|
ទទួលព័ត៌មានតាមអ៊ីមែល
សូមលោកអ្នកទទួលអត្ថបទថ្មីៗ តាមរយៈទូរសាអេឡិចត្រូនិច
|
| បណ្តាបក្សប្រឆាំងនៅកម្ពុជារួបរួមកម្លាំងគ្នាតទល់នឹង បក្សកាន់អំណាចដ៏គួរអោយញញើតមិនធ្លាប់មាន |
| ααα ដួង សុខា | | | 11-08-2008 | 
ស្រុកតាខ្មៅ (កណ្តាល) ថ្ងៃទី២៧ កក្កដា ២០០៨៖ សម្តេចនាយករដ្ឋមន្រ្តីហ៊ុន សែន ដាក់ដៃលើហិបឆ្នោត បន្ទាប់បានបោះឆ្នោតរួចរាល់ © John Vink / Magnum លទ្ធផលបណ្តោះអាសន្ននៃការបោះឆ្នោតជ្រើសរើសតំណាងរាស្រ្តថ្ងៃ២៧ កក្កដា ដែលត្រូវបានប្រកាសកាលពីថ្ងៃសៅរ៍ ៩សីហា ដោយគណៈកម្មាធិការជាតិរៀបចំការបោះឆ្នោត (គ.ជ.ប) បញ្ជាក់ដោយគ្មានភ្ញាក់ផ្អើលពីជោគជ័យដ៏លើសលុបរបស់បក្សកាន់អំណាច គណបក្សប្រជាជនកម្ពុជារហូតដល់៥៨,១%នៃសម្លេងសរុប គឺនាំមុខគណបក្សសម រង្ស៊ី (២១,៩%) ដែលជាគូប្រជែងសំខាន់របស់ខ្លួនយ៉ាងឆ្ងាយ។ សម្លេងនៅសល់ពីនេះ គឺបានទៅគណបក្សសិទ្ធិមនុស្ស គណបក្សហ៊្វុនស៊ិនប៉ិច និងគណបក្សនរោត្តម រណឫទ្ធិ។ ដោយសារទទួលបានអាសនៈតំណាងរាស្រ្តលើសពី២ភាគ៣ គណបក្សប្រជាជនកម្ពុជាអាចអនុម័តសេចក្តីព្រាងច្បាប់ និងសំណើច្បាប់ផ្សេងៗតាមបំណងប្រាថ្នារបស់ខ្លួន។ ដូច្នេះឥទ្ធិពលរបស់បក្សប្រឆាំងដែលមានសមាជិករីកធំឡើងនោះ គឺត្រូវកាត់បន្ថយមិនធ្លាប់មាន។ គណបក្សសម រង្ស៊ី គណបក្សសិទ្ធិមនុស្ស និងគណបក្សនរោត្តម រណឫទ្ធិ ប្តេជ្ញាថាប្រឆាំងរួមគ្នាទៅនឹងសមរភូមិតែមួយ ដើម្បីធ្វើអោយមានតុល្យភាពអំណាចជាមួយនឹងគណបក្សប្រជាជនកម្ពុជា។ ពួកគេនិយាយឡើងវិញពីគំនិតចងសម្ព័ន្ធភាពដែលពួកគេមិនអាចសម្រេចបង្កើតបានកាលមុនបោះឆ្នោត។
គណបក្សប្រជាជនកម្ពុជាមិនខ្លាំងជាងមុន?
