|
ទទួលព័ត៌មានតាមអីមែល
សូមលោកអ្នកទទួលអត្ថបទថ្មីៗ តាមរយៈទូរសាអេឡិចត្រូនិច
|
| គណបក្សប្រឆាំងនៅតែស្ថិតក្រោមការគាបសង្កត់ |
| ααα ដួង សុខា | | | 23-06-2008 | ការដកស្លាកសញ្ញាគណបក្ស ការចូលក្នុងប្រព័ន្ធផ្សព្វផ្សាយមានកំណត់ ការរើសអើង ការបំភិតបំភ័យ ការគំរាមកំហែង ការវាយប្រហារតាមពាក្យសម្តី និងលើរាងកាយ...ទាំងនេះគឺជាបញ្ជីរាយឧបសគ្គរបស់សកម្មជននយោបាយនៃបក្សប្រឆាំង បើតាមការអោយដឹងរបស់មេដឹកនាំពួកគេ។ មេដឹកនាំទាំងនេះមិនរួញរានឹងចោទប្រកាន់ទៅលើគណបក្សកាន់អំណាចឡើយ។ គណបក្សប្រជាជនកម្ពុជាមានមធ្យោបាយច្រើនក្នុងការធ្វើសកម្មភាពឃោសនានយោបាយបើប្រៀបធៀបនឹងគូប្រជែងឯទៀត។ ស្ថានភាពនេះអាចជះឥទ្ធិពលខ្លាំងលើលទ្ធផលបោះឆ្នោតតំណាងរាស្រ្ត នាថ្ងៃទី២៧ ខែកក្កដា។ ពួកគេបានរិះគន់ថា បើយោងតាមស្ថានភាពបច្ចុប្បន្ន គ្មានអ្វីអាចធានាថា ការបោះឆ្នោតនឹងប្រព្រឹត្តទៅដោយសេរី និងយុត្តិធម៌នោះទេ។ ប៉ុន្តែការចោទប្រកាន់ត្រូវបានច្រានចោលពីគណបក្សប្រជាជនកម្ពុជា។
ការគំរាមកំហែង និងអំពើហិង្សា
ការចោទប្រកាន់នេះមិនមែនជាករណីថ្មីទេ ប៉ុន្តែវាតែងតែលេចចេញឡើងនៅរាល់ពេលបោះឆ្នោតថ្មីនៅកម្ពុជា។ គណបក្សប្រឆាំងអះអាងថាជាជនរងគ្រោះនៃអំពើរើសអើង រហូតដល់រងការគំរាមកំហែងពីសំណាក់អាជ្ញាធរមូលដ្ឋាន ដែលភាគច្រើនជាអ្នកស្និទ្ធិនឹងគណបក្សប្រជាជនកម្ពុជា។ លោកកឹម សុខា ប្រធានគណបក្សសិទ្ធិមនុស្ស (PDH) បានរិះគន់ថា៖ «ប្រជាពលរដ្ឋតែងតែបង្ហាញឆន្ទៈពួកគាត់ក្នុងការគាំទ្រគណបក្សយើង។ ប៉ុន្តែ អាជ្ញាធរនិយាយប្រាប់ពួកគាត់ថា ប្រសិនបើពួកគាត់មិនចូលជាបក្សពួកគេ(គណបក្សប្រជាជនកម្ពុជា)ទេ ពួកគេនឹងមិនជួយសម្រួលកិច្ចការរដ្ឋបាលផ្សេងៗដល់ពួកគាត់នោះឡើយ»។ អតីតប្រធានមជ្ឈមណ្ឌលសិទ្ធិមនុស្សកម្ពុជារូបនេះអះអាងថា៖ «បញ្ហានេះធ្វើអោយប្រជាពលរដ្ឋភ័យខ្លាច ហើយមិនហ៊ានគាំទ្រគណបក្សយើងជាចំហទេ»។ លោករម្លឹកថា សកម្មជនពីរនាក់របស់គណបក្សលោកត្រូវបានគេធ្វើឃាតចាប់តាំងពីសមាជនៅខែកក្កដា ឆ្នាំ២០០៧។ ប៉ុន្តែឃាតកម្មដែលមានចរិតនយោបាយមិនត្រូវបានគេចង្អុលភស្តុតាងនោះទេ។
