|
ទទួលព័ត៌មានតាមអ៊ីមែល
សូមលោកអ្នកទទួលអត្ថបទថ្មីៗ តាមរយៈទូរសាអេឡិចត្រូនិច
|
| នៅកម្ពុជា ការស៊ើបអង្កេតករណីឃាតកម្មលើអ្នក កាសែតឃឹម សម្បូរណ៍ មានលក្ខណៈពិសេស ពីករណីទូទៅ? |
| ααα ដួង សុខា | | | 01-09-2008 | 
ភ្នំពេញ (ប្រទេសកម្ពុជា) ថ្ងៃទី១៣ កក្កដា ២០០៨៖ ពិធីបុណ្យសពរបស់អ្នកកាសែត ឃឹម សម្បូរណ៍ និងកូនប្រុសរបស់គាត់ ដែលត្រូវបានគេបាញ់សម្លាប់កាលពីថ្ងៃទី១១ កក្កដា © ចន វីង / Magnum ថ្ងៃ១១ កក្កដា កន្លងទៅ អ្នកកាសែតឃឹម សម្បូរណ៍ និងកូនប្រុសអាយុ២១ឆ្នាំបានត្រូវមនុស្សមិនស្គាល់មុខបាញ់ប្រហារ ខណៈពេលដែលអ្នកទាំងពីរជិះម៉ូតូចេញពីពហុកីឡាដ្ឋានជាតិអូឡាំពិក។ ឃាតកម្មនេះបានកើតឡើងបន្ទាប់ពីព្រឹត្តិការណ៍ចាប់ឃុំខ្លួនលោកដាំ សិទ្ធិ និពន្ធនាយកកាសែតមនសិការខ្មែរអស់រយៈពេល១សប្តាហ៍។ មនសិការខ្មែរគឺជាកាសែតស្និទ្ធនឹងគណបក្សសម រង្ស៊ី (PSR) ហើយលោកឃឹម សម្បូរណ៍ ធ្វើការនៅក្នុង កាសែតនេះ។ លោកដាំ សិទ្ធិ ត្រូវគេចាប់ឃុំខ្លួនដោយសារមានពាក្យបណ្តឹងពីបទបរិហារកេរ្តិ៍ និងការផ្សព្វផ្សាយព័ត៌មានមិនពិត ដែលធ្វើឡើងដោយលោករដ្ឋមន្ត្រីក្រសួងការបរទេស។ សមាគម អង្គការការពារសិទ្ធិមនុស្ស និងគណបក្សនយោបាយបានថ្កោលទោសយ៉ាងខ្លាំងក្លាម្នាក់ម្តងៗអំពើឃាតកម្មនេះដែលធ្វើអោយប៉ះពាល់ដល់យុទ្ធនាការឃោសនាបោះឆ្នោត។ ពួកគេបានអំពាវនាវធ្វើយ៉ាងណាអោយជនដៃដល់ត្រូវចាប់ខ្លួន និងយកមកផ្តន្ទាទោស តាមច្បាប់។ សម្រាប់ពេលនេះ ជនល្មើសនៅតែមានសេរីភាព។
ការស៊ើបអង្កេត«បន្តធ្វើ»
រយៈពេលពីរបីថ្ងៃក្រោយសោកនាដកម្មនេះ ការិយាល័យសហព័ន្ធស្រាវជ្រាវអាមេរិក(FBI ) ដែលបានបើកការិយាល័យនៅទីក្រុងភ្នំពេញនៅចុងខែមករា បានជួយដល់អាជ្ញាធរកម្ពុជានៅក្នុងការស៊ើបអង្កេត។ សំណើនេះត្រូវបានរដ្ឋាភិបាលកម្ពុជាយល់ព្រមទទួលយកជាលើកទី១ និងត្រូវបានស្វាគមន៍យ៉ាងខ្លាំងទាំងក្នុងស្រទាប់អ្នកនយោបាយក៏ដូចជាអ្នកតំណាងសង្គមស៊ីវិល ទាំងគ្រួសារសពលោកឃឹម សម្បូរណ៍។
