|
ទទួលព័ត៌មានតាមអីមែល
សូមលោកអ្នកទទួលអត្ថបទថ្មីៗ តាមរយៈទូរសាអេឡិចត្រូនិច
|
| គណបក្សនយោបាយកម្ពុជាយកចិត្តទុកដាក់នឹងយុវវ័យ |
| ααα ដួង សុខា | | | 30-06-2008 |  តាខ្មៅ (កណ្តាល) ថ្ងៃទី២៨ មិថុនា ២០០៨៖
តំណាងចលនាយុវជននៃបណ្តាគណបក្សនយោបាយសំខាន់ៗនៅខេត្តកណ្តាល
បានចូលរួមនៅក្នុងកិច្ចពិភាក្សាមួយដែលដឹកនាំដោយអ្នកសម្រប សម្រួលនៃវិទ្យាស្ថានសាធារណៈរដ្ឋអន្តរជាតិ (រូបទីមួយខាងឆ្វេង) © វណ្ឌី រតនា អំឡុងពេលយុទ្ធនាការឃោសនាបោះឆ្នោត គណបក្សនយោបាយកម្ពុជាទាំងឡាយបានកែនប្រមូលក្រុមយុវជនអោយគាំទ្រគោលនយោបាយរបស់ខ្លួន ហើយធ្វើអោយក្រុមយុវជនទាំងនេះ ចូលរួមសកម្មភាពជាមួយពួកគេ។ ពួកយុវជនទាំងនេះគឺជាមេដឹកនាំប្រកបដោយសក្តានុពលនាពេលអនាគត។ ជានិច្ចកាល យុវជនកាន់ទង់វ័យក្មេងទាំងនេះគឺជាអ្នកធ្វើការដោយស្ម័គ្រចិត្ត។ ពួកគេដឹងខ្លួនថា ពួកគេគឺជាអ្នកជំនាញផ្នែកយុទ្ធសាស្រ្តភស្តុភាដែលដាក់ពង្រាយនៅគ្រប់ច្រកល្ហកទូទាំងប្រទេស។ ពួកគេគឺជាអ្នករៀបចំការធ្វើដំណើររបស់«មេដឹកនាំនយោបាយធំៗ»ចុះទៅមូលដ្ឋាន ហើយរៀបចំទំនាក់ទំនងរបស់គណបក្សជាមួយប្រជាពលរដ្ឋ។ ពួកគេជាមនុស្សពេញកម្លាំង ហើយជាយុវជនពោរពេញដោយជំនឿចិត្ត អាចបញ្ចុះបញ្ចូលជនរួមជាតិឯទៀតដែលល្បីថាមិនចាប់អារម្មណ៍នឹងរឿងនយោបាយបានល្អបំផុត។ យោងតាមលោកទេព នីថា អគ្គលេខាធិការគណៈកម្មាធិការជាតិរៀបចំការបោះឆ្នោត មនុស្សពេញវ័យអាយុពី១៨-៣៥ឆ្នាំមានចំនួនតែ ២៦៦ ៤១៧ នាក់ប៉ុណ្ណោះដែលបានចុះឈ្មោះក្នុងបញ្ជីបោះឆ្នោត (ស្មើនឹង ៣,២៨% នៃអ្នកបោះឆ្នោត) សម្រាប់ការបោះឆ្នោតតំណាងរាស្រ្តថ្ងៃ២៧ កក្កដាខាងមុខ។ នេះគឺជាជំនួបជាមួយយុវសកម្មជនទាំងនេះ និងអ្នកតំណាងរបស់ពួកគេ ដែលមិនមែនមានអាយុស្មើគ្នាជានិច្ចនោះទេ...
