|
ទទួលព័ត៌មានតាមអ៊ីមែល
សូមលោកអ្នកទទួលអត្ថបទថ្មីៗ តាមរយៈទូរសាអេឡិចត្រូនិច
|
| គណបក្សនយោបាយកម្ពុជាចាប់ផ្តើមប្រតិបត្តិការអូស ទាញសហជីព |
| ααα ដួង សុខា | | | 09-06-2008 |  ភ្នំពេញ ថ្ងៃទី២២ មករា ២០០៨ ជូឡុងសូមុរ៉ា នៅក្នុងពិធីគោរពវិញ្ញាណ ខន្ធសពរបស់លោកជា វិជ្ជា © John Vink / Magnum សហជីពគឺជាកម្លាំងមួយនៃអង្គបោះឆ្នោតកម្ពុជាដែលគេមិនអាចមើលរំលងបានឡើយ។ សហជីពកម្មកររោងចក្រកាត់ដេរនានាមានចំនួនច្រើនជាងគេ ព្រោះវិស័យនេះប្រើប្រាស់កម្លាំងពលកម្មចំនួន៣៦៥ ១៧៥ នាក់ នៅក្នុងរោងចក្រទាំង៥១៨នៅកម្ពុជា បើយោងតាមតួលេខរបស់ក្រសួងការងារ។ គណបក្សនយោបាយនានាប្រហែលជាដឹងពីកម្លាំងនៃចលនាកម្មករ ហើយនៅពេលការបោះឆ្នោតតំណាងរាស្រ្តថ្ងៃ២៧ កក្កដាជិតចូលមកដល់ ការព្យាយាមទាក់ទង មេដឹកនាំសហជីពនានាបានកើនឡើង។ ចំណែកខាងសហជីពទាំងនោះវិញ ពួកគេប្រកាសក្តែងៗពីឯករាជ្យភាពរបស់ខ្លួនពីគ្រប់គណបក្សទាំងអស់ បើទោះជាកន្លងមក ពួកគេបានបង្ហាញតិចឬច្រើនពីសមានចិត្តចំពោះគណបក្សនយោបាយមួយចំនួនក៏ដោយ។
សហជីពត្រូវគេចែចង់
នៅឯគណបក្សហ៊្វុនស៊ិនប៉ិច គេមិនបានលាក់បាំងទេពីបំណងចង់បានការគាំទ្រពីកម្មករ និងគ្រូបង្រៀន ដែលជាក្រុមមុខរបរតំណាងដោយសហជីពយ៉ាងច្រើនសន្ធឹកសន្ធាប់ និងមានឥទ្ធិពល។ លោកណាន់ ស៊ី អ្នកនាំពាក្យរបស់គណបក្សនេះ អះអាងថា គណបក្សលោកបានទាក់ទងប្រធានសហជីពសេរីកម្មករនៃព្រះរាជាណាចក្រម្ពុជា (Siorc) ដែលមានឈ្មោះល្បីនៅក្នុងប្រព័ន្ធផ្សព្វផ្សាយ។ សហជីពនេះត្រូវបានគេស្គាល់ថាមានគោលជំហរត្រូវគ្នានឹងគណបក្សប្រឆាំង។ លោកណាន់ ស៊ី មានប្រសាសន៍ថា៖ «ចាប់តាំងពីកំណែទម្រង់ផ្ទៃក្នុងរបស់ខ្លួនម ក ហ៊្វុនស៊ិនប៉ិចយកចិត្តទុកដាក់លើបងប្អូនកម្មករ ហើយពួកយើងចង់លើកកម្ពស់កម្រិតជីវភាពពួកគាត់អោយថ្លៃថ្នូរ»។