សឹងតែពីរខែក្រោយមក សំណុំរឿងហាក់មិនរីកចម្រើនទៅមុខសោះ។ នៅក្នុងសន្និសីទសារព័ត៌មាន នៅថ្ងៃច័ន្ទ ទី២៥ ខែសីហា លោកឯកអគ្គរដ្ឋទូតអាមេរិកចូសេហ្វ មូសូមេលី អះអាងថារង់ចាំការស្នើជាក់លាក់ពីរដ្ឋាភិបាលក្រុងភ្នំពេញ និងជាពិសេសពីនគរបាលកម្ពុជា។
ប៉ុន្តែ លោកទូច ណារ័ត្ន ស្នងការនគរបាលក្រុងភ្នំពេញ ប្រាប់អោយដឹងថា នៅថ្ងៃសុក្រ ទី២៩ ខែសីហា កិច្ចប្រជុំមួយត្រូវបានធ្វើឡើងរវាងនគរបាលកម្ពុជានិងFBI ហើយភាគីទាំងពីរបានពិភាក្សាពីមូលដ្ឋាននៃកិច្ចសហការ និងពីបែបបទនៃការជួយជ្រោមជ្រែងរបស់ FBI។
សម្រាប់លោកម៉ក់ ជីតូ ប្រធាននាយកដ្ឋាននគរបាលព្រហ្មទណ្ឌនៃក្រសួងមហាផ្ទៃ «ការស៊ើបអង្កេតកំពុងដំណើរការ» ហើយរហូតមកទល់ថ្ងៃនេះ នគរបាលមាន«ភស្តុតាងច្រើនគួរសម»។ មន្រ្តីនគរបាលរូបនេះអះអាងថា៖ «យើងកំពុងស្វែងរកសាក្សីនៅកន្លែងកើតហេតុបន្ថែមទៀត»។ លោកបញ្ជាក់ថា ការស៊ើបអង្កេតក៏ផ្តោតទៅលើកូនប្រុសរបស់លោកឃឹម សម្បូរណ៍ គឺខាត់ សារិនភាតា ជានិស្សិតម្នាក់។
លោកទូច ណារ៉ុត បន្ថែមថា៖ «រូបរបស់ជនសង្ស័យត្រូវបានគូររួចហើយ»។ កាលពីថ្ងៃ១៥ កក្កដាកន្លងទៅ លោកស្នងការធ្លាប់ផ្តល់ការសន្និដ្ឋានដំបូងៗរបស់លោកដល់កាសែត(Ka-set)។ លោកលើកឡើងថា វាអាច៧០%ជាករណីគំនុំ «ដោយសារជនដៃដល់មិនបានយកម៉ូតូដែលជនរងគ្រោះបើក» ហើយ៣០%អាចជាករណីប្លន់ប្រដាប់អាវុធ «ដោយសារជនដៃដល់គ្មានឱកាសយកម៉ូតូ»ដោយមើលហេតុការណ៍ពេលនោះ...
ចំណែកលោកខៀវ កាញារីទ្ធ រដ្ឋមន្ត្រីក្រសួងព័ត៌មាន និងជាអ្នកនាំពាក្យរបស់រដ្ឋាភិបាល ស្នើសុំកុំអោយផាត់ពណ៌នយោបាយទៅលើរឿងនេះ ហើយណែនាំថា នៅពេលខាងមុខ FBI ត្រូវចូលរួមស៊ើបអង្កេតអំពីឃាតកម្មលើអ្នកកាសែត។ លោករដ្ឋមន្ត្រីផ្តល់អំណះអំណាងថា៖ «ធ្វើដូច្នេះអាចអោយយើងជៀសផុតពីការរិះគន់ដែលថាយើងអូសបន្លាយការស៊ើបអង្កេត ហើយមិនចង់រកឃាតករ។ ប្រសិនបើ FBI ចាប់បានជនដៃដល់ គ្មានអ្នកណាចោទប្រកាន់ថាពួកគេចាប់ឃាតករក្លែងក្លាយនោះទេ»។
មតិសាធារណៈ ជាពិសេសអ្នកអង្កេតការសិទ្ធិមនុស្ស អំពាវនាវអោយមានការស៊ើបអង្កេតយ៉ាងឆាប់រហ័សមុននឹងភស្តុតាងសំណុំរឿងបាត់បង់អស់។ លោកចាន់ សុវ៉េត អ្នកស៊ើបអង្កេតការណ៍ជាន់ខ្ពស់របស់សមាគមសិទ្ធិមនុស្សអាដហុក ចោទសួរថា៖ «ទោះបីមានជំនួយពី FBI តើមន្រ្តីនគរបាលនិង FBI ស៊ើបអង្កេតចេញពីភស្តុតាងអ្វី ? FBI អាចបង្ហាញលទ្ធផលនៃការស៊ើបអង្កេតនេះជាសាធារណៈដែរទេ ?»។
