ឃុំឃាំងរយៈពេលមួយឆ្នាំ កាលពីឆ្នាំ២០០៥ ពីបទបង្កើតកងកម្លាំងប្រដាប់អាវុធស្រមោល។ ក្នុងឆ្នាំនោះ លោក សម រង្ស៊ី ក៏ត្រូវបានផ្តន្ទាទោសផងដែរ ពីបទបរិហាកេរ្តិ៍ រាជរដ្ឋាភិបាល។ លោក ប្រេដ អាដាំ នាយកអង្គការឃ្លាំមើលសិទ្ធិមនុស្សប្រចាំ​អាស៊ី បានអំពាវនាវដល់មន្ត្រីការទូត និងប្រទេសផ្តល់ជំនួយធ្វើអន្តរាគមន៍ មុន​នឹងបញ្ហានេះជ្រុលហួសពេល។  

គណបក្ស សម រង្ស៊ី ឯកភាពនឹងការយល់ឃើញរបស់អង្គការ
លោកអេង ឆៃអ៊ាង អគ្គលេខាធិការគណបក្សសម រង្ស៊ី បានសំដែងការ​យល់ស្របទៅនឹងការថ្លែងការណ៍របស់អង្គការឃ្លាំមើលសិទ្ធិមនុស្ស ដោយ​វាយ​តម្លៃថា «ត្រឹមត្រូវនិងពិតប្រាកដ»។ ដោយសំដែងនូវទំនុកចិត្តទៅលើ​ជោគ​វាសនារបស់គណបក្សរបស់លោក លោកបានបញ្ជាក់ថា ការប្រឈម​មុខរបស់គណបក្សសម រង្ស៊ី ទៅនឹងការចាកចេញនៃសមាជិកជាច្រើន​រូបនា​ពេលថ្មីៗនេះនិងដែលត្រូវបានប្រព័ន្ធព័ត៌មានផ្សព្វផ្សាយយ៉ាងខ្លាំងនោះ នឹងមិន​ធ្វើអោយប៉ះពាល់ដល់ដំណើរការចូលរួមបោះឆ្នោតសភា​របស់​គណបក្ស  នា​ខែ​កក្កដា ខាងមុខឡើយ។ លោកបានអោយដឹងថា «ទោះបី​មានអ្នក​ចាកចេញពី​យើង​មែន ប៉ុន្តែ មានមនុស្សថ្មីជាច្រើន បានមកចូលរួមជាមួយគណបក្ស​របស់​យើង»។

នៅក្នុងលិខិតផ្ញើរជូនប្រធានតុលាការ​ខេត្ត​កំពង់ធំ កាលពីថ្ងៃច័ន្ទកន្លងទៅ តំណាងរាស្រ្តគណបក្សសម រង្ស៊ី ចំនួន១៨រូប ដែលមានលោកសម រង្ស៊ី និងភរិយារបស់លោក អ្នកស្រី ជូឡុង សូមូរ៉ា បានស្នើសុំធានាអោយមាន​ការដោះលែងមេឃុំពង្រជាបណ្តោះអាសន្ន។ តំណាងរាស្ត្រទាំងនោះយល់​ថាការចោទប្រកាន់លើលោក ទួន សារ៉ន មិនមានមូលដ្ឋានជាក់លាក់ឡើយ គាត់គ្រាន់តែជាជនរងគ្រោះដោយអំពើចេតនានយោបាយទុច្ចរិតប៉ុណ្ណោះ។

រដ្ឋាភិបាលបដិសេធការចោទប្រកាន់
លោក ខៀវ កាញារីទ្ធ រដ្ឋមន្ត្រីក្រសួងព័ត៌មានបានចោទជាសំនួរថា «តើគណបក្ស​ប្រជាជនកម្ពុជា បានធ្វើការគាបសង្កត់លើមនុស្សប៉ុន្មាននាក់ ដើម្បីអោយពួកគេចូលរួមក្នុងគណបក្សរបស់ខ្លួន?តើមានមនុស្សប៉ុន្មាននាក់ក្នុង​ចំណោមអ្នកបោះឆ្នោតជាង៨លាននាក់នោះ?» លោករដ្ឋមន្ត្រីបានលើកឡើងថា​អង្គការឃ្លាំមើលសិទ្ធិមនុស្សលើកឡើងតែមួយករណីតែប៉ុណ្ណោះ។ «អង្គការនេះ​មិន​ចេះធ្វើការ គាត់គួរតែមកប្រទេសកម្ពុជាដើម្បីរៀនវាយតម្លៃអំពីស្ថានភាព! លោក​បានសន្និដ្ឋានថា «អង្គការនេះគ្រាន់តែ ស្រែក ដើម្បីទទួលបានប្រាក់​ឧបត្ថម្ភ​។ ខ្ញុំអាណិតណាស់»។