រីឯដៃគូក្នុងរដ្ឋាភិបាលចម្រុះរបស់គណបក្សហ៊្វុនស៊ិនប៉ិច គឺគណបក្សប្រជាជនកម្ពុជាក៏អះអាងសម្តីដូចគ្នានេះដែរ។ ប៉ុន្មានសប្តាហ៍ចុងក្រោយនេះ គណបក្សប្រជាជនបានចូលទាក់ទងសហជីពជាច្រើន ក្នុងនោះក៏មានសហជីពសេរីកម្មករនៃព្រះរាជាណាចក្រម្ពុជា ផងដែរ។ លោកជាម យៀប សមាជិកដ៏លេចធ្លោមួយរូបរបស់គណៈកម្មាធិការអចិន្ត្រៃយ៍នៃគណបក្សប្រជាជន មានប្រសាសន៍អោយដឹងថា៖ «យើងមានបំណងចង់បានការគាំទ្ររបស់កម្មករ មុននិងក្រោយការបោះឆ្នោត។ ជាក់ស្តែង យើងខ្វល់ខ្វាយពីជោគវាសនាពួកគេ យើងបានខិតខំដើម្បីអោយពួកគេទទួលបានប្រាក់ឧត្ថម្ភបន្ថែមប្រចាំខែ៦ដុល្លារដើម្បីសម្របតាមតម្លៃទំនិញ!»។
លោកមុត ចន្ថា អ្នកនាំពាក្យគណបក្សនរោត្តម រណឫទ្ធិ(PNR) គូសបញ្ជាក់ថា គណបក្សនរោត្តម រណឫទ្ធិ ដែលនឹងចាប់ផ្តើមធ្វើយុទ្ធនាការឃោសនាបោះឆ្នោតជាលើកដំបូង អះអាងថា«មិនចង់ជ្រៀតជ្រែកផ្ទៃក្នុងរបស់សហជីព»ទេ បើទោះបីជា«សហជីពមួយចំនួននិយាយថាគាំទ្រយើង»ក៏ដោយ។ តែទោះយ៉ាងណា លោកបញ្ជាក់ថា៖ «សន្លឹកឆ្នោតនីមួយៗគឺមានសារៈសំខាន់សម្រាប់យើង»។
ចំពោះគណបក្សសិទ្ធិមនុស្សដែលទើបបង្កើតឡើងកាលពីឆ្នាំទៅ ចលនាកម្មករគឺជាសរសរដ៏សំខាន់របស់គណបក្ស រហូតដល់គណបក្សនេះបានរៀបចំ«សមាជកម្មករ»មួយនៅទីស្នាក់ការបក្សនាទីក្រុងភ្នំពេញ កាលពីប៉ុន្មានសប្តាហ៍មុន។ ក្នុងពេលជាមូយគ្នា លោកកឹម សុខា ប្រធានគណបក្សសិទ្ធិមនុស្ស សង្ឃឹមថា «សហជីពមិនគួរចូលគណបក្សនយោបាយណាមួយឡើយ»។ «វាពិតណាស់ថា យើងមានទំនាក់ទំនងជាមួយសហជីពមួយចំនួន ដូចជាសហជីពសេរីកម្មករនៃព្រះរាជាណាចក្រកម្ពុជា ជាដើម ប៉ុន្តែវាមិនមែនមានន័យថា យើងអូសទាញអោយគេបម្រើផលប្រយោជន៍បក្សយើងនោះទេ។ នៅចំពោះមុខហិបឆ្នោត កម្មករសម្រេចចិត្តតែម្នាក់ឯងគត់!»។
គណបក្សសម រង្ស៊ី (PSR) នៅតែត្រូវគេមើលឃើញថាជាមិត្តរបស់កម្មករ និងគ្រូបង្រៀន ដែលនៅក្នុងបាតុកម្មជាច្រើន គណបក្សសម រង្ស៊ី គឺជាអ្នកនាំមុខ។ សម្រាប់ប្រធានគណបក្សសម រង្ស៊ី ការប្រកាន់អាកប្បកិរិយានេះនឹងមិនផ្លាស់ប្តូរឡើយ។ តំណាងរាស្រ្តខេត្តកំពង់ចាមរូបនេះលើកឡើងថា៖ «នៅក្នុងឱកាសនៃទិវាពលកម្មអន្តរជាតិ ១ឧសភា កាលពីពេលកន្លងទៅនេះ យើងបានទទួលកម្មករប្រមាណ១ម៉ឺននាក់ នៅទីស្នាក់ការរបស់យើង។ គោលបំណងសំខាន់មួយរបស់យើង គឺដោះស្រាយប្រាក់ឈ្នួលកម្មករ»។ លោកសន្យាថានឹងធ្វើអោយតម្លៃចំណីអាហារមានការធ្លាក់ចុះ ក្នុងករណីដែលគណបក្សលោកឈ្នះឆ្នោត។
សគកឯមានឈ្មោះថា«ឯករាជ្យ» តែមិនមែនមិនលម្អៀងទេ
លោករ៉ុង ឈុន ប្រធានសមាគមគ្រូបង្រៀនកម្ពុជាឯករាជ្យ (សគកឯ) ប្រកាសជាឱឡារឹកថា«សមាគមលោកមិនស្ថិតក្រោមគណបក្សណាមួយ»ទេ ប៉ុន្តែ«នៅខាងអ្នកប្រជាធិបតេយ្យ»។ «ឧទាហរណ៍ ប្រសិនបើគណបក្សសម រង្ស៊ី ធ្វើសកម្មភាពដើម្បីគ្រូបង្រៀន ប្រយុទ្ធប្រឆាំងនឹងអន្តោប្រវេសន៍ខុសច្បាប់ និងប្រកាន់ជំហរជាអ្នកការពារបូរណភាពទឹកដី ដូច្នេះយើងនឹងអំពាវនាវដល់សមាជិកយើងអោយបោះឆ្នោតជូនគណបក្សនេះ»។ នេះជាសម្តីមួយបង្កប់នូវន័យផ្ទុយរបស់មន្ត្រីរាជការនៃក្រសួងអប់រំ និងជាប្រធានសហភាពសហជីពនៃកម្ពុជា ដែលបញ្ចប់ដោយការសារភាពយ៉ាងច្បាស់ថា គណបក្សប្រជាជនកម្ពុជា និងគណបក្សហ៊្វុនស៊ិនប៉ិច មិនទទួលបានការគាំទ្រពីសហជីពលោកឡើយ។ បើទោះជាលោករ៉ុង ឈុន សារភាពពីសមានចិត្តចំពោះគណបក្សសម រង្ស៊ីក៏ដោយ តែទោះយ៉ាងណាលោកក៏បាននិយាយរាងសម្រាលមកវិញដែរ។ លោកប្រធាន សគកឯ ដែលមានសមាជិកចំនួន ៨ ០០០នាក់ បានសង្កត់ធ្ងន់ថា៖ «ខ្ញុំមានទំនាក់ទំនងល្អជាមួយគណបក្សសម រង្ស៊ី ប៉ុន្តែជាទំនាក់ទំនងផ្ទាល់ខ្លួនប៉ុណ្ណោះ។ ខ្ញុំពិភាក្សាច្រើនជាមួយលោកស្រីមួរ សុខហួ អគ្គលេខាធិការរងគណបក្សសម រង្ស៊ី ថាតើធ្វើយ៉ាងណាជួយដោះស្រាយបញ្ហាសង្គម។ សហជីពខ្ញុំមិនមែនជាសាខារបស់គណបក្សនេះទេ ហើយក៏មិនទទួលការបង្គាប់បញ្ជានយោបាយណាមួយពីអ្នកណាឡើយ»។ លោករ៉ុង ឈុន បន្ថែមទៀតថា លោកនឹងប្រកាសនៅពេលយុទ្ធនាការបោះឆ្នោតថាតើលោកនឹងឈរខាងគណបក្សណា។
សហជីពសេរីកម្មករនៃព្រះរាជាណាចក្រកម្ពុជារក្សាគម្លាតពីគណបក្សសម រង្ស៊ី