ឃាតកម្មជាប់ពាក់កព័ន្ធនឹងអត្ថបទរិះគន់របស់លោកឃឹម សម្បូរណ៍
សមាគមអាដហុក ដែលជាអង្គការសំខាន់មួយក្នុងចំណោមអង្គការការពារសិទ្ធិមនុស្សនៅកម្ពុជា បានធ្វើការស៊ើបអង្កេតដោយខ្លួនឯងផ្ទាល់ តាមរយៈការពិនិត្យការរៀបរាប់របស់សាច់ញាតិជនរងគ្រោះ និងរឿងរ៉ាវរៀបរាប់ដោយសាក្សីឃើញហេតុការណ៍ផ្ទាល់ភ្នែក។ សេចក្តីសន្និដ្ឋានយ៉ាងណា ? ពិតណាស់ គ្មានអ្វីបញ្ជាក់ថាវាគ្រាន់តែជារឿងគំនុំនោះឡើយ។
លោកចាន់ សុវ៉េត សន្និដ្ឋានថា «ដោយផ្អែកលើលទ្ធផលបណ្តោះអាសន្ននៃការស្រាវជ្រាវធ្វើឡើងដោយគណបក្សនយោបាយនានា និងសង្គមស៊ីវិល យើងអាចនិយាយថា ឃាតកម្មលើលោកឃឹម សម្បូរណ៍ គឺមានទំនាក់ទំនងនឹងការងារគាត់ជាអ្នកកាសែត។ គាត់ដឹងរឿងច្រើន ហើយរិះគន់រដ្ឋាភិបាលជាប្រចាំនៅក្នុងអត្ថបទរបស់គាត់។ ម្យ៉ាងវិញទៀត ឃាតកម្មនេះកើតចំពេលយុទ្ធនាការឃោសនាបោះឆ្នោត ហើយលោកបានសរសេរអត្ថបទសម្រាប់កាសែតមានប្រជាប្រិយខាងគាំទ្រគណបក្សប្រឆាំងសម រង្ស៊ី»។
ស្រ្តីអ្នកជិតខាងម្នាក់នឹងជនរងគ្រោះបានអះអាងថា លោកឃឹម សម្បូរណ៍ មិនដែលមានរឿងឈ្លោះប្រកែកគ្នាជាមួយអ្នកជិតខាងទេ។ ប៉ុន្តែ ដោយសាររកឃើញសាក្សីនៅកន្លែងកើតហេតុមិនមានច្រើន សមាគមអាដហុកក៏បន្តការស៊ើបអង្កេតរបស់ខ្លួន និងតាមមើលការស៊ើបអង្កេតធ្វើឡើងរួមគ្នាដោយអាជ្ញាធរកម្ពុជា និង FBI។
លោកដាំ សិទ្ធិ និពន្ធនាយកកាសែតមនសិការខ្មែរ នៅស្ទាក់ស្ទើរក្នុងការនិយាយពីមូលហេតុដែលអាចបង្កជាឃាតកម្មលើអ្នកកាសែតឃឹម សម្បូរណ៍ក៏ដោយ ប៉ុន្តែលោកចាំថា មួយរយៈមុនពេលលោកឃឹម សម្បូរណ៍ស្លាប់ គាត់ធ្លាប់សរសេរ«អត្ថបទវិភាគស្ថានការណ៍បោះឆ្នោត អត្ថបទស្តីពីជម្លោះនៅប្រាសាទព្រះវិហារ និងបញ្ហាសន្តិសុខនៅទីក្រុងភ្នំពេញផងដែរ»។
នៅក្នុងសេចក្តីប្រកាសព័ត៌មានចេញផ្សាយថ្ងៃ១៦ កក្កដា ការិយាល័យឧត្តមស្នងការសិទ្ធិមនុស្សប្រចាំកម្ពុជា ធ្លាប់រម្លឹកផងដែរថា ពីរបីសប្តាហ៍មុនការស្លាប់របស់លោកឃឹម សម្បូរណ៍ អ្នកកាសែតរូបនេះបានសរសេរអត្ថបទជាច្រើនរិះគន់ចំទៅលើគណបក្សកាន់អំណាច គណបក្សប្រជាជនកម្ពុជា។