គណបក្សនរោត្តម រណឫទ្ធិ (PNR)ស្តីបន្ទោសផងដែរទៅលើអាជ្ញាធរមូលដ្ឋានក្នុងការប្រើប្រាស់វិធីផ្តល់អំណោយផង និងវិធីបង្ខំផង ដើម្បីធ្វើអោយសមាជិកបក្សខ្លួនទៅចុះចូលជាមួយគណបក្សប្រជាជនកម្ពុជាវិញ តាមរយៈការរំខានដល់ការប្រជុំនយោបាយផ្សេងៗរបស់គណបក្សនេះ និងតាមរយៈការផ្តល់លុយដើម្បីអោយពួកគេចាកចេញពីគណបក្ស។ ដូចគណបក្សសិទ្ធិមនុស្សដែរ សកម្មជនពីរនាក់របស់គណបក្សនរោត្តមរណឫទ្ធិក៏ត្រូវបានសម្លាប់ចន្លោះពីខែមីនា និងខែឧសភាកន្លងទៅនេះដែរ។ លោកមុត ចន្ថា អ្នកនាំពាក្យ និងជាបេក្ខជនឈរឈ្មោះលំដាប់លេខរៀងទីមួយរបស់គណបក្ស PNR ប្រចាំមណ្ឌលក្រុងភ្នំពេញនៅក្នុងការបោះឆ្នោតតំណាងរាស្រ្ត បានសម្តែងការសោកស្តាយថា៖ «យើងបានដាក់ពាក្យបណ្តឹងទៅអាជ្ញាធរនានាដែរ ប៉ុន្តែគ្មានបានការឡើយ។ អ្នកដែលចង់ធ្វើបាបយើង គឺជាអ្នកទទួលខុសត្រូវក្នុងការដោះស្រាយបញ្ហា»។
សូម្បីតែគណបក្សក្នុងរដ្ឋាភិបាលចម្រុះ គឺគណបក្សហ៊្វុនស៊ិនប៉ិច ក៏បានបង្ហើបអោយដឹងដែរថា សកម្មជនរបស់ខ្លួនជាច្រើននាក់ក៏បានរងគ្រោះដោយសារការគំរាមកំហែងពីសំណាក់យោធា អំឡុងពេលចុះបេសកកម្មនយោបាយដែរ។ លោកញឹក ប៊ុនឆៃ អគ្គលេខាធិការគណបក្សហ៊្វុនស៊ិនប៉ិច គូសបញ្ជាក់ថា៖ «យើងខំប្រឹងដោះស្រាយបញ្ហានេះ តាមរយៈការទំនាក់ទំនងដោយផ្ទាល់ទៅកាន់មេពួកគេ។ នៅទីបំផុត មេទាហានទាំងនោះក៏បានស្តីបន្ទោសកូនចៅពួកគេ។ យើងស្ថិតក្នុងរដ្ឋាភិបាលតែមួយ។ ដូច្នេះ ដំណោះស្រាយគឺតែងទទួលបានលទ្ធផល»។
បញ្ហាស្មុគស្មាញរបស់ព្រះអង្គម្ចាស់រណឫទ្ធិ
អ្នកនាំពាក្យរបស់គណបក្សនរោត្តម រណឫទ្ធិ មិនបានលាក់បាំងទេថា ក្រៅពីការគាបសង្កត់នៅថ្នាក់មូលដ្ឋាន ឧបសគ្គធំបំផុតដែលខ្លួនបានជួបប្រទះ គឺពាក់ព័ន្ធនឹងបញ្ហារឿងក្តីរបស់ប្រធានបក្សខ្លួន គឺព្រះអង្គម្ចាស់នរោត្តម រណឫទ្ធិ។ រហូតមកទល់នឹងពេលបច្ចុប្បន្ន ព្រះអង្គនៅតែបន្តធ្វើនិរទេសដោយអង្គឯងនៅក្នុងប្រទេសម៉ាឡេស៊ី។ ព្រះអង្គត្រូវបានតុលាការកាត់ទោសកំបាំងមុខនៅថ្ងៃទី១៣ ខែមីនា ឆ្នាំ២០០៧ អោយជាប់ពន្ធនាគាររយៈពេល១៨ខែ និងពិន័យជាសំណងជំងឺចិត្តចំនួន១៥០ ០០០ ដុល្លារ ពីបទរំលោភលើសេចក្តីទុកចិត្តពាក់ព័ន្ធនឹងការលក់ស្នាក់ការបក្សចាស់របស់ព្រះអង្គ គឺគណបក្សហ៊្វុនស៊ិនប៉ិច។ នៅក្នុងលក្ខខណ្ឌបែបនេះ វាមិនមែនជាការងាយស្រួលទេក្នុងការបន្តដឹកនាំគណបក្សដ៏ក្មេងខ្ចីរបស់ព្រះអង្គពីបរទេសមកនោះ។ គណបក្សថ្មីរបស់ព្រះអង្គត្រូវបានបង្កើតឡើងកាលពីថ្ងៃទី១៦ ខែធ្នូ ឆ្នាំ២០០៦។ អ្នកតំណាងគណបក្ស នរោត្តម រណឫទ្ធិ រូបនេះបានរិះគន់ថា៖ «កត្តានេះអាចជះឥទ្ធិពលមិនអាចប្រកែកបានទៅលើការបោះឆ្នោត។ ពួកយើងមិនអាចធ្វើសកម្មភាពដោយសេរី និងបើកចំហបានទេ ខណៈពេលដែលគណបក្ស នរោត្តម រណឫទ្ធិជាគណៈបក្សមានសក្តានុពលពិតប្រាកដ។ ការបោះឆ្នោតនឹងមិនប្រព្រឹត្តទៅដោយសេរី និងយុត្តិធម៌ឡើយ»។ អ្នកតំណាងរបស់សង្គមស៊ីវិលបានអំពាវនាវអោយរដ្ឋាភិបាលស្វែងរកដំណោះស្រាយមួយដើម្បីធានាការចូលរួមយ៉ាងសកម្មរបស់ព្រះអង្គម្ចាស់រណឫទ្ធិ នៅក្នុងការបោះឆ្នោតខែកក្កដាខាងមុខ។ ប៉ុន្តែទាក់ទងនឹងបញ្ហានេះ លោកនាយករដ្ឋមន្ត្រីហ៊ុន សែន ធ្លាប់បានឆ្លើយតបជាសាធារណៈថា ព្រះអង្គម្ចាស់នឹង«ត្រូវដាក់ខ្នោះ ហើយឃុំក្នុងពន្ធនាគារ»ប្រសិនបើទ្រង់ឈានជើងជាន់លើទឹកដីកម្ពុជា។
ការទម្លាក់ស្លាកសញ្ញាគណបក្ស
បញ្ហាលំបាកផ្សេងទៀតដែលគណបក្សប្រឆាំងទាំងអស់បានជួបប្រទះ គឺអាជ្ញាធរមូលដ្ឋានទាមទារអោយពួកគេដាក់ពាក្យស្នើសុំការអនុញ្ញាតសិនមុននឹងលើកស្លាកសញ្ញាគណបក្ស ហើយអាជ្ញាធរទាំងនោះមិនញញើតនឹងរុះទម្លាក់ស្លាកសញ្ញាទាំងនេះចេញឡើយ។ លោកសុន ឆ័យ តំណាងរាស្ត្រសកម្មជាងគេនៅក្នុងគណបក្សសម រង្ស៊ី បានសម្តែងការខឹងសម្បារថា៖ «ឧទាហរណ៍ជាក់ស្តែងមួយ : ពួកយើងបានស្នើសុំដាក់ស្លាកសញ្ញាបក្សនៅជ្រោយចង្វា។ ប៉ុន្តែអាជ្ញាធរខ័ណ្ឌឫស្សីកែវបានបំផ្លាញស្លាកសញ្ញារបស់យើងចោល។ នេះគឺជាសកម្មភាពហិង្សាមួយ។ តាមច្បាប់ គណបក្សនីមួយៗមានសិទ្ធិលើកស្លាកសញ្ញាគណបក្សរបស់ខ្លួននៅទីកន្លែងសាធារណៈ»។
លោកកឹម សុខា បេក្ខជនរបស់គណបក្សសិទ្ធិមនុស្សសម្រាប់តំណែងនាយករដ្ឋមន្ត្រី បានរិះគន់ថា៖ «ការដំឡើងស្លាកសញ្ញាគឺរឿងមួយដ៏ស្មុគស្មាញសម្រាប់ពួកយើង។ ជួនកាល គេមិនផ្តល់ការអនុញ្ញាតទេ រីឯគណបក្សប្រជាជនកម្ពុជាវិញ ពួកគេអាចដាក់ស្លាកសញ្ញានៅកន្លែងណាក៏បានដែរ»។