ខុសពីលោកជា វិជ្ជា លោកជា មុនី ដែលបានឡើងជំនួសតំណែងប្រធានសហជីពនេះ បន្ទាប់ពីបងប្រុសរបស់លោកត្រូវគេលួចធ្វើឃាតកាលពីខែមករា ឆ្នាំ២០០៤ មិនរក្សាទំនាក់ទំនងពិសេសជាមួយលោកសម រង្ស៊ីទេ។ ក៏ដូចសគកឯ ដែលខ្លួនធ្វើការប្រកៀកស្មាគ្នាដែរ ប្រធានសហជីពសេរី (សមាជិកជាង៨ម៉ឺននាក់) លើកឡើងជាបឋមពីឯករាជ្យភាពរបស់ខ្លួន និងការគាំទ្ររបស់ខ្លួនចំពោះ«គណបក្សប្រជាធិបតេយ្យ»។
«ខ្ញុំមិនស្តាប់បញ្ជាគណបក្សណាមួយទេ ពីព្រោះ សង្គមស៊ីវិលគឺជាស្ថាប័នឯករាជ្យ។ សហជីពខ្ញុំខុសពីសហជីពផ្សេងទៀតដែលដំណើរការទៅបានដោយសារការឧបត្ថម្ភពីគណបក្សនយោបាយ ឬពីរដ្ឋាភិបាល»។ លោកជា មុន្នី អះអាងថា លោកនឹងមិនផ្តល់ការណែនាំណាមួយទៅសមាជិកឡើយ «បើមិនដូច្នោះទេវានឹងរំលោភលើសិទ្ធិអ្នកបោះឆ្នោតរបស់ពួកគេ»។
បាតុកម្មទាំងឡាយស្តីពីការតវ៉ាក្នុងសង្គម ជានិច្ចកាលគឺនាំមុខដោយសកម្មជនរបស់សហជីពឯករាជ្យពីរដ្ឋាភិបាល និងគណបក្សសម រង្ស៊ី។ ការតស៊ូដែលបានបន្សល់ទុកលើខ្លួនលោកជា មុន្នី នូវអនុស្សាវរីយ៍ដ៏ជ្រាលជ្រៅ ប៉ុន្តែលោកអះអាងថា វាមិនអាចធ្វើអោយសហជីពលោកគ្មានឯករាជ្យភាពនោះឡើយ។ លោកគូសបញ្ជាក់ថា៖ «ប្រសិនបើខ្ញុំធ្វើឃោសនាអោយគណបក្សណាមួយ វាគឺក្នុងនាមបុគ្គលប៉ុណ្ណោះ មិនមែនក្នុងនាមSiorc ទេ»។
ថ្ងៃទី៦ ខែមេសា គណបក្សសម រង្ស៊ី ធ្លាប់អំពាវនាវអោយប្រជាពលរដ្ឋជួបជុំគ្នានៅមុខរដ្ឋសភាជាតិ ដើម្បីតវ៉ាប្រឆាំងនឹងអតិផរណាដ៏គំហុកនាពេលបច្ចុប្បន្ន។ អ្នកសង្កេតការណ៍ទាំងឡាយមានការភ្ញាក់ផ្អើលពីអវត្តមានរបស់សហជីពនានាដែលធ្លាប់តែនៅក្បែរលោកសម រង្ស៊ី បើទោះជាការតវ៉ានេះ ពួកគេមានគំនិតដូចគ្នាក៏ដោយ។ ពាក្យចចាមអារ៉ាមក៏បានលេចឮឡើងអំពីការចុះចូលជាយថាហេតុរបស់លោកជា មុនី ជាមួយនឹងគណបក្សប្រជាជនកម្ពុជា។ អតីតគ្រូបង្រៀនរូបនេះបានបដិសេធថា«លោកមិនត្រូវបានគេទិញរឺលក់»នោះទេ។ លោកសារភាពថា គណបក្សប្រជាជនកម្ពុជា ក៏ដូចគណបក្សហ៊្វុនស៊ិនប៉ិច