អ្នកសង្កេតការណ៍នយោបាយ និងមេដឹកនាំបក្សប្រឆាំងនានាវាយតម្លៃថា ពិន្ទុដ៏ច្រើនជាប្រវត្តិសាស្រ្តរបស់គណបក្សប្រជាជនកម្ពុជា មិនបានធ្វើអោយមានការផ្លាស់ប្តូរអ្វីឡើយបើមើលទៅលើកម្លាំងនៅក្នុងរដ្ឋសភាជាតិ
។ លោកហង្ស ពុទ្ធា នាយកប្រតិបត្តិរបស់អង្គការសង្កេតការណ៍បោះឆ្នោតនិកហ្វិច កត់សម្គាល់ថា៖ «មិនថាគណបក្សប្រជាជនកម្ពុជាទទួលបាន៧៣អាសនៈដូចក្នុងពេលបោះឆ្នោតអាណត្តិមុន ឬ៩០អាសនៈដូចសព្វថ្ងៃទេ គេនៅតែមានអំណាចដែរ។ បើទោះជាមិនបានសម្លេង២ភាគ៣ក៏ដោយ គេអាចធ្វើអ្វីក៏បានរួចទៅហើយ!»។
លោកកឹម សុខា ស្ថាបនិកគណបក្សសិទ្ធិមនុស្ស អះអាងថា អំណាចរបស់បក្សកាន់អំណាចទៅលើស្ថាប័ននានាគឺមិនចាំបាច់និយាយតវ៉ាទេ។ គណបក្សសិទ្ធិមនុស្សរបស់លោកកឹម សុខា ទទួលបានកៅអីតំណាងរាស្រ្តចំនួន៣កៅអី។ លោកកឹម សុខា ប្រកាសថា៖ «យើងនឹងដំឡើងសម្លេងនៅពេលចាំបាច់ដើម្បីរិះគន់បញ្ហាទាំងឡាយដែលវាមិនត្រឹមត្រូវ ហើយប្រាប់ទៅប្រជាពលរដ្ឋ»។
សម្ព័ន្ធភាពអ្នកប្រឆាំងកំពុងតែកកើត
នៅក្រោយថ្ងៃបោះឆ្នោតជ្រើសរើសតំណាងរាស្រ្ត គណបក្សទាំង៤ ដែលមានអ្នកតំណាងនៅរដ្ឋសភា (លើកលែងតែគណបក្សប្រជាជនកម្ពុជា) បានបង្ហាញខ្លួនដោយឈរកាន់ដៃគ្នា ដើម្បីអំពាវនាវដល់មតិសាធារណជនក្នុងប្រទេសក៏ដូចជាក្រៅប្រទេស«កុំអោយទទួលស្គាល់»លទ្ធផលចេញពីហិបឆ្នោត។ ប៉ុន្តែគណបក្សហ៊្វុនស៊ិនប៉ិច ដែលតំណាងដោយអនុប្រធានទីពីររបស់ខ្លួន គឺព្រះអង្គម្ចាស់ស៊ីសុវត្ថិ សិរីរ័ត្ន ក៏បានដកខ្លួនចេញពីសាមគ្គីភាពអំពិលអំពែកនេះវិញ។ តាមពិតទៅ អំឡុងពេលនោះ គណបក្សប្រជាជនកម្ពុជា ដែលធ្លាប់ជាដៃគូក្នុងរដ្ឋាភិបាលចម្រុះជាមួយហ៊្វុនស៊ិនប៉ិច បានផ្តល់មុខតំណែងជាច្រើនអោយហ៊្វុនស៊ិនប៉ិច ហើយគណបក្សនេះក៏យល់ព្រមទទួល (សូមអានអត្ថបទបន្ថែម)។
គណបក្សបីផ្សេងទៀត ដែលរួមគ្នាបាន៣១អាសនៈ នៅបន្តប្រកៀកស្មាគ្នា ហើយបន្តពិភាក្សាលើការចងសម្ព័ន្ធភាពមួយដែលមិនទាន់កំណត់បែបបទនៅឡើយ។ កាលពីថ្ងៃសុក្រ ៨ សីហា អំឡុងពេលនៃជំនួបមួយនៅទីស្នាក់ការគណបក្សសម រង្ស៊ី ដើម្បីធ្វើសន្និសីទសារព័ត៌មានរួមគ្នា លោកសម រង្ស៊ី បានប្រកាសថា ការដែលពួកគេប្រកាន់ជំហរដូចគ្នា និងគោលបំណងដូចគ្នានេះគឺជាគ្រឹះនៃការចងសម្ព័ន្ធរួចទៅហើយ។
អ្នកតំណាងជាច្រើនរបស់សង្គមស៊ីវិលសុទ្ធតែអះអាងថា ការរួមកម្លាំងគ្នារបស់បក្សប្រឆាំង គឺអាចធ្វើអោយសម្លេងពួកគេកាន់តែខ្លាំងឡើង។ ជាក់ស្តែង សម្រាប់លោកគល់ បញ្ញា នាយកប្រតិបត្តិនៃអង្គការសង្កេតការណ៍ខុមហ្រ្វែល គឺមានតែការប្រឆាំងរួមគ្នាទេទើប«អាចអោយគេធ្វើការគ្រប់គ្រងដ៏ពិតប្រាកដមួយលើការងាររបស់បក្សកាន់អំណាច និងដាក់សម្ពាធលើរដ្ឋាភិបាលអោយមានការប្រយ័ត្នប្រយែងក្នុងការធ្វើការងារ»។
ការរំលាយបញ្ចូលគ្នានៃគណបក្សប្រឆាំងជាបំណងប្រាថ្នាសំខាន់?