លោកបាន សុផល ប្រធានគណបក្សសង្គមយុត្តិធម៌(PSJ) បានពន្យល់ថា៖ «អាជ្ញាធរឃុំ-សង្កាត់នៅតែមិនទាន់យល់ថា ដើម្បីដាក់ស្លាកគណបក្សមួយ យើងគ្រាន់តែជូនដំណឹងប្រាប់ពួកគាត់ប៉ុណ្ណោះ យើងមិនចាំបាច់សុំការអនុញ្ញាតពីពួកគាត់ទេ»។ គណបក្សនេះទើបចូលរួមការបោះឆ្នោតជាលើកដំបូង បន្ទាប់ពីការចាប់ផ្តើមបង្កើតនៅខែសីហា ឆ្នាំ២០០៦មកនេះ។
អាជ្ញាធរមូលដ្ឋាន«មានភាពសហការ»តិចតួច
លោកសុន ឆ័យ បានព្រមានថា៖ «ក្នុងនាមជាតំណាងរាស្រ្ត ពួកយើងមានសិទ្ធិដូចគ្នានៅក្នុងការចុះទៅមូលដ្ឋាន។ ប៉ុន្តែអាជ្ញាធរមូលដ្ឋានជាសមាជិកគណបក្សប្រជាជនកម្ពុជា មិនបង្ហាញភាពសហការជាមួយយើងទេ នៅពេលពួកយើងទាក់ទងទៅពួកគេ ដើម្បីរៀបចំជំនួប ឬដោះស្រាយជម្លោះដីធ្លីផ្សេងៗ»។ លោកអះអាងថា កាលពីថ្ងៃទី១៣ ខែមិថុនា អាជ្ញាធរខ័ណ្ឌឫស្សីកែវបានរារាំងមិនអោយរៀបចំការប្រជុំជាមួយសមាជិកសហគមន៍បងប្អូនខ្មែរជនជាតិឥស្លាមទេ បើទោះជាលោកបានស្នើសុំការអនុញ្ញាតហើយក៏ដោយ។
ចំណែកទំនាក់ទំនងរវាងគណបក្សហង្ស ដារ៉ា ចលនាប្រជាធិបតេយ្យ ជាមួយនឹងអាជ្ញាធរក៏មិនសូវជាល្អប្រសើរប៉ុន្មានដែរ។ លោកសេង សុខហេង អគ្គលេខាធិការបក្ស សំដែងការមិនសប្បាយចិត្តថា : «អាជ្ញាធរប្រាប់ទៅប្រជាពលរដ្ឋកុំអោយចូលជាមួយពួកយើង ព្រោះបក្សយើងក្រ។ ហើយប្រសិនបើសមាជិកបក្សយើងជាអ្នករកស៊ី ពួកគេណែនាំកុំអោយប្រជាពលរដ្ឋទៅទិញទំនិញពីផ្ទះសមាជិកបក្សយើងឡើយ...។ នេះគឺជាគំនិតបក្សពួកនិយម!» ។
វិទ្យុ និងទូរទស្សន៍មិនត្រូវបើកចំហដល់គណបក្សនយោបាយ
ពាក់ព័ន្ធនឹងប្រព័ន្ធផ្សព្វផ្សាយ ការផាត់គណបក្សប្រឆាំងអោយឃ្លាតចេញឆ្ងាយគឺមានលក្ខណៈគួរអោយកត់សម្គាល់។ នេះជាការរិះគន់របស់បក្សប្រឆាំងនានា។ ឧបសគ្គគឺទាក់ទងនឹងបញ្ហាថវិកា ប៉ុន្តែមិនមែនមានតែប៉ុណ្ណឹងទេ។
លោកកឹម សុខា គូសបញ្ជាក់ថា៖ «ពួកយើងគ្មានប្រព័ន្ធផ្សព្វផ្សាយទេ។ ហើយវិទ្យុទាំងឡាយមិនហ៊ានជួលម៉ោងផ្សាយអោយយើងឡើយ។ បើទោះជាគណៈកម្មាធិការជាតិរៀបចំការបោះឆ្នោតបានស្នើទៅកាន់បណ្តាវិទ្យុ និងទូរទស្សន៍អោយលក់ម៉ោងផ្សាយស្មើៗគ្នាទៅអោយគ្រប់គណបក្សនយោបាយនៅក្នុងពេលឃោសនាបោះឆ្នោតក៏ដោយ ក៏តម្លៃស្នើដោយស្ថានីយ៍វិទ្យុ និងទូរទស្សន៍ទាំងនោះមានកម្រិតខ្ពស់ដែរ គឺតម្លៃស្មើនឹងការផ្សាយពាណិជ្ជកម្ម»។
