|
ទទួលព័ត៌មានតាមអីមែល
សូមលោកអ្នកទទួលអត្ថបទថ្មីៗ តាមរយៈទូរសាអេឡិចត្រូនិច
|
| យុទ្ធនាការឃោសនាបោះឆ្នោតតំណាងរាស្រ្តនៅកម្ពុជា : សម័យកាលផ្សេង ទម្លាប់ផ្សេង |
| ααα ដួង សុខា | | | 07-07-2008 | | ចាប់តាំងពីថ្ងៃទី២៦ ខែមិថុនាមក គណបក្សនយោបាយបានចាប់ផ្តើមធ្វើយុទ្ធនាការឃោសនាបោះឆ្នោតតំណាងរាស្រ្តទៅតាមចង្វាក់ និងមធ្យោបាយរបស់ពួកគេ តាមរយៈការចាក់មេក្រូខ្សោយៗ និងការបិទខិត្តប័ណ្ណយ៉ាងគគ្រឹងគគ្រែងមិនធ្លាប់មាន។ សកម្មជននយោបាយ ក៏ដូចជាអ្នកសង្កេតការណ៍យល់ស្របគ្នាវាយតម្លៃថា បរិយាកាសបោះឆ្នោតលើកនេះល្អប្រសើរជាងការបោះឆ្នោតជ្រើសរើសតំណាងរាស្រ្តឆ្នាំ២០០៣។ ការបំភិតបំភ័យ និងអំពើហិង្សាមានតិចតួច ការប្រើប្រាស់អាវុធរវាងគណបក្សមិនសូវមាន...។ ប៉ុន្តែ ភាពស្ងប់ស្ងាត់នេះមិនអាចបិទបាំងភាពមិនប្រក្រតីមួយចំនួន ដែលរហូតមកដល់ពេលនេះមិនត្រូវបានគេដាក់ទណ្ឌកម្ម។ ខាងក្រោមនេះគឺជាការពិនិត្យស្ថានការណ៍យុទ្ធនាការឃោសនាសម្រាប់ការបោះឆ្នោតឆ្នាំនេះ។
យុទ្ធនាការឃោសនាមានលក្ខណៈអហិង្សាជាងមុន
គណៈកម្មាធិការដើម្បីការបោះឆ្នោតដោយសេរី និងយុត្តិធម៌នៅកម្ពុជា (ខុមហ្វ្រែល ) ដែលជាអង្គការអង្កេតការណ៍បោះឆ្នោតក្នុងស្រុកដ៏សំខាន់មួយ បានលើកឡើងថា រហូតមកដល់ថ្ងៃនេះ មានករណីគំរាមកំហែងទៅលើសកម្មជននយោបាយចំនួន១៦ករណី ធៀបនឹង២៦ករណីនៅក្នុងយុទ្ធនាការឃោសនារកសម្លេងឆ្នោតឆ្នាំ២០០៣។ កាលពីឆ្នាំ២០០៣ មានករណីឃាតកម្មចំនួន៨ (មួយករណីកើតលើសមាជិកគណបក្សកាន់អំណាច គណបក្សប្រជាជនកម្ពុជា មួយករណីលើគណបក្សហ៊្វុនស៊ិនប៉ិច និង៦ករណីទៀតកើតលើគណបក្សប្រឆាំង សម រង្ស៊ី ។
ថ្ងៃទី២៧ ខែមិថុនា អនុប្រធានភូមិជ្រៃសុខុម ខេត្តកំពង់ចាម មកពីគណបក្សប្រជាជនកម្ពុជា ត្រូវមនុស្សមិនស្គាល់មុខបីនាក់លួចវាយ។ ដោយសារអ្នកវាយមិនត្រូវបានគេចាប់ខ្លួន គ្មាននរណាម្នាក់សន្និដ្ឋានថាបទឧក្រិដ្ឋនេះមានចរិតនយោបាយនោះទេ។