មនសិការខ្មែរមានស្ថានភាពគួរបារម្ភ ប៉ុន្តែមានគោលការណ៍ច្បាស់លាស់
លោកដាំ សិទ្ធិ ដែលសោកសៅដោយសារឃាតកម្មលើមិត្តរួមការងាររបស់លោក មើលឃើញថា ឃាតកម្មនេះគឺជា«ការគំរាមកំហែងដ៏ធ្ងន់ធ្ងរ»មួយទៅលើកាសែតរបស់គាត់។ រូបលោកផ្ទាល់ត្រូវបានជាប់ឃុំពីថ្ងៃទី៨ដល់ថ្ងៃទី១៥មិថុនា បន្ទាប់ពីមានពាក្យបណ្តឹងធ្វើឡើងដោយមេធាវីរបស់លោករដ្ឋមន្រ្តីក្រសួងការបរទេស ហោ ណាំហុង ពីបទបរិហារកេរ្តិ៍ និងផ្សព្វផ្សាយព័ត៌មានមិនពិត។ មេដឹកនាំផ្នែកការទូតរូបនេះបានប្តឹងលោកថាបានចុះផ្សាយសម្តីរបស់មេដឹកនាំបក្សប្រឆាំង សម រង្ស៊ី ដែលចោទប្រកាន់លោករដ្ឋមន្ត្រីជាសាធារណៈថាជាអ្នកគ្រប់គ្រងមន្ទីរអប់រំកសាងបឹងត្របែក នៅក្នុងសម័យប៉ុល ពត។ នៅទីបំផុត លោកដាំ សិទ្ធិ ក៏ត្រូវបានដោះលែងបណ្តោះអាសន្នបន្ទាប់ពីមានអន្តរាគមន៍ពីសម្តេចនាយករដ្ឋមន្ត្រីហ៊ុន សែន ដែលបានធានាខ្លួនលោកដាំ សិទ្ធ។
លោកដាំ សិទ្ធិ សោកស្តាយថា៖ «ខ្ញុំគ្មានទាំងឱកាសបានជួបលោកឃឹម សម្បូរណ៍ផងបន្ទាប់ពីខ្ញុំចេញពីគុក»។ លោកមិនលាក់លៀមទេពីការព្រួយបារម្ភរបស់លោកចំពោះបញ្ហាសន្តិសុខខ្លួនលោកផ្ទាល់ និងរបស់សមាជិកក្នុងក្រុមកាសែតរបស់លោក។ និពន្ធនាយករូបនេះគិតថា ចាប់តាំងពីឃាតកម្មលើលោកឃឹម សម្បូរណ៍មក អ្នកកាសែតម្នាក់ទៀតបានសុំឈប់ «ប្រហែលមកពីបញ្ហាសុវត្ថិភាព»។
អ្នកកាសែតម្នាក់របស់កាសែតមនសិការខ្មែរ សុំមិនបញ្ចេញឈ្មោះ ដោយសារភាពថា សព្វថ្ងៃគាត់មានការប្រយ័ត្នរហូតគិតពិចារណាច្រើនដងមុននឹងចាប់ផ្តើមសរសេរអត្ថបទមួយ។ លោករៀបរាប់ថា៖ «គ្រប់គ្នាដូចខ្ញុំដែរ មិត្តរួមការងាររបស់ខ្ញុំបង្កើនការប្រុងប្រយ័ត្ន។ ឧទាហរណ៍ យើងមិននៅក្នុងការិយាល័យដល់យប់ទេ។ គ្រួសារខ្ញុំបានព្យាយាមបញ្ចុះបញ្ចូលខ្ញុំអោយផ្លាស់ប្តូរការងារ។ ខ្ញុំកំពុងគិតពីរឿងនេះ។ ប៉ុន្តែអាជីពនេះខ្ញុំស្រឡាញ់ខ្លាំងណាស់! មិត្តភក្តិ និងអ្នករួមការងារលើកទឹកចិត្តខ្ញុំអោយប្រុងប្រយ័ត្ន ត្រូវផ្ទៀងផ្ទាត់ព័ត៌មាន និងពិគ្រោះជាមួយនិពន្ធនាយកនៅពេលមានប្រធានបទរស៊ើបខ្លាំង ពីព្រោះវាប៉ះពាល់ដល់ឥស្សរជនខ្ពស់ៗ»។ បន្ទាប់មកលោកអំពាវនាវអោយអាជ្ញាធរចាប់ជនដៃដល់ពិតដាក់ពន្ធនាគារ។