លោកសុន ឆ័យ រៀបរាប់ថា៖ «យើងបានទាក់ទងទៅកាន់ស្ថានីយទូរទស្សន៍ទាំង៧ ដើម្បីផ្សព្វផ្សាយស្ប៉ត ប៉ុន្តែពួកគេបានបដិសេធមិនព្រមជួលម៉ោងអោយយើងទេ។ យើងមានតែផ្សព្វផ្សាយកម្មវិធីនយោបាយរបស់យើងតាមវិទ្យុទាំងឡាយដែលឯករាជ្យពីគណបក្សប្រជាជនកម្ពុជា។ ប្រសិនបើប្រព័ន្ធផ្សព្វផ្សាយមានការបើកចំហជាងនេះនោះ ពួកយើងជឿជាក់ថា គណបក្សសម រង្ស៊ីប្រាកដជាឈ្នះ»។ អ្នកតំណាងរាស្រ្តរូបនេះសង្កេតឃើញថា ប្រមុខដឹកនាំរដ្ឋាភិបាលអាចប្រើប្រព័ន្ធផ្សព្វផ្សាយបានទាំងអស់ ដើម្បីរិះគន់គណបក្សដទៃ ជាពិសេសគឺរិះគន់គណបក្សសម រង្ស៊ីតែម្តង។
ទោះយ៉ាងណា គណបក្សសម រង្ស៊ី និងគណបក្សសិទ្ធិមនុស្សអាចផ្សព្វផ្សាយជារៀងរាល់ថ្ងៃក្នុងវិទ្យុសំបុកឃ្មុំ (១០៥FM) ម្នាក់ពីម៉ោង១១ដល់ម៉ោង១២ថ្ងៃត្រង់ និងម្នាក់ទៀតពីម៉ោង១២ដល់ម៉ោង១ថ្ងៃត្រង់។ គណបក្សសម រង្ស៊ី ក៏បានជួលម៉ោងផ្សាយ២ម៉ោងផ្សេងទៀតដែរនៅក្នុងវិទ្យុមហានគរ (៩៣.៥ FM) គឺពីម៉ោង១៦ដល់ម៉ោង១៨ជារៀងរាល់ថ្ងៃ។ វា ប្រៀបបាននឹងទឹកមួយដំណក់ប៉ុណ្ណោះបើធៀបនឹងកម្មវិធីប្រចាំថ្ងៃដែលនិយាយលើកពីគុណបុណ្យរបស់គណបក្សប្រជាជនកម្ពុជានៅតាមវិទ្យុ និងទូរទស្សន៍ផ្សេងៗទៀត(សូមអានអត្ថបទបន្ថែម)។
រីឯគណបក្សដែលគេស្គាល់តិចតួចនោះ ដូចជាគណបក្សសាធារណរដ្ឋខ្មែរ ដែលដឹកនាំដោយលោកលន់ រិទ្ធិ គណបក្សហង្ស ដារ៉ា និងគណបក្សសង្គមយុត្តិធម៌ជាដើម បានវាយតម្លៃថា ខ្លួនមិនត្រូវបានប្រព័ន្ធផ្សព្វផ្សាយក្នុងស្រុក និងក្រៅស្រុកចាប់អារម្មណ៍ឡើយ។ លោកបាន សុផល ប្រធានគណបក្សសង្គមយុត្តិធម៌ បានសោកស្តាយថា៖ «ពួកគេនិយាយតែពីគណបក្សសំខាន់ៗ ហើយមិនចាប់អារម្មណ៍នឹងពួកយើងទេ ព្រោះពួកគេចាត់ទុកពួកយើងថាជាគណបក្សតូច»។
សង្គមស៊ីវិលព្រួយបារម្ភ