លោកគល់ បញ្ញា ប្រធានអង្គការខុមហ្វ្រែល បង្ហាញការរីករាយថា៖ «យើងបានជួបអ្នកទទួលខុសត្រូវគណបក្សនយោបាយទាំងឡាយ។ ពួកគេវាយតម្លៃថា បរិយាកាសឃោសនាល្អប្រសើរជាងមុន។ សកម្មជនអាចចូលរួមដោយសេរីក្នុងជំនួបនយោបាយ និងក្បួនដង្ហែរ ដោយគ្មានភ័យខ្លាចឡើយ»។ ប៉ុន្តែ លោកមិនលាក់លៀមទេថា នយោបាយបញ្ចុះបញ្ចូលធ្វើឡើងដោយគណបក្សមួយចំនួន ដើម្បីអោយប្រជាពលរដ្ឋចុះចូលជាមួយពួកគេនៅតែមាន។
លោក ទូន មិន ប្រធានទីប្រឹក្សាគណបក្សសម រង្ស៊ី នៅស្រុកភ្នំស្រួច ខេត្តកំពង់ស្ពឺ បានចោទប្រកាន់អ្នកទទួលខុសត្រូវកងពលលេខ៣១ថាមានបំណងទិញទឹកចិត្តលោក«ជាច្រើនលើក» ដើម្បីអោយលោកចុះចូលជាមួយគណបក្សប្រជាជនកម្ពុជា។ លោកបានរិះគន់ថា គេបានផ្តល់លុយអោយរូបលោកពីបួនទៅប្រាំពាន់ដុល្លារ រួមទាំងសន្យាផ្តល់មុខតំណែងនៅក្នុងជួរកងទ័ពទៀតផង។ ការចោទប្រកាន់នេះត្រូវបានកងពលលេខ៣១បដិសេធដាច់អហង្ការ។
សង្រ្គាមពាក្យសម្តីស្ទើរតែគ្មាន
គណបក្សនយោបាយសំខាន់ៗដែលចូលរួមក្នុងការប្រកួតប្រជែងសុទ្ធតែទទួលស្គាល់ថា : ពេលវេលានេះលែងអាចធ្វើអោយគូប្រកួតប្រជែងទាំងឡាយមានការភ័យខ្លាចនោះឡើយ។
លោកអ៊ូ ច័ន្ទរ័ត្ន អគ្គលេខាធិការគណបក្សសិទ្ធិមនុស្ស បានពន្យល់ថា៖ «បើទោះជាមានការប៉ុនប៉ងបំភិតបំភ័យក៏ដោយ ក៏យើងមិនជួបបញ្ហាណាមួយនៅក្នុងការឃោសនាដែរ។ ពួកយើងមិនធ្លាក់ចូលក្នុងសង្រ្គាមពាក្យសម្តីជាមួយគណបក្សប្រជាជនកម្ពុជាទេ ពួកយើងសុខចិត្តរៀបចំកិច្ចប្រជុំ និងលើកពីបញ្ហាដែលកើតមាននៅក្នុងសង្គម វាប្រសើរជាជាង»។
លោក ញឹក ប៊ុនឆៃ អគ្គលេខាធិការគណបក្សហ៊្វុនស៊ិនប៉ិច បានអះអាងថា«សុវត្ថិភាពជាទូទៅគឺមានលក្ខណៈល្អប្រសើរ ការគំរាមកំហែងផ្សេងៗត្រូវបានលើកឡើងតិចតួច។ ហើយជម្លោះកើតឡើងរវាងសកម្មជនរបស់យើងជាមួយសកម្មជនរបស់ គណបក្សនរោត្តម រណឫទ្ធិ ពួកយើងអាចដោះស្រាយបានរៀបរយ»។
សកម្មជនប្រើឋានៈជាមន្ត្រីរាជការធ្វើយុទ្ធនាការឃោសនា
នៅដំណាក់ការនៃការឃោសនានេះ អង្គការខុមហ្រ្វែលបានស្រង់ឃើញមានរួចទៅហើយនូវមន្រ្តីរាជការ និងអ្នកតំណាងអាជ្ញាធរមូលដ្ឋាន៣៥នាក់ ដែលបានរំលោភឋានៈរបស់ពួកគេដើម្បីការពារគណបក្សនយោបាយរបស់រដ្ឋាភិបាលចម្រុះ ហើយជាពិសេសគឺគណបក្សប្រជាជនកម្ពុជា។