លោកដាំ សិទ្ធិ ដែលជាសមាជិកគណបក្សសម រង្ស៊ីដែរនោះ តែងតែបដិសេធមិនផ្លាស់ប្តូរគោលការណ៍នៃការតែងនិពន្ធកាសែតរបស់ខ្លួនឡើយ។ សន្លឹកក្រដាសសខ្មៅចំនួន៤ទំព័ររបស់មនសិការខ្មែរ ដែលចេញផ្សាយតាំងពីថ្ងៃទី៤ ខែសីហា ឆ្នាំ១៩៩៤ តែងតែរិះគន់ទៅលើគណបក្សប្រជាជនកម្ពុជា ហើយជាពិសេសគឺរដ្ឋាភិបាលរបស់សម្តេចនាយករដ្ឋមន្ត្រីហ៊ុន សែន។ ម្យ៉ាងវិញទៀត បច្ចុប្បន្ន កាសែតនេះចុះផ្សាយគ្មានលោះថ្ងៃពីការបរិហាររបស់គណបក្សប្រឆាំងទាក់ទងនឹងភាពមិនប្រក្រតីនៃការបោះឆ្នោតថ្ងៃ២៧ កក្កដា។ បើគេចង់អោយមនសិការខ្មែរ ផ្លាស់ប្តូរគោលការណ៍នៃការនិពន្ធរបស់ខ្លួនគឺមិនមែនជាការងាយស្រួលនោះឡើយ។ |
|
α’αααααααααααឃឹម សម្បូរណ៍ បុរសម្នាក់គួរអោយសរសើរ
លោកដាំ សិទ្ធិ និពន្ធនាយកកាសែតមនសិការខ្មែរ បាននិយាយពីលោកឃឹម សម្បូរណ៍ ថា៖«គាត់គឺជាមនុស្សល្អ មានវិជ្ជាជីវៈល្អ អោយអត្ថបទទៀងពេល។ គាត់ចាត់ទុកពួកយើងដូចជាសាច់ញាតិ»។ លោកឃឹម សម្បូរណ៍ បានធ្វើការជាមួយលោកដាំ សិទ្ធិ តាំងពីចុងឆ្នាំ១៩៩៧មក។
ចំណែកប្អូនប្រុសរបស់លោកឃឹម សម្បូរណ៍ ឈ្មោះឃឹម ឡូរ៉ង់វិញ បានពិពណ៌នាបងប្រុសថា«ជាមនុស្សគួរអោយស្រឡាញ់របស់គ្រួសារ និងមិត្តភក្តិ» ហើយគាត់តែងតែធ្វើអោយគ្រប់គ្នាមានអារម្មណ៍សប្បាយ។ លោកឃឹម ឡូរ៉ង់ រៀបរាប់ទាំងស្រណោះអាល័យបងប្រុសថា៖ «ពេលមានជម្លោះ គ្រួសារគឺគាត់ជាអ្នកប្រមែប្រមូលពួកយើងមកដោះស្រាយបញ្ហា»។ លោកអោយដឹងទៀតថា គ្រួសាររបស់លោករស់នៅក្នុងការភ័យខ្លាចចាប់តាំងពីមានឃាតកម្មនោះមក។
សកម្មជនសិទ្ធិមនុស្សជាច្រើនរិះគន់ពីនិទ្ទណ្ឌភាពដែលការពារអ្នកមានអំណាចនៅកម្ពុជា ហើយប្រជាពលរដ្ឋធម្មតាគ្មានសិទ្ធិទទួលបានអំពើយុត្តិធម៌ ដូចជាអ្នកកាសែត អ្នកនយោបាយ មេដឹកនាំសហជីពដែលត្រូវគេសម្លាប់។ ខាងក្រោមនេះគឺជាបញ្ជីឈ្មោះអ្នកកាសែតកម្ពុជាត្រូវគេធ្វើឃាត ជួនកាលគ្មានការបំភ្លឺ ចាប់តាំងពីឆ្នាំ១៩៩៤ ហើយអ្នកប្រព្រឹត្តឧក្រិដ្ឋកម្មមិនត្រូវបាន កាត់ទោសចំពោះមុខច្បាប់ទេរហូតមកដល់ថ្ងៃនេះ។