បញ្ហាលំបាកទាំងនេះ ដែលតែងតែកើតមាននៅរាល់ពេលបោះឆ្នោតម្តងៗ បាននាំអោយគណៈកម្មាធិការប្រព្រឹត្តិកម្មនៃអង្គការ សមាគមសិទ្ធិមនុស្សកម្ពុជា (Chrac) ដែលប្រមូលផ្តុំដោយអង្គការមិនមែនរដ្ឋាភិបាលចំនួន២១ និងអង្គការសង្កេតការណ៍បោះឆ្នោតខុមហ្វ្រែល និងនិកហ្វិច មានការព្រួយបារម្ភ។ នៅក្នុងសេចក្តីថ្លែងការណ៍មួយ ពួកគេអះអាងថា ចាប់តាំងពីខែមករា ដល់ខែឧសភា ឆ្នាំ២០០៨ ពួកគេបានស្រង់ឃើញមានករណីឃាតកម្មមិនតិចជាង៥ករណី ការយាយីនិងការគំរាមកំហែងទៅលើសកម្មជននយោបាយចំនួន២១ករណី និងការរើទម្លាក់ស្លាកគណបក្សចំនួន២១ករណីនៅទូទាំងប្រទេសកម្ពុជា។
លោកខៀវ កាញ៉ារីទ្ធ អ្នកនាំពាក្យរបស់គណបក្សប្រជាជនកម្ពុជា និងរបស់រដ្ឋាភិបាល ធ្វើការបដិសេធដាច់អហង្ការរាល់ការចោទប្រកាន់ទៅលើគណបក្សរបស់លោក។ ជាជំនួយដល់ការឆ្លើយតប លោករដ្ឋមន្ត្រីព័ត៌មានរិះគន់ថា បើតាមរូបលោក «គណបក្សមួយចំនួន»គ្មាន«គុណធម៌»។ លោកខៀវ កាញ៉ារីទ្ធ ពន្យល់ថា ៖ «គណបក្សមួយចំនួននិយាយថា គណបក្សប្រជាជនកម្ពុជាគឺគណបក្សក្បត់ គណបក្សលក់ទឹកដី។ វាបង្កអោយមានជម្លោះពាក្យសម្តីនៅមូលដ្ឋាន»។ ចំណែកឯបញ្ហាការផ្សព្វផ្សាយព័ត៌មានវិញ លោករដ្ឋមន្ត្រីវាយតម្លៃថា ប្រព័ន្ធផ្សព្វផ្សាយរដ្ឋមានតួនាទីផ្សព្វផ្សាយតែពីព័ត៌មានពាក់ព័ន្ធនឹងរដ្ឋាភិបាល។ គណបក្សផ្សេងទៀតទទួលបានសិទ្ធិផ្សព្វផ្សាយនៅក្នុង«ប្រព័ន្ធផ្សព្វផ្សាយបរទេស» ជាពិសេសវិទ្យុ នេះជាការលើកឡើងរបស់លោករដ្ឋមន្ត្រី។
|
|
α’ααααααααααα-សង្គមស៊ីវិលព្រួយបារម្ភពីការកើនឡើងនៃឃាតកម្មលើសកម្មជនគណបក្សនយោបាយ មុនពេលឃោសនាបោះឆ្នោត (០២-០៦-២០០៨) -យុទ្ធនាការឃោសនាបោះឆ្នោតតំណាងរាស្ត្រ : គណបក្សនយោ បាយបង្ហាញឆន្ទៈរបស់ខ្លួន (១២-០៥-២០០៨) -ស្ថានភាពគួរអោយព្រួយបារម្ភនៅក្នុងដំណាក់ការ មុនការបោះឆ្នោត (៣១-០៣-២០០៨)
ទូរទស្សន៍របស់រដ្ឋផ្តល់ភាពអនុគ្រោះច្រើនដល់ គណបក្សប្រជាជនកម្ពុជា ទូរទស្សនិកជនកម្ពុជាតែងតែសង្កេតឃើញជា រៀងរាល់ថ្ងៃ : ទូរទស្សន៍ជាតិកម្ពុជា(ទទក) ខំផ្សព្វផ្សាយកម្មវិធីបង្ហាញពីសកម្មភាពរបស់មន្ត្រីជាន់ខ្ពស់របស់រដ្ឋាភិបាល ពោលគឺមន្ត្រីរបស់គណបក្សប្រជាជនកម្ពុជា ដែលទៅសួរសុខទុក្ខសកម្មជនរបស់ខ្លួន ការចែកអំណោយ ការចូលរួមពិធីបញ្ជូលសមាជិកថ្មី...