ចលនាយុវជនពីគណបក្សមួយទៅមួយគឺមានបេសកកម្មដូចគ្នា
ស្វែងរកថវិកាពីប្រជាជននៅកម្ពុជា ស្វែងរកអ្នកគាំទ្រគណបក្ស ហើយផ្សព្វផ្សាយប្រាប់ពួកគេ ជាពិសេសគឺអ្នកបោះឆ្នោតក្មេងៗ អំពីគំនិតដែលគណបក្សខ្លួនការពារ ប៉ុន្តែក៏ត្រូវចាំស្តាប់បញ្ហាពួកគេវិញដែរ បញ្ចូលពួកគេទៅក្នុងវប្បធម៌នយោបាយនិងគោលនយោបាយរបស់បក្ស ដឹកនាំក្បួនដង្ហែរ... ។សរុបអោយខ្លីទៅ ចលនារបស់យុវវ័យគឺប្រៀបដូចជា«ស្លាបស្តាំរបស់បក្ស»។ នេះជាការសរុបរបស់លោកសាន់ សៀកគីន អគ្គប្រតិភូរបស់«ចលនាយុវជនសម រង្ស៊ី»។
នៅឯគណបក្សសម រង្ស៊ី គេសង្កត់ធ្ងន់លើការបណ្តុះបណ្តាលយុវសកម្មជន។ ការបណ្តុះបណ្តាលនេះរួមមានការហាត់រៀនផ្នែកព័ត៌មានវិទ្យាក៏ដូចជាការរៀនអំពីក្បួនអនាម័យបឋម អាកប្បកិរិយាជាប្រជាពលរដ្ឋ និងជាអ្នកទទួលខុសត្រូវ (កុំជក់គ្រឿងញៀន កុំលេងល្បែងស៊ីសង កុំប្រើអំពើហិង្សា...)។ នៅឯគណបក្សសិទ្ធិមនុស្ស លោកម៉ៅ វាសនា ប្រធានចលនាយុវជនដើម្បីសិទ្ធិមមនុស្សរបស់គណបក្ស ពន្យល់ថា គេផ្តោតការយកចិត្តទុកដាក់លើការពិភាក្សាជុំវិញគោលការណ៍នៃលទ្ធិប្រជាធិបតេយ្យ។ គេលើកទឹកចិត្តយុវជនអោយបញ្ចេញមតិ និងទៅបោះឆ្នោត។
ចំណែកគណបក្សប្រជាជនកម្ពុជាវិញ គេចង់អោយចលនាយុវជនរបស់បក្សខ្លួនរម្លឹកប្រាប់ជនជាតិកម្ពុជាអំពីសមិទ្ធិផលជាច្រើនរបស់បក្សកាន់អំណាច តាមរយៈល្បែងប្រៀបធៀបដ៏សាមញ្ញជាមួយសកម្មភាពរបស់គណបក្សផ្សេង។ នេះគឺជាការគូសបញ្ជាក់របស់លោកខួច វែងស្រ៊ុន សមាជិកម្នាក់របស់ចលនាយុវជនគណបក្សប្រជាជនកម្ពុជា ដែលមានឆន្ទៈបញ្ចុះបញ្ចូលពួកគេអោយគាំទ្ររដ្ឋាភិបាលបច្ចុប្បន្ន។ លោកមុត ចន្ថា អ្នកនាំពាក្យរបស់គណបក្សនរោត្តម រណឫទ្ធិ ពន្យល់ថា «ចលនាយុវជនរាជានិយម»គឺមានគោលដៅប្រមូលផ្តុំមេដឹកនាំរបស់បក្សនាពេលអនាគត បើទោះជាលោកទទួលស្គាល់ថា គណបក្សនរោត្តម រណឫទ្ធិ ជួបបញ្ហាលំបាកក្នុងការជ្រើសរើសអ្នកមានអាយុក្រោម៣០ឆ្នាំក៏ដោយ។ គណបក្សហ៊្វុនស៊ិនប៉ិច មិនសូវជានិយាយច្រើនពាក់ព័ន្ធនឹងបញ្ហានេះទេ។ លោកទៀ ថេន ប្រធានចលនាយុវជនរបស់គណបក្សហ៊្វុនស៊ិនប៉ិច ដែលមានវ័យ៥០ឆ្នាំ មានប្រសាសន៍ដោយខ្លីថា ចលនាយុវជនរបស់គណបក្សមានបេសកកម្មធ្វើអោយ«យុវជនស្រឡាញ់គ្នាទៅវិញទៅមក»។
អាជីពនយោបាយធ្វើអោយចាប់អារម្មណ៍
លោកម៉ៅ វាសនា មកពីគណបក្សសិទ្ធិមនុស្ស ត្រូវបានតែងតាំងអោយធ្វើជាមេដឹកនាំចលនាយុវជនចាប់តាំងពីគណបក្សនេះចាប់បដិសន្ធិនៅខែកក្កដា ឆ្នាំ២០០៧មកម្ល៉េះ។ លោកបានទទួលការតែងតាំងផ្ទាល់ពីលោកកឹម សុខា ប្រធានបក្សតែម្តង។ ក្នុងវ័យ៣៥ឆ្នាំ លោកធ្លាប់បានធ្វើជាថ្នាក់ដឹកនាំរបស់ចលនានិស្សិតដើម្បីលទ្ធិប្រជាធិបតេយ្យ ដែលបើតាមរូបលោក ចលនានេះមិនស្ថិតក្រោមការគ្រប់គ្រងរបស់គណបក្សនយោបាយណាមួយទេ ហើយវាមានទិសដៅធ្វើការរិះគន់ពីការរំលោភទឹកដី អយុត្តិធម៌សង្គម និងអតិផរណា...។ លោកមិនរួញរានឹងលាឈប់ពីមុខតំណែងរបស់លោក ដើម្បីចូលអាជីពនយោបាយនោះឡើយ។ លោកបានចូលរួមជាមួយគណបក្សសិទ្ធិមនុស្ស«ដោយសារគណបក្សនេះមានស្មារតីប្រជាធិបតេយ្យ (ប្រធានបក្សមានសិទ្ធិធ្វើនាយករដ្ឋមន្ត្រីតែពីរអាណត្តិ) ហើយមិនប្រកាន់បក្សពួកនិយម»។ ដោយទទួលបានបរិញ្ញាប័ត្រពីពុទ្ធិកៈសាកលវិទ្យាល័យភ្នំពេញ លោកបានប្រកាសយ៉ាងក្លាហានថា : «ខ្ញុំចង់ក្លាយជាមេដឹកនាំម្នាក់របស់គណបក្សសិទ្ធិមនុស្ស ហើយបានមុខតំណែងក្នុងរដ្ឋាភិបាលដើម្បីកែទម្រង់ប្រព័ន្ធយុត្តិធម៌ និងដោះស្រាយបញ្ហាព្រំដែន»។ ហើយជាមួយនឹងភាពជឿជាក់ដដែល លោកប្រកាសថា«មានសុទិដ្ឋិនិយម»ចំពោះអនាគតជាអ្នកនយោបាយរបស់លោក។
លោកសាន់ សៀកគីន មកពីគណបក្សសម រង្ស៊ី មានអាយុ២៨ឆ្នាំ គឺក្មេងជាងលោកម៉ៅ វាសនា។ លោកជឿជាក់ខ្លាំងណាស់ដែរចំពោះផ្កាយជីវិតនយោបាយរបស់លោក។ លោកត្រូវបានជ្រើសរើសជាអគ្គប្រតិភូរបស់ចលនាយុវជនសម រង្ស៊ី នៅខែមីនា ឆ្នាំ២០០៨។ លោកមើលឃើញខ្លួនឯងរួចទៅហើយថាជាអ្នកបន្តវេនដ៏សក្តិសមពីមនុស្សចាស់ៗនៅក្នុងបក្ស។ លោកមានបំណងស្វែងរកមុខតំណែងប្រធានក្រុមប្រឹក្សាឃុំសង្កាត់ ឬជាតំណាងរាស្រ្ត។ លោកសាន់ សៀកគីន កំពុងសិក្សាយកសញ្ញាប័ត្រអនុបណ្ឌិតផ្នែកទំនាក់ទំនងអន្តរជាតិនៅសាកលវិទ្យាល័យបញ្ញាសាស្រ្ត ហើយបានចូលរួមជាមួយគណបក្សសម រង្ស៊ី នៅឆ្នាំ១៩៩៩ នៅពេលដែលអ្នកខេត្តកំពង់ធំរូបនេះឡើងមកទីក្រុងភ្នំពេញ ដើម្បីបន្តការសិក្សា។ «ជីវិតរបស់ខ្ញុំបានផ្លាស់ប្តូរយ៉ាងច្រើន ចាប់តាំងពីពេលខ្ញុំបានចូលក្នុងនយោបាយ។ ខ្ញុំបានពង្រឹងសមត្ថភាពខ្លួនឯង ហើយខ្ញុំមានភាពចាស់ទុំឡើង»។ លោករង់ចាំតែពេលវេលាដើម្បីឡើងឋានៈប៉ុណ្ណោះ។
នៅឯគណបក្សហ៊្វុនស៊ិនប៉ិច និងនៅគណបក្សនរោត្តម រណឫទ្ធិ សារគឺមានលក្ខណៈច្បាស់ក្រឡែត : យុវជនត្រូវគេបានចាត់ទុកថាជាអ្នកបន្តវេនរបស់គណបក្ស ហើយពួកគេត្រូវត្រៀមខ្លួនដឹកនាំវានៅថ្ងៃណាមួយ។ លោកទៀ ថេន មកពីគណបក្សហ៊្វុនស៊ិនប៉ិច ពន្យល់ថា គណបក្សលោកជំរុញអោយយុវជនឈរឈ្មោះក្នុងការបោះឆ្នោតឃុំ-សង្កាត់ មុននឹងបានឡើងឋានៈ។
តើយុវជនដែលត្រូវនយោបាយអូសទាញទាំងនេះជាអ្នកណា?
លោកខួច វែងស្រ៊ុន អាយុ២២ឆ្នាំ បានចូលក្នុងចលនាយុវជនរបស់គណបក្សប្រជាជនកម្ពុជា នៅឆ្នាំ២០០៧។ យុវជនរូបនេះបានទទួលស្វាគមន៍ពួកយើងនៅក្នុងផ្ទះវីឡាល្មមមួយនៅទីក្រុងភ្នំពេញ។ លោកបញ្ជាក់ថា វាជាផ្ទះរបស់ពូលោក ដែលជាអភិបាលខ័ណ្ឌមានជ័យ។ ជានិស្សិតឆ្នាំទី៥នៅវិទ្យាស្ថានពហុបច្ចេកវិទ្យាកុសមៈ លោកបានអះអាងថា លោកចាប់អារម្មណ៍នឹងគណបក្សកាន់អំណាចតាំងពីនៅរៀនអនុវិទ្យាល័យម្ល៉េះ។ ឳពុកម្តាយរបស់លោកចូលជាសមាជិកបក្សប្រជាជនកម្ពុជាទាំងពីរនាក់ តែលោកអះអាងថា លោកមិនមែនចូលគណបក្សនេះដោយសារឳពុកម្តាយសុំទេ។ ចូរយើងកុំភ្លេចថា គណបក្សប្រជាជនកម្ពុជាបានរំដោះប្រទេសកម្ពុជាពីរបបប៉ុល ពត បានអភិវឌ្ឍហេដ្ឋារចនាសម្ព័ន្ធប្រទេស បានធ្វើអោយមានកំណើនសេដ្ឋកិច្ច បានកាត់បន្ថយបទឧក្រិដ្ឋកម្ម...។ ហើយខ្ញុំពេញចិត្តនឹងនយោបាយ«ឈ្នះ-ឈ្នះ»របស់សម្តេចនាយករដ្ឋមន្រ្តីហ៊ុន សែន»។ មេរៀនដែលសកម្មជនវ័យក្មេងរូបនេះបានរៀន គឺសម្រាប់ធ្វើជាវិស្វករសំណង់ស៊ីវិល ប៉ុន្តែលោកយល់ឃើញថា បទពិសោធន៍ផ្នែកនយោបាយនេះគឺជាមធ្យោបាយក្នុងការប្រមូលយកចំណេះដឹងកាន់តែច្រើនទៀត។