លោកធន សារាយ ប្រធានគណៈកម្មាធិការនាយករបស់អង្គការខុមហ្វ្រែល ព្រមានថា៖ «វាគឺជាការរំលោភទាំងស្រុងលើនីតិវិធីបោះឆ្នោតកាលណាមន្ត្រីរាជការ និងអ្នកតំណាងកងសណ្តាប់ធ្នាប់ ចូលរួមឃោសនាក្នុងពេលម៉ោងធ្វើការ និងប្រើប្រាស់ធនធានរបស់រដ្ឋដើម្បីគោលបំណងនេះ។ ករណីនេះគឺមានច្រើនជាងការបោះឆ្នោតឆ្នាំមុនៗ។ ឧទាហរណ៍ ផ្លាកលេខពណ៌ខៀវរបស់រថយន្តរដ្ឋត្រូវដោះដូរយ៉ាងឆាប់រហ័សដាក់ផ្លាកលេខឯកជនវិញ ដើម្បីអាចចូលរួមដង្ហែរក្បួនរបស់គណបក្សកាន់អំណាច»។
លោកជាម យៀប ប្រធានគណៈកម្មាធិការហិរញ្ញវត្ថុមកពីគណបក្សប្រជាជនកម្ពុជានៅរដ្ឋសភាជាតិ ទទួលស្គាល់ថា មន្ត្រីរាជការមួយចំនួនប្រើប្រាស់ទ្រព្យសម្បតិ្តសាធារណរដ្ឋធ្វើយុទ្ធនាការឃោសនា។ ប៉ុន្តែលោកលើកឡើងថា កត្តានេះគឺមកពីពួកគេខ្វះការពិចារណា។ អ្នកតំណាងរាស្រ្តខេត្តព្រៃវែងរូបនេះបានអះអាងថា «ព្រោះពួកគេមិនយល់ពីច្បាប់បោះឆ្នោត។ យើងនឹងពន្យល់ពីច្បាប់នេះដល់ពួកគេជាថ្មី។ មេដឹកនាំទាំងបីរូបរបស់គណបក្សយើងបានណែនាំពួកគេរួចទៅហើយថាកុំអោយធ្វើបែបនេះ» ។
លោកហ៊ី រ៉ុង ប្រធាននាយកដ្ឋានប្រតិបត្តិការរបស់គណៈកម្មាធិការជាតិរៀបចំការបោះឆ្នោត អះអាងថា អ្នកប្រព្រឹត្តិខុសច្បាប់ត្រូវប្រឈមមុខនឹងការព្រមាន និងការផាកពិន័យ ហើយ«វិធានការទាំងនេះនឹងត្រូវអនុវត្តប្រសិនបើ គ.ជ.ប មានភស្តុតាងពីការប្រព្រឹត្តិបែបនេះ»។
ប្រព័ន្ធផ្សព្វផ្សាយឯកជនមិនគោរពសារាចររបស់ គ.ជ.ប
ក្រៅពីគណបក្សប្រជាជនកម្ពុជា ការប្រើប្រាស់ប្រព័ន្ធផ្សព្វផ្សាយរបស់គណបក្សនយោបាយនៅតែមានកំណត់។ មួយថ្ងៃមុនយុទ្ធនាការឃោសនាបោះឆ្នោត គ.ជ.ប ធ្លាប់បង្គាប់បញ្ជានៅក្នុងសារាចរមួយ អោយគ្រប់ប្រព័ន្ធផ្សព្វផ្សាយសោតទស្សន៍ទាំងអស់និយាយពីគណបក្សឈរឈ្មោះប្រកបដោយសមភាព។ ប៉ុន្តែ ស្ថានីយវិទ្យុ និងទូរទស្សន៍ជាច្រើនបានបើករលកផ្សព្វផ្សាយសម្រាប់គណបក្សមួយចំនួន។ ប្រសិនបើពួកគេជ្រើសរើសផ្សព្វផ្សាយពីសកម្មភាពគណបក្សណាមួយ ពួកគេត្រូវទុកលទ្ធភាពអោយគណបក្សផ្សេងទៀតអាចធ្វើបានដូចគ្នាដែរ។