នេះមិនមែនជាគំនិតថ្មីទេ ហើយវាតែងតែកើតមាននៅរាល់មុនពេល និងក្រោយពេលបោះឆ្នោតថ្មីម្តងៗ ។ រីឯការបោះឆ្នោតលើកនេះក៏គេចមិនផុតពីក្បួននេះឡើយ។ នៅមុនការចុះបញ្ជីឈ្មោះគណបក្សនៅគ.ជ.ប កិច្ចពិភាក្សាក្នុងន័យបង្រួបបង្រួមគ្នានេះត្រូវបានធ្វើរួចហើយនៅក្នុងចំណោមបក្សប្រឆាំងទាំងឡាយ តែត្រូវបានរាំងស្ទះទាំងអស់។ លោកកឹម សុខា គូសបញ្ជាក់ថា៖ «យើងបានគិតរួបរួមគ្នាទាំងបីគណបក្សនៅមុនពេលបោះឆ្នោត ប៉ុន្តែគណបក្សសម រង្ស៊ី មិនបានផ្តល់ការសម្រេចចិត្ត។ ទោះយ៉ាងណា ក៏វានៅមិនទាន់ហួសពេលដែរ ព្រោះគណបក្សយើងទាំងបីសុទ្ធតែទទួលបានអាសនៈទាំងអស់គ្នា»។
នៅឯគណបក្សនរោត្តម រណឫទ្ធិវិញ ក៏មានបំណងរួបរួមគ្នាដែរ។ លោកយូ ហុកគ្រី អគ្គលេខាធិការគណបក្សនរោត្តម រណឫទ្ធិ រម្លឹកថា៖ «ពួកយើងត្រូវរួបរួមគ្នា។ ព្រះអង្គម្ចាស់រណឫទ្ធិ ប្រធានគណបក្សនរោត្តម រណឫទ្ធិ ធ្លាប់មានបន្ទូលអំពាវនាវកាលពី៧ខែមុនការប្រព្រឹត្តិទៅនៃការបោះឆ្នោត អោយបង្កើតគណបក្សប្រឆាំងដ៏ធំមួយ។ ប៉ុន្តែម្នាក់ៗមិនចង់ទេ ហើយម្នាក់ៗមានមោទនភាពចំពោះជោគជ័យរៀងៗខ្លួន។ ពួកយើងត្រូវចេះទាញយកបទពិសោធន៍ពីរឿងនេះ»។ គណបក្សនេះទទួលបានកៅអីតំណាងរាស្រ្តពីរអាសនៈក្នុងរដ្ឋសភាអាណត្តិថ្មី។
រហូតមកដល់ពេលបច្ចុប្បន្ន បណ្តាបក្សប្រឆាំងមិនដែលយល់ស្របគ្នាដើម្បីនិយាយ និងបង្ហាញសម្លេងតែមួយដូចគ្នាទេ។ គម្រោងចងសម្ព័ន្ធភាពរបស់ពួកគេតែងត្រូវបរាជ័យប្រឈមមុខនឹងយុទ្ធសាស្រ្តដ៏ប៉ិនប្រសប់របស់សម្តេចនាយករដ្ឋមន្ត្រី ហ៊ុន សែន ក្នុងការ«បំបែកបំបាក់ ដើម្បីគ្រប់គ្រងបានល្អ»។
បក្សប្រឆាំងដែលអះអាងខ្លួនឯងថាខ្លាំងជាងមុន
បើតាមការរាប់មើលចំនួនអាសនៈ គណបក្សប្រជាជនកម្ពុជាបូកនិងហ៊្វុនស៊ិនប៉ិចគឺមានតំណាងរាស្រ្តជាប់ឆ្នោត៩២រូប (៩០+២) ធៀបនឹងចំនួន៩៩រូប (គណបក្សប្រជាជនកម្ពុជា៧៣ និងហ៊្វុនស៊ិនប៉ិច២៦)នៅពេលបោះឆ្នោតលើកមុន។ រីឯខាងប្រឆាំងវិញ ដែលរហូតមកដល់ពេលនេះតំណាងដោយគណបក្សសម រង្ស៊ីនោះ បានកើនឡើងពី២៤ដល់៣១អាសនៈ (PSR+PDH+PNR) នេះជាការវិភាគតាមបែបគណិតវិទ្យារបស់បក្សប្រឆាំង។ ដូច្នេះលោកកឹម សុខា រីករាយថា៖ «បក្សប្រឆាំងគឺខ្លាំងជាងមុន»។