នៅឯគណបក្សនរោត្តម រណឫទ្ធិ លោកមុត ចន្ថា អាយុ៤០ឆ្នាំ ពន្យល់ថា សកម្មជនក្មេងៗរបស់បក្សលោកគឺចេញមកពីមជ្ឈដ្ឋាននិស្សិតសាកលវិទ្យាល័យ ហើយ«មិនមាន មិនក្រ»។ លោកទៀ ថេន អោយដឹងថា សកម្មជនក្មេងៗរបស់ហ៊្វុនស៊ិនប៉ិចជាបឋម គឺជា«កូនរបស់សមាជិកបក្ស» មិត្តភក្តិរបស់កូនសមាជិកទាំងនោះ។ លោកបន្ថែមថា៖ «ពី៧ទៅ៨%ក្នុងចំណោមនោះគឺមកពីគ្រួសារមធ្យម»។
គណបក្សសិទ្ធិមនុស្សអះអាងថា នៅក្នុងជួរសមាជិកចលនាយុវជនរបស់ខ្លួន គឺ«មានសិស្ស និងនិស្សិតជាច្រើន ក៏ដូចជាបុគ្គលិកក្មេងៗនៅតាមបណ្តាអង្គការ និងក្រុមហ៊ុនឯកជនផងដែរ» ហើយភាគច្រើនគឺមានដើមកំណើតមកពីខេត្ត និងគ្រួសារកសិករ។ គឺដូចករណីលោកម៉ៅ វាសនា ប្រធានចលនានេះជាដើម។
គណបក្សសម រង្ស៊ី ពង្រឹងកម្លាំងរបស់ខ្លួនជាមួយកូនៗសមាជិកបក្ស។ លោកសាន់ សៀកគីន អគ្គប្រតិភូចលនាយុវជនរបស់គណបក្សសម រង្ស៊ី បានរម្លឹកថា ឧទាហរណ៍ ឳពុកម្តាយគឺជាជនរងគ្រោះនៃការរឹបអូសដីធ្លី ហើយក៏ចូលរួមជាមួយគណបក្សសម រង្ស៊ី។ យុវជនផ្សេងទៀតត្រូវបានទាក់ទាញដោយគោលគំនិតរបស់គណបក្សប្រឆាំង ដែលសន្យាផ្តល់ការងារអោយពួកគេប្រសិនបើខ្លួនឈ្នះឆ្នោត។ បើយោងតាមរូបលោក សមាជិកភាគច្រើននៃចលនានេះគឺចេញពីមជ្ឈដ្ឋានក្រីក្រ ប៉ុន្តែ«គ្រប់គ្នាចេះយ៉ាងហោចក៏អានអក្សរដែរ»។ ប្រធានចលនាយុវជនរូបនេះរៀបរាប់ថា លោកបានលង់ក្នុងអន្លង់ស្នេហ៍របស់គណបក្សនេះ តាមរយៈការស្តាប់មេដឹកនាំបក្សលោក សម រង្ស៊ីតាមរលកធាតុអាកាស។ ប៉ុន្តែ ឳពុករបស់លោកមិនមែនថាគ្មានឥទ្ធិពលអ្វីពាក់ព័ន្ធនឹងការចូលរួមរបស់លោកក្នុងវិស័យនយោបាយនោះទេ។ ឳពុកលោកតែងតែសរសើរពី«សេចក្តីក្លាហានរបស់លោកសម រង្ស៊ី» គឺតាំងតែពីលោកសម រង្ស៊ី នៅធ្វើជារដ្ឋមន្ត្រីក្រសួងហិរញ្ញវត្ថុ និងមិនទាន់បង្កើតគណបក្សខ្លួនឯងម្ល៉េះ។ លោកសាន់ សៀកគីន បង្ហើបអោយដឹងទៀតថា ៖ «សូម្បីតែគ្រូៗរបស់ខ្ញុំក៏បានកោតសរសើររូបគាត់នៅក្នុងថ្នាក់រៀនដែរ...»