អង្គការខុមហ្វ្រែលបានរាប់ឃើញយ៉ាងតិច ស្ថានីយវិទ្យុ និងទូរទស្សន៍ឯកជនចំនួន៣០ បានរំលោភគោលការណ៍ក្នុងការលក់ម៉ោងទៅអោយគណបក្សនានាប្រកបដោយសមធម៌។ ពួកគេលម្អៀងទៅខាងគណបក្សប្រជាជនកម្ពុជា។ ខុសពីវិទ្យុផ្សេងទៀត វិទ្យុបាយ័ន (FM ៩៥)បន្តចាក់ផ្សាយកម្មវិធី«វប្បធម៌ខ្មែរ» ដែលផ្សាយបន្តផ្ទាល់ក្នុងវិទ្យុ៥ផ្សេងទៀតជារៀងរាល់ល្ងាច។ អ្នកស្តាប់នាំគ្នាស្តាប់ការរិះគន់ ដែលជួនកាលប្រើពាក្យសម្តីធ្ងន់ៗ ទៅលើគណបក្សប្រឆាំង តែលើកសរសើរគណបក្សកាន់អំណាច។ បណ្តាគណបក្សប្រឆាំងអាចបង្ហាញសំឡេងរបស់ខ្លួនតែនៅក្នុងស្ថានីយវិទ្យុឯកជនចំនួន៣ប៉ុណ្ណោះ គឺ មហានគរ (FM93.5) វិទ្យុសំបុកឃ្មុំ(FM105) និងFM 104។
លោកហ៊ី រ៉ុង បានពន្យល់ពីស្ថានភាពនេះយ៉ាងសាមញ្ញថា : «វិទ្យុ និងទូរទស្សន៍ភាគច្រើនជាកម្មសិទ្ធិរបស់ឯកជន ហើយម៉ោងដែលគណបក្សនយោបាយចង់ទិញនោះត្រូវគេលក់រួចទៅហើយ...»។
គណបក្សប្រជាជនកម្ពុជាលេចធ្លោជាងគេនៅក្នុងយុទ្ធនាការឃោសនា
ជាមួយនឹងសមាជិកចំនួន៥លាននាក់ គណបក្សប្រជាជនកម្ពុជាអាចធ្វើយុទ្ធនាការឃោសនាទ្រង់ទ្រាយធំជាងគូប្រកួតប្រជែងរបស់ខ្លួន ដូចជាក្បួនដង្ហែរធំៗ ការចែកខិត្តខ័ណ្ណ និងផ្ទាំងផ្សព្វផ្សាយ ក្នុងទ្រង់ទ្រាយធំទូទាំងប្រទេសកម្ពុជា។ ដោយសារមានមធ្យោបាយច្រើន គណបក្សកាន់អំណាចមានភាពលេចធ្លោជាងគណបក្សផ្សេងទៀតនៅក្នុងក្បួនដង្ហែរតាមផ្លូវថ្នល់ និងនៅក្នុងប្រព័ន្ធផ្សព្វផ្សាយ។ លោកគល់ បញ្ញា សង្កេតឃើញថា ប្រជាពលរដ្ឋឃើញរូបទេវតា និមិត្តសញ្ញារបស់គណបក្សប្រជាជនកម្ពុជារហូត ដែលគេបិទគ្រប់ទីកន្លែង ដោយទទួលបានការជួយគាំទ្រពីសំណាក់អាជ្ញាធរមូលដ្ឋាន និងអាជ្ញាធរក្រុងនានា។ លោករិះគន់ថា យុទ្ធនាការបិទផ្ទាំងផ្សព្វផ្សាយធ្វើឡើងដោយគណបក្សប្រជាជនកម្ពុជាមានលក្ខណៈបែបព្រៃ។ សកម្មជនរបស់គណបក្សនេះមិនខ្ចីសុំការយល់ព្រមពីប្រជាពលរដ្ឋឡើយមុននឹងបិទផ្ទាំងប៉ុស្ទ័រ និងក្រដាសផ្សេងៗនៅលើជញ្ជាំងផ្ទះពួកគាត់។ ប៉ុន្តែ លោកហ៊ី រ៉ុង បញ្ជាក់ថា «គ.ជ.ប ធ្លាប់និយាយច្បាស់ទាក់ទងនឹងបញ្ហានេះ ពោលគឺសកម្មភាពបែបនេះត្រូវតែទទួលបានការអនុញ្ញាតជាមុនពីម្ចាស់ផ្ទះ។ ម្ចាស់ផ្ទះទាំងនេះអាចដាក់ពាក្យបណ្តឹងទៅកាន់គណៈកម្មាធិការឃុំរៀបចំការបោះឆ្នោត ឬអាចហែកផ្ទាំងផ្សព្វផ្សាយនោះចោលក៏បាន»។