និងគណបក្សសិទ្ធិមនុស្សដែរ ពួកគេព្យាយាមធ្វើយ៉ាងណាទទួលបានការគាំទ្រពីលោក។ ការណ៍នេះមិនបានធ្វើអោយលោកភ្ញាក់ផ្អើលទេ សម្រាប់ថ្ងៃមុនការបោះឆ្នោតដូច្នេះ។ លោកមានប្រសាសន៍ថា៖ «ប្រសិនបើគណបក្សទាំងឡាយចង់បានសន្លឹកឆ្នោត គណបក្សទាំងនោះគួរធ្វើអ្វីដែលល្អទៅ នោះអ្នកបោះឆ្នោតនឹងបោះឆ្នោតគាំទ្រគាត់ហើយ»។
សម្ព័ន្ធសហជីពប្រជាធិបតេយ្យកម្មករកាត់ដេរកម្ពុជាចាំឃ្លាំមើល
អ្នកតំណាងរបស់សម្ព័ន្ធសហជីពប្រជាធិបតេយ្យកម្មករកាត់ដេរកម្ពុជា ដែលមានសមាជិក៥ម៉ឺននាក់ ត្រូវបានទទួលការអញ្ជើញពី«គណបក្សពីរក្នុងចំណោមបក្សទាំងបីដែលមានអាសនៈនៅរដ្ឋសភាជាតិ។ លោកគង់ អាទិត្យ អនុប្រធានសម្ព័ន្ធនេះ រៀបរាប់ថា៖ «គណបក្សទាំងនោះមិនបានសុំយើងចំៗអោយគាំទ្រពួកគេទេ។ ហេតុនេះ វាគ្មានរឿងអីដែលយើងរំលោភលក្ខន្តិកៈរបស់សហជីព ដែលគោរពឯករាជ្យភាពពីនយោបាយនោះឡើយ»។ លោកនិយាយថា លោកនៅតែទន្ទឹងចង់បាន គណបក្សមួយដែលដាក់អាទិភាពលើគេទាក់ទងនឹងការដំឡើងប្រាក់ខែកម្មករ។
សហជីព«ស្និទ្ធនឹងរដ្ឋាភិបាល»
សហជីពមួយចំនួនមិនលាក់បាំងពីការស្ថិតក្រោមឱវាទបក្សកាន់អំណាចទេ។ ក្នុងឱកាសថ្ងៃ១ឧសភា សម្តេចនាយករដ្ឋមន្ត្រីហ៊ុន សែន បានទទួលតំណាងសហជីពចំនួន៨ ០០០នាក់ ដែលបើតាមសម្តីរបស់លោកជាម យៀប «ពួកគេគាំទ្រនយោបាយរបស់រដ្ឋាភិបាល។ បើតាមការរៀបរាប់របស់អ្នកសង្កេតការណ៍ម្នាក់ តំណាងសហជីពទាំងនោះបានត្រឡប់ទៅវិញជាមួយនឹង«ស្រោមសំបុត្រ»ក្នុងដៃ ហើយត្រូវគេបញ្ចុះបញ្ចូលបានសម្រេច។ លោកជួន មុំថុល ប្រធានសហព័ន្ធសហជីពខ្មែរ (សមាជិកកម្មករ៧ម៉ឺននាក់) និងជាទីប្រឹក្សារបស់លោករដ្ឋមន្ត្រីក្រសួងមហាផ្ទៃ អះអាងថា ការណែនាំអោយបោះឆ្នោតជូនគណបក្សប្រជាជនកម្ពុជានឹងធ្វើទៅកាន់ក្រុមកម្មករជាសមាជិក។ លោកពន្យល់ថា៖ «យើងចង់អោយគណបក្សប្រជាជនកម្ពុជាទទួលបានជ័យជម្នះ ពីព្រោះដោយសារតែគណបក្សនេះហើយដែលកម្មករបានទទួលការតំឡើងប្រាក់ឈ្នួល»។ ជាមួយនឹងការអោយអ្វីមួយដែលមើលទៅដូចជាកាដូសម្រាប់ការបោះឆ្នោតនេះ សម្តេចហ៊ុន សែន ហាក់មានប្រៀបលើលោកសម រង្ស៊ី នៅលើផ្នែកកិច្ចការសង្គម។