។ លោករៀបរាប់ដូច្នេះប្រៀបដូចជាចង់បង្ហាញថា លោកមិនអាចជៀសផុតមិនចូលរួមក្នុងបក្សនេះឡើយ ក្រោមកត្តាដ៏ច្រើនបែបនេះ។
យុវជនគឺជាកម្លាំងថ្មីរបស់គណបក្ស
លោកមុត ចន្ថា អ្នកនាំពាក្យរបស់គណបក្សនរោត្តម រណឫទ្ធិ សម្តែងក្តីរីករាយថា ចលនាយុវជននៅក្នុងគណបក្សមានជោគជ័យយ៉ាងខ្លាំង។ «គណបក្សនីមួយៗគឺមានចលនាយុវជនមួយ។ ប៉ុន្តែ រហូតមកដល់ពេលនេះ គណបក្សជាច្រើនប្រើធនធានមនុស្សនេះតែនៅពេលបោះឆ្នោតប៉ុណ្ណោះ គឺនៅពេលណាពួកគេត្រូវការជំនួយបន្ថែម»។ ផ្នត់គំនិតមានការផ្លាស់ប្តូរ ហើយយុវជនចាប់ផ្តើមត្រូវគេមើលឃើញថាជាកម្លាំងបោះឆ្នោតមួយមិនអាចមើលស្រាលបានឡើយ។
|
|
α’ααααααααααα-យុទ្ធនាការឃោសនាបោះឆ្នោតថ្ងៃទីមួយប្រព្រឹត្ត ដោយរលូន (២៦-០៦-២០០៨) -គណបក្សប្រឆាំងនៅតែស្ថិតក្រោមការគាបសង្កត់ (២៣-០៦-២០០៨)
ចលនាយុវជនរបស់គណបក្សនយោបាយ
-ចលនាយុវជនសម រង្ស៊ី មានសមាជិកចំនួន ១៨១ ០០០ នាក់នៅក្នុង១៧ខេត្ត-ក្រុង អាយុពី១៦ ដល់៣០ឆ្នាំ។
-ចលនាយុវជនរបស់គណបក្សសិទ្ធិមនុស្ស មានសមាជិកជាង ២ ០០០ នាក់នៅក្នុង២៤ខេត្ត-ក្រុង អាយុពី១៥ឆ្នាំដល់៣០ឆ្នាំ។
-ចលនាយុវជនរាជានិយមរបស់គណបក្សនរោត្តម រណឫទ្ធិ មានសមាជិកទាំង២៤ខេត្ត-ក្រុង អាយុពី១៨ឆ្នាំដល់៣៥ឆ្នាំ មិនទាន់វាយតម្លៃពីចំនួនសមាជិករបស់ខ្លួននៅឡើយទេ
-ចលនាយុវជនរបស់គណបក្សប្រជាជនកម្ពុជា មិនបានផ្តល់តួលេខនៃសមាជិករបស់ខ្លួន។ -ចលនាយុវជនរបស់គណបក្សហ្វ៊ុនស៊ិនប៉ិចមានសមាជិកពី៧០០០ទៅ៨០០០នាក់ ទាំង២៤ខេត្ត-ក្រុង អាយុពី១៨ ដល់៣០ឆ្នាំ។
Cet e-mail est protΓ©gΓ© contre les robots collecteurs de mails, votre navigateur doit accepter le Javascript pour le voir
|