លោកគល់ បញ្ញា គូសបញ្ជាក់ថា៖ «ជានិច្ចកាល គឺពួកអាជ្ញាធរមូលដ្ឋានតែងតែធ្វើដូច្នេះដើម្បីគណបក្សប្រជាជនកម្ពុជា។ ប៉ុន្តែវាជាកិច្ចការនយោបាយ មិនមែនការងាររដ្ឋទេ។ ទោះយ៉ាងណា ប្រជាពលរដ្ឋនៅតែមានការអត់ឱនអំឡុងពេលឃោសនា។ អ្នកដែលមិនពេញចិត្តនឹងទង្វើបែបនេះបានហែកវាចោលបន្តិចម្តងៗ»។
លោកជាម យៀប មិនយល់ឃើញថាសកម្មភាពនេះមិនល្អទេ ផ្ទាំងប៉ុស្ទ័រគ្រាន់តែជា«ការរម្លឹកទៅកាន់ប្រជាពលរដ្ឋអំពីស្នាដៃប្រវត្តិសាស្រ្តរបស់គណបក្សប្រជាជនកម្ពុជាប៉ុណ្ណោះ»។ តំណាងរាស្ត្រគណបក្សប្រជាជនកម្ពុជារូបនេះគូសបញ្ជាក់ទៀតថា ៖ «គឺប្រជាពលរដ្ឋជាអ្នកនិយាយថាតើវាពេញចិត្តពួកគាត់ឬអត់។ មិនថាយ៉ាងណា ពួកយើងមិនបានធ្វើអោយខូចខាតទ្វារផ្ទះពួកគាត់ឡើយ!»។
នៅក្នុងប្រទេសមួយដែលមិនយូរមិនឆាប់ នឹងស្ថិតក្រោមពណ៌នយោបាយសឹងតែមួយទៅហើយនោះ គេអាចស្មានដឹងមុនរួចហើយពីលទ្ធផលនៃការបោះឆ្នោតនាពេលខាងមុខ... |
|
α’ααααααααααα-បរិយាកាសសន្តិសុខជាទូទៅនៃការឃោសនាបោះឆ្នោត ក្នុងសប្តាហ៍ទីមួយមានសភាពប្រសើរជាង បើប្រៀបធៀបនឹង ការបោះឆ្នោតឆ្នាំ២០០៣ (០២-០៧-២០០៨) -គណបក្សសម រង្ស៊ីបរិហារការគំរាមកំហែង នយោបាយនិងភាពមិនប្រក្រតីក្នុងអំឡុងពេលយុទ្ធនាការ ឃោសនាបោះឆ្នោត (០១-០៧-២០០៨) -គណបក្សប្រឆាំងនៅតែស្ថិតក្រោមការគាបសង្កត់ (២៣-០៦-២០០៨) -សូមបើកមើលនៅត្រង់ផ្នែក "ពីនេះពីនោះជុំវិញការបោះឆ្នោត ២០០៨ " និង "ស្ថាប័ននយោបាយនានានៅក្នុងប្រទេសកម្ពុជា "
ពាក្យបណ្តឹង៤០ករណី
លោក ហ៊ី រ៉ុង បានអោយដឹងថា នៅ សប្តាហ៍ទីមួយនៃយុទ្ធនាការឃោសនាបោះ ឆ្នោតគណៈកម្មការរៀបចំការបោះឆ្នោតឃុំ និងខេត្តទាំង២៤ខេត្ត-ក្រុងនៅក្នុងប្រទេសកម្ពុជាបានទទួលពាក្យបណ្តឹង៤០ករណី ពីគណបក្សនយោបាយ ទាក់ទិននឹងការទិញសម្លេងឆ្នោត ការរំលោភបំពានលើធនធានរបស់រដ្ឋ រឺការមិនគោរពច្បាប់ស្តីពីការបោះឆ្នោត។ គណបក្សសម រង្ស៊ី គឺជាគណបក្សដែលបានដាក់ពាក្យបណ្តឹងច្រើនជាងគេបំផុត។