។ នេះគឺជាការឃោសនាដែលត្រូវបានលើកឡើងនៅក្នុងរបាយការណ៍ចេញផ្សាយថ្ងៃទី១៣ ខែមិថុនា របស់គណៈកម្មាធិការដើម្បីការបោះឆ្នោតដោយសេរី និងយុត្តិធម៌នៅកម្ពុជា(ខុមហ្វ្រែល)។ ខុមហ្វ្រែលគឺជាអង្គការសង្កេតការណ៍បោះឆ្នោតដ៏សំខាន់មួយនៅកម្ពុជា។ យោងតាមការអង្កេតមួយធ្វើទៅលើ ទទក ពីថ្ងៃទី៨មករា ដល់ថ្ងៃទី២០ឧសភា គណបក្សប្រជាជនកម្ពុជាត្រូវបានបង្ហាញដោយរូបភាពល្អ ហើយមានចំនួនញឹកញាប់ច្រើនជាងគូប្រជែងផ្សេងទៀត (៨៤%នៃពេលវេលារបស់ទូរទស្សន៍នេះដែលផ្តោតលើគណបក្សនយោបាយ ស្មើនឹង៣៥១លើកសុទ្ធតែល្អ) ហ៊្វុនស៊ិនប៉ិចត្រូវបានគេនិយាយដោយមិនលម្អៀង(៩%នៃពេលវេលា បង្ហាញលើអេក្រង់៣៩លើក) រីឯគណបក្សប្រឆាំងដ៏សំខាន់ សម រង្ស៊ីវិញ ត្រូវបានគេបង្ហាញយ៉ាងកម្រ (៧% ស្មើនឹង៣០លើក) ហើយជានិច្ចកាលគឺមានភាពអវិជ្ជមាន ដូចជាការប្រកាសរបស់លោកនាយករដ្ឋមន្ត្រីស្តីពីការចាកចេញរបស់សមាជិកគណបក្សសម រង្ស៊ីមកចូលរួមជាមួយគណបក្សប្រជាជនកម្ពុជា ឬពីពាក្យសម្តីរបស់អ្នកទាំងនេះដែលថាគណបក្សចាស់របស់ខ្លួនគំរាមកំហែងមកលើពួកគេ។
បច្ចុប្បន្ននេះ លោកសម រង្ស៊ីកំពុងជាប់ពាក់ព័ន្ធនឹងពាក្យបណ្តឹងពីបទបរិហារកេរ្តិ៍ និងផ្សព្វផ្សាយព័ត៌មានមិនពិត ដែលប្តឹងដោយលោកហោ ណាំហុង រដ្ឋមន្ត្រីក្រសួងការបរទេស។ រដ្ឋសភាជាតិនឹងមិនបានបោះឆ្នោតព្យួរអភ័យឯកសិទ្ធិសភារបស់លោក មុនការបោះឆ្នោតជ្រើសរើសតំណាងរាស្រ្តនោះទេ។ ប៉ុន្តែតំណាងរាស្រ្តប្រចាំមណ្ឌលកំពង់ចាមរូបនេះប្រហែលជាមិនទាន់រួចផុតពីពាក្យបណ្តឹងនេះទេ។ បញ្ហាប្តឹងផ្តល់ទៅលើគណបក្សនេះមិនមែនមានតែត្រឹមប៉ុណ្ណឹងទេ ពីព្រោះ ថ្មីៗនេះ សម្តេចនាយករដ្ឋមន្ត្រីបានបញ្ជាអោយបើកការស៊ើបអងេ្កតមួយ ពីទំនាក់ទំនងរវាងគណបក្សសម រង្ស៊ី និងកងទ័ពសេរីកម្ពុជា ដែលត្រូវបានចោទប្រកាន់ពីបទមានគោលបំណងផ្តួលរលំរដ្ឋាភិបាល កាលពីឆ្នាំ២០០០ និងបញ្ជាអោយបើកការស៊ើបអង្កេតលើករណីពាក់ព័ន្ធជាយថាហេតុណាមួយរបស់គណបក្សប្រឆាំងនេះ ជុំវិញការវាយប្រហារមកលើសម្តេចហ៊ុន សែន នៅខេត្តសៀមរាប ឆ្នាំ១៩៩៨។
Cet e-mail est protΓ©gΓ© contre les robots collecteurs de mails, votre navigateur doit accepter le Javascript pour le voir
|