លោកយឹម សុវណ្ណ អតីតតំណាងរាស្រ្តគណបក្សសម រង្ស៊ី និងបានជាប់ឆ្នោតជាថ្មីម្តងទៀតនៅមណ្ឌលក្រុងភ្នំពេញ បានខឹងសម្បាប្រឆាំងនឹងគំនិតដែលថាបក្សប្រឆាំងចុះខ្សោយ។ លោកអះអាងថា៖ «គណបក្សសម រង្ស៊ីមិនត្រឹមនៅមានជីវិតរស់ទេ ប៉ុន្តែគឺពង្រឹងទីតាំងរបស់ខ្លួនជាមួយនឹងកៅអីពីរបន្ថែមទៀត។ នេះជាការបង្ហាញដល់កម្ពុជាក៏ដូចដល់ក្រៅប្រទេសថា មានតែគណបក្សយើងមួយគត់ដែលជាគូប្រជែងពិតប្រាកដនឹងគណបក្សប្រជាជនកម្ពុជា»។
លោកយូ ហុកគ្រី បានលើកឡើងពីច្បាប់រដ្ឋធម្មនុញ្ញ ហើយថាបក្សប្រឆាំងមិនមែនជាប់ដៃធ្វើអ្វីមិនកើតនោះទេ។ អ្នកតំណាងរាស្រ្តគណបក្សនរោត្តម រណឫទ្ធិរូបនេះបន្ថែមទៀតថា៖ «ញត្តិបន្ទោសប្រឆាំងនឹងរាជរដ្ឋាភិបាលអាចត្រូវពិភាក្សាដោយរដ្ឋសភា ប្រសិនបើញត្តិនោះត្រូវបានដាក់ឡើងដោយតំណាងរាស្រ្ត៣០រូប។ ចំនួននេះយើងមានគ្រប់! ម្យ៉ាងវិញទៀត រដ្ឋសភាអាចអញ្ជើញឥស្សរជនរដ្ឋាភិបាលមកក្នុងកិច្ចប្រជុំរដ្ឋសភាដើម្បីឆ្លើយសំណួរ តាមការស្នើសុំយ៉ាងតិចពីសមាជិក១ភាគ១០របស់ខ្លួន ពោលគឺតំណាងរាស្រ្តចំនួន១២រូប»។
លោកគល់ បញ្ញា យល់ស្របនឹងការវិភាគនេះ ហើយជឿជាក់ថា តាមរយៈការបូកសម្លេងពួកគេបញ្ចូលគ្នា គណបក្សប្រឆាំងនឹងអាចធ្វើញត្តិដាក់សម្ពាធនេះ។ |
|
α’αααααααααααគណបក្សហ៊្វុនស៊ិនប៉ិចចុះចូលជាមួយគណបក្សប្រជាជនកម្ពុជា
នៅថ្ងៃ៥ សីហា សម្តេចនាយករដ្ឋមន្ត្រី ហ៊ុន សែន បានសន្យាផ្តល់មុខតំណែងមន្ត្រីជាន់ខ្ពស់ចំនួន៥កន្លែងអោយគណបក្សហ៊្វុនស៊ិនប៉ិច នៅក្នុងរដ្ឋាភិបាលអាណត្តិក្រោយ រួមមានលោកញឹក ប៊ុនឆៃ អគ្គលេខាធិការគណបក្សហ៊្វុនស៊ិនប៉ិច លោកនុត សុខុម រដ្ឋមន្ត្រីក្រសួងសុខាភិបាល លោកកុល ផេង រដ្ឋមន្ត្រីក្រសួងអប់រំ លោកវេង សេរីវុឌ្ឍ រដ្ឋមន្ត្រីក្រសួងវប្បធម៌ និងលោកស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន។ មុខតំណែងថ្នាក់ទាបបំផុតផ្សេងៗទៀត ក៏នឹងត្រូវផ្តល់អោយសមាជិកមួយចំនួនរបស់បក្សជាអតីតដៃគូក្នុងរដ្ឋាភិបាលចម្រុះជាមួយគ្នាផងដែរ។ ភ្លាមៗ ការផ្តល់មុខតំណែងទាំងនេះអាចបញ្ចុះបញ្ចូលគណបក្សហ៊្វុនស៊ិនប៉ិចមិនអោយបន្តកិច្ចពិភាក្សាជាមួយគណបក្សប្រឆាំងផ្សេងទៀត ដើម្បីបង្កើតសម្ព័ន្ធភាពមួយ។
តំណាងរាស្រ្តបក្សប្រឆាំងគំរាមធ្វើពហិការសម័យប្រជុំសភាលើកដំបូង
អ្នកទទួលខុសត្រូវរបស់គណបក្សប្រឆាំងទាំងបី គឺគណបក្សសម រង្ស៊ី គណបក្សសិទ្ធិមនុស្ស និងគណបក្សនរោត្តម រណឫទ្ធិ បានអះអាងជាថ្មីម្តងទៀត នៅថ្ងៃសុក្រ ៨ សីហា ពីឆន្ទៈរបស់ពួកគេក្នុងការធ្វើពហិការកិច្ចប្រជុំលើកទី១របស់រដ្ឋសភាជាតិ ដែលត្រូវបើកធ្វើឡើងរយៈពេល៦០ថ្ងៃក្រោយថ្ងៃបោះឆ្នោត ក្រោមការកោះហៅរបស់ព្រះមហាក្សត្រ។ ពួកគេអះអាងផងដែរថា ពួកគេមិនបោះបង់ចោលអាសនៈដ៏ច្រើនរបស់ពួកគេនោះឡើយ បន្ទាប់ពីសម្តេចនាយករដ្ឋមន្ត្រី ហ៊ុន សែន បានព្រមានលោកសម រង្ស៊ី នៅថ្ងៃទី១ សីហា ថាការធ្វើពហិការណាមួយនោះ អាចនឹងធ្វើអោយលោកបាត់បង់អាសនៈ «ដែលត្រូវយកទៅចែកអោយគណបក្សផ្សេងទៀត»។
នៅមុនការប្រកាសលទ្ធផលស្ថាពរនៃការបោះឆ្នោត បក្សប្រឆាំងប្រឹងប្រែងយ៉ាងខ្លាំងក្នុងការជំទាស់នឹងលទ្ធផលនេះ ហើយអំពាវនាវអោយមានការរៀបចំការបោះឆ្នោតម្តងទៀត ព្រោះគណបក្សនេះវាយតម្លៃថា អ្នកបោះឆ្នោតជិត១លាននាក់មិនអាចបោះឆ្នោតបាន។ លោកកឹម សុខា សង្កត់ធ្ងន់ថា៖ «ជាដំបូងយើងត្រូវដោះស្រាយបញ្ហាមិនប្រក្រតីជាច្រើនសិន ដែលនឹងយកទៅប្រើសម្រាប់ការបោះឆ្នោតលើកក្រោយ។ រឿងនេះក៏មិនមែនបានន័យថា យើងបោះបង់អាសនៈនៅរដ្ឋសភាដែរ»។ ក្រុមប្រឹក្សាធម្មនុញ្ញ អាចនឹងត្រូវស្នើអោយបកស្រាយមាត្រា១១៨ច្បាប់ស្តីពីការបោះឆ្នោតតំណាងរាស្រ្ត ទាក់ទងនឹងឥទ្ធិពលនៃការមិនចូលរួមពិធីផឹកទឹកសម្បថរបស់អ្នកតំណាងរាស្រ្ត។
Cet e-mail est protΓ©gΓ© contre les robots collecteurs de mails, votre navigateur doit accepter le Javascript pour le voir
|