ចំណែកអង្គការខុមហ្វ្រែល បានទទួលពាក្យបណ្តឹងចំនួន៨ករណី ដែលក្នុងនោះ៧ករណីត្រូវបានប្តឹងដោយគណបក្សសម រង្ស៊ី និងមួយករណី ដោយគណបក្សប្រជាជនកម្ពុជា។ គណបក្សប្រឆាំងបានដាក់ពាក្យបណ្តឹងពីបទបំផ្លិតបំផ្លាញទំនិញដោយអាជ្ញាធរមូលដ្ឋាន ការគំរាមកំហែងរបស់គណបក្សប្រជាជនកម្ពុជា ដើម្បីហាមឃាត់ការបិទខិត្តប៉ុណ្ណផ្សាយរបស់គណបក្ស និងការចែកអំណោយរបស់គណបក្សប្រជាជនកម្ពុជាដល់អ្នកបោះឆ្នោត។ ចំណែកគណបក្សប្រជាជនកម្ពុជាបានដាក់ពាក្យបណ្តឹងប្រឆាំងនឹងគណបក្សសម រង្ស៊ី ពីបទបានដឹកនាំធ្វើយុទ្ធនាការនៅក្នុងសាលារៀនរដ្ឋមួយកន្លែងនៅខេត្តបាត់ដំបង។
អ្នកនយោបាយមិនត្រូវយកព្រះនាមរបស់សម្តេចឪមកឃោសនារកសម្លេងឆ្នោតឡើយ
អតីតព្រះមហាក្សត្រ និងជាស្ថាបនិកគណបក្សហ៊្វុនស៊ិនប៉ិច បានស្នើសុំជាផ្លូវការ នៅថ្ងៃទី៥នៃយុទ្ធនាការឃោសនាបោះឆ្នោត ដល់គណបក្សហ៊្វុនស៊ិនប៉ិច កុំប្រើប្រាស់ព្រះនាម រឺព្រះឆាយាល័ក្ខណ៍របស់ព្រះអង្គ ដើម្បីធ្វើការឃោសនារកសម្លេងឆ្នោតសម្រាប់គណបក្សរបស់ខ្លួន។ នៅក្នុងព្រះរាជសារមួយច្បាប់ ផ្ញើជូនលោកកែវ ពុទ្ធរស្មី ប្រធានគណបក្សហ៊្វុនស៊ិនប៉ិច សម្តេចនរោត្តម សីហនុ បានប្រកាសជាច្រើន ទាក់ទងនឹងបញ្ហានេះ ដោយស្នើសុំអោយគណបក្សនយោបាយ កុំប្រើប្រាស់ព្រះឆាយាល័ក្ខណ៍របស់ព្រះអង្គ។ ព្រះអង្គម្ចាស់ នរោត្តម រណឫទ្ធិ ក៏បានបរិហារផងដែរចំពោះការទម្លាក់ព្រះអង្គចេញពីប្រធានគណបក្សកាលពីចុងឆ្នាំ២០០៦។ ព្រះអង្គបានរម្លឹកថា នៅខេត្តបន្ទាយមានជ័យ អ្នកទទួលខុសត្រូវរបស់គណបក្សហ៊្វុនស៊ិនប៉ិចបានចែកព្រះឆាយាល័ក្ខណ៍របស់សម្តេចឪនិងសម្តេចម៉ែ ដើម្បី «បន្លំ»អ្នកបោះឆ្នោត។
លោក ញឹក ប៊ុនឆៃ អគ្គលេខាធិការគណបក្សហ៊្វុនស៊ិនប៉ិចបានពន្យល់ថា ដោយមានការយល់ស្របពីគ.ជ.ប គណបក្សរបស់លោកបានសម្រេចចិត្តនិយាយពីប្រវត្តិសាស្រ្តរបស់គណបក្ស ដែលជាស្នាព្រះហត្ថបង្កើតឡើងដោយសម្តេចនរោត្តម សីហនុ។ រូបថតដែលត្រូវបានចែកទាំងនោះ ជារូបភាពនៅពេលគណៈប្រតិភូរបស់គណបក្ស ចូលជួបសវនការជាមួយសម្តេចឪនៅទីក្រុងប៉េកាំង។ លោកឧបនាយករដ្ឋមន្ត្រីមានប្រសាសន៍ការពារខ្លួនថា «យើងបានចែករូបភាពនៅមួយថ្ងៃ មុនយុទ្ធនាការឃោសនាបោះឆ្នោត។ ចាប់តាំងពីពេលនោះមក យើងមិនបានចែករូបភាពរបស់សម្តេចឪសម្តេចម៉ែទៀតឡើយ។ ប្រសិនជាយើងប្រព្រឹត្តកំហុស គ.ជ.ប ប្រហែលជានឹងព្រមានយើងជាមិនខាន»។