|
|
α’αααααααααααគណបក្សសម រង្សី ធ្វើសេចក្តីស្នើរច្បាប់ស្តីអំពី ការកំណត់ប្រាក់ខែតែឯង យុទ្ធនាការឃោសនាបោះឆ្នោតតំណាងរាស្ត្រ : គណបក្សនយោ បាយបង្ហាញឆន្ទៈរបស់ខ្លួន អតិផរណានៅកម្ពុជាៈ រដ្ឋាភិបាលចាត់វិធានការណ៍ដោយម៉ត់ចត បាតុកម្មរបស់គណបក្សសម រង្ស៊ី ធ្វើឡើងដោយ ស្ងប់ស្ងាត ឃាតកម្មរបស់ ជា វិជ្ជា
កម្មករមិនខ្វល់នឹងរឿងនយោបាយ
នៅពេលចេញពីរោងចក្រ កម្មករទាំងឡាយដែលត្រូវបានសម្ភាសន៍ អះអាងថាមិនរវល់នឹងនយោបាយទេ ប៉ុន្តែខ្វល់ពីការរស់នៅរបស់ពួកគេច្រើនជាង។ កញ្ញាឃិន សារី អាយុ២៥ឆ្នាំ មកពីខេត្តស្វាយរៀងមកធ្វើការនៅក្នុងរោងចក្រមួយនៅក្រុងភ្នំពេញ បានត្អូញត្អែរថា៖ «ខ្ញុំសំណូមពរអោយគណបក្សដែលឈ្នះឆ្នោតតំឡើងប្រាក់ខែកម្មករ ពីព្រោះសព្វថ្ងៃ ស្អីក៏ថ្លៃដែរ : ថ្លៃផ្ទះ ភ្លើង ទឹក ប្រេង អាហារ...កម្មករលែងមានកម្លាំងធ្វើការងារទៀតហើយ»។
លោកជុន សោភា អាយុ២៩ឆ្នាំ មិនមានមនោសញ្ចេតនាចំពោះនយោបាយទេ បើទោះជាគាត់គឺជាសមាជិកម្នាក់របស់សហព័ន្ធសហជីពឯករាជ្យកម្ពុជា ដែលត្រូវបានគេមើលឃើញថាស្និទ្ធនឹងបក្សកាន់អំណាចក៏ដោយ។ លោកអធិប្បាយថា៖ «ខ្ញុំមិនចូលបក្សនយោបាយណាទេ ប៉ុន្តែខ្ញុំសង្កេតឃើញថា ជានិច្ចកាលគឺគណបក្សសម រង្ស៊ី ដែលតែងតែធ្វើសកម្មភាពដើម្បីប្រយោជន៍កម្មករ»។ លោកបានអំពាវនាវអោយមានការបញ្ចុះតម្លៃទំនិញនានា។ សហការរីរបស់លោកម្នាក់ទៀត បានអោយដឹងថា គាត់នឹងបោះឆ្នោតអោយគណបក្សណាដែលអំពាវនាវអោយមានការតំឡើងប្រាក់ខែកម្មករ និងគ្រូបង្រៀន។ កម្មកររូបនេះនិយាយជាមុនថា៖ «ប៉ុន្តែប្រសិនបើគណបក្សមួយស្នើសុំអោយយើងធ្វើការឃោសនាអោយគេ ខ្ញុំមិនធ្វើទេ!»។
Cet e-mail est protΓ©gΓ© contre les robots collecteurs de mails, votre navigateur doit accepter le Javascript pour le voir
|