- លោកនួន ចាន់ និពន្ធនាយកកាសែតសំឡេងយុវជនខ្មែរ ត្រូវគេបាញ់សម្លាប់ នៅទីក្រុងភ្នំពេញថ្ងៃទី៧ កញ្ញា ១៩៩៤។
- លោកសៅ ចាន់តារា អ្នកកាសែតរបស់កោះសន្តិភាព ត្រូវគេចាញ់ប្រហារសម្លាប់នៅកំពង់ចាម កាលពីថ្ងៃទី៨ ខែធ្នូ ឆ្នាំ១៩៩៤។
- លោកធន់ ប៊ុនលី និពន្ធនាយករបស់កាសែត ឧត្តមគតិខ្មែរ ត្រូវគេលួចបាញ់សម្លាប់នៅទីក្រុងភ្នំពេញនៅថ្ងៃទី១៨ ខែឧសភា ឆ្នាំ១៩៩៦។ នៅឆ្នាំ១៩៩៥ លោកត្រូវបានគេប្តឹង និងផ្តន្ទាទោសពីរដងដោយសារការសរសេរអត្ថបទរិះគន់រដ្ឋាភិបាល។
- លោកធូ ចាន់មង្គល និពន្ធនាយកកាសែត អន្តរាគមន៍ ត្រូវគេធ្វើឃាតនៅថ្ងៃទី១១ ខែមិថុនា ឆ្នាំ១៩៩៤។
- លោកពេជ្រ អែម អ្នកបច្ចេកទេសនៅស្ថានីយ៍ទូរទស្សន៍ជាតិ ទទក ប្រចាំក្រុងព្រះសីហនុ ត្រូវគេធ្វើឃាតនៅទីក្រុងព្រះសីហនុ នៅថ្ងៃទី៥ ខែឧសភា ឆ្នាំ១៩៩៧។- ម៉ៃឃើល សឺនីញ័រ(Michael Senior) ជាងថតរូបឯករាជ្យដើមកំណើតខ្មែរ ត្រូវពួកទាហានសម្លាប់នៅថ្ងៃទី៨ ខែកក្កដា ឆ្នាំ១៩៩៧ ខណៈពេលដែលលោកព្យាយាមថតរូបក្រុមទាហានលួចអីវ៉ាន់នៅក្នុងផ្សារមួយក្នុងក្រុងភ្នំពេញ។
- លោកអ៊ូ សារឿន អ្នកយកព័ត៌មានរបស់កាសែតសំឡេងរាស្រ្តខ្មែរ ត្រូវគេលួយវាយប្រហារនៅថ្ងៃទី១៤ ខែតុលា ឆ្នាំ១៩៩៧។
- លោកជួរ ជេតថារិទ្ធិ៍ អ្នកយកព័ត៌មានអោយវិទ្យុតាព្រហ្ម FM 90.5 ត្រូវគេលួចធ្វើឃាតនៅពេលមកដល់ការិយាល័យនៅថ្ងៃទី១៨ ខែតុលា ឆ្នាំ២០០៣ នៅទីក្រុងភ្នំពេញ។
សូមអានអត្ថបទរបស់កាសែត
- ឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្សនៅកម្ពុជាព្រួយបារម្ភពីលទ្ធិប្រជាធិបតេយ្យ (១៦-០៧-២០០៨)
- នគរបាលក្រុងភ្នំពេញ : ឃាតកម្មលើលោកឃឹម សម្បូរណ៍ ជាករណីគំនុំ មិនពាក់ព័ន្ធនឹងនយោបាយទ (១៥-០៧-២០០៨)
- ការផ្កោលទោសជាឯកច្ឆ័ន្ទលើឃាតកម្មអ្នកកាសែតកម្ពុជា ឃឹម សម្បូរណ៍ (១៤-០៧-២០០៨)
- អ្នកកាសែតប្រឆាំងម្នាក់ និងកូនប្រុសត្រូវគេធ្វើឃាតនៅទីក្រុងភ្នំពេញ (១២-០៧-២០០៨)
- សេរីភាពសារព័ត៌មាន: រឿងពិបាកប៉ាន់ស្មាននៅកម្ពុជា? (០៥-០៥-២០០៨)
Cet e-mail est protΓ©gΓ© contre les robots collecteurs de mails, votre navigateur doit accepter le Javascript pour le voir
|