ការជជែកតវ៉ាគ្នាពីករណីឃាតកម្មលើសកម្មជនម្នាក់
សកម្មជនម្នាក់ត្រូវបានគេរកឃើញស្លាប់ដោយត្រូវគេចងក កាលពីថ្ងៃទី១ ខែកក្កដា នៅក្នុងឃុំភ្នំតូច ខេត្តកំពង់ស្ពឺ។ សកម្មជនរូបនេះគឺជាសមាជិករបស់គណបក្សប្រជាជនកម្ពុជា គឺមិនមែនដូចការអះអាងរបស់គណបក្សសិទ្ធិមនុស្សដែលថាជាសកម្មជនរបស់ខ្លួននោះទេ។ នេះជាសេចក្តីសន្និដ្ឋានរបស់គណបក្សប្រជាជនកម្ពុជា ប៉ុន្តែក៏ជាសេចក្តីសន្និដ្ឋានរបស់អង្គការការពារសិទ្ធិមនុស្សអាដហុកដែរ។ ការអះអាងផ្សេងទៀតគឺថា ឃាតកម្មនេះអាចមិនមែនជាការប៉ុនប៉ងនយោបាយដូចការអះអាងកាលពីដំបូងឡើយ។ លោកកង ហ៊ាង ប្រធានគណបក្សប្រជាជនកម្ពុជា ប្រចាំខេត្តកំពង់ស្ពឺ និងជាអភិបាលខេត្តផង បានពន្យល់ថា៖ «មួយថ្ងៃមុនពេលគាត់ត្រូវគេធ្វើឃាត គាត់បានចូលឃាត់ជម្លោះមួយរវាងកូនប្រុសគាត់ជាមួយយុវជនមួយក្រុម»។ អ្នកស៊ើបអង្កេតរបស់សមាគមអាដហុកអះអាងថា ជនរងគ្រោះគឺជាប្រធានក្រុមទី៤ មកពីគណបក្សប្រជាជនកម្ពុជា នៅភូមិអង់តាអែក ឃុំភ្នំតូច តាំងពីឆ្នាំ១៩៨៤មក។ អ្នកស៊ើបអង្កេតរូបនេះរៀបរាប់ដោយផ្អែកលើសេចក្តីសន្និដ្ឋាននៃការអង្កេតរបស់ខ្លួនថា៖ «វាគឺជារឿងសងសឹក។ ខណៈពេលដែលគាត់ទៅតាមការណាត់ជួបដើម្បីដោះស្រាយជម្លោះពាក់ព័ន្ធនឹងកូនប្រុសគាត់ គាត់ក៏ត្រូវមនុស្សមួយក្រុមមានគ្នាប្រមាណ៣០កាក់តាមផ្លូវ ហើយវាយរហូតដល់ស្លាប់»។
បើទោះជាអ្នកទទួលខុសត្រូវគណៈកម្មាធិការរៀបចំការបោះឆ្នោតឃុំ និងខេត្ត អះអាងថា ជនរងគ្រោះជាសមាជិករបស់គណបក្សប្រជាជនក៏ដោយ ក៏គណបក្សសិទ្ធិមនុស្សមិនយល់ស្របតាមដែរ។ លោកអេង ជីមី បេក្ខជនរបស់គណបក្សសិទ្ធិមនុស្សនៅក្នុងខេត្តកំពង់ស្ពឺ អះអាងថា៖ «យើងបានរកឃើញប័ណ្ណសមាជិកគាត់នៅទីស្នាក់ការបក្សប្រចាំខេត្ត។ គាត់បានចូលរួមគណបក្សយើងនៅថ្ងៃទី២៥ ខែឧសភា កន្លងទៅ។ យើងបានដាក់ពាក្យបណ្តឹងហើយ ពីព្រោះយើងចាត់ទុកថា បទឧក្រិដ្ឋនេះគឺមានចរិតនយោបាយ។ ពិតណាស់ សកម្មជនពួកយើងប្រឈមមុខនឹងការបំភិតបំភ័យ»។
Cet e-mail est protΓ©gΓ© contre les robots collecteurs de mails, votre navigateur doit accepter le Javascript pour le voir
|
