| ក្បួនធម្មយាត្រារបស់ដូនជីដើម្បីគាំទ្រចំពោះសាលាក្តីខ្មែរ ក្រហម |
| ααα Duong Sokha et Stephanie Gee | |
| 25-12-2007 |
យាយជីដើរពីពោធិចិនតុងរហូតដល់កំបូល
© John Vink / Magnum ដូនជីប្រមាណជាង ៤០០នាក់ រូមជាមួយនឹងព្រះសង្ឃ ព្រមទាំងសិស្សវិទ្យាល័យជាងមួយរយនាក់ទៀត បានជ្រើសរើសថ្ងៃបុណ្យណូអែល ដើម្បីដើរហែរក្បួនធម្មយាត្រាមួយទៅកាន់សាលាក្តីកាត់ទោសអតីតមេដឹកនាំខ្មែរក្រហម ដែលមានទីតាំងស្ថិតនៅចម្ងាយប្រមាណជិត២០គីឡូម៉ែត្រពីរាជធានីភ្នំពេញ។ ក្បួនដង្ហែរនេះត្រូវបានផ្តួចផ្តើមគំនិតឡើងដោយមជ្ឈមណ្ឌលឯកសារកម្ពុជា (www.dccam.org ស៊ីតរបស់មជ្ឈមណ្ឌលឯកសារកម្ពុជា) ដែលជាអង្គការឯកទេសមួយក្នុងការប្រមូលផ្តុំឯកសារទាក់ទងនឹងឧក្រិដ្ឋកម្ម និងអំពើសាហាវយង់ឃ្នង់ដែលបានប្រព្រឹត្តនៅក្នុងសម័យ ប៉ុល ពត។
នៅក្នុងក្បួនដង្ហែររបស់ដូនជីស្លៀកពាក់សទាំងនេះ ភាគច្រើនសុទ្ធសឹងតែជាស្រ្តីដែលបានបាត់បង់ស្វាមី និងកូនៗរបស់ពួកគាត់នៅក្នុងរបបប្រល័យពូជសាសន៍។ នៅលើបដា ពួកគាត់បានអំពាវនាវអោយ «រួមគ្នាស្វែងរកយុត្តិធម៌» និង «ធម្មយាត្រាដើម្បីសន្តិភាព»។ ពួកគាត់ក៏ថ្លែងអំណរគុណចំពោះអង្គជំនុំជម្រះវិសាមញ្ញក្នុងតុលាការកម្ពុជា(អ វ ត ក) ជាឈ្មោះផ្លូវការរបស់តុលាការជាតិដែលមានលក្ខណៈអន្តរជាតិ ដោយចាត់ទុកតុលាការនេះថាជា “ឪសថរម្ងាប់ការចងពៀរ"។
ដូនជីព្រះនាម បា នុ មានព្រះជន្ម ៦៣ព្រះវស្សា មានប្រសាសន៍ថា ក្បួនធម្មយាត្រានេះ មានគោលបំណងចង់ទាក់ទាញចំណាប់អារម្មណ៍សាធារណជន ជាពិសេសក្មេងៗ អោយបានដឹងពីការវិនិច្ឆ័យទោសអតីតមេដឹកនាំខ្មែរក្រហម។ ជាការពិតណាស់ យុវជនស្រករក្រោយភាគច្រើនមិនបានដឹងលឺពីប្រវត្តិសាស្រ្តដ៏ខ្មៅងងឹងនេះទេ ដែលមកដល់សព្វថ្ងៃនេះ វាមិនត្រូវបានដាក់បញ្ជូលទៅក្នុងកម្មវិធីសិក្សារបស់ពួកគេទេ។
ជំនួយការសហព្រះរាជ្ញអាជ្ញា បានចេញមកទទួលស្វាគមន៍ព្រះសង្ឃ និងដូនជីនៅក្នុងបរិវេណសាលាក្តី ហើយបានសំដែងនូវសេចក្តីសោមន្សរីករាយចំពោះតួនាទីរបស់អ្នកបួសទាំងនេះ នៅក្នុងដំណើរការនីតិវិធីដែលមានរយៈពេលយូរនៃតុលាការនេះ ដែលត្រូវផ្តល់នូវយុត្តិធម៌ជូនជនរងគ្រោះពីឧក្រិដ្ឋកម្មដ៏សាហាវឃោឃៅដែលបានប្រព្រឹត្តនៅក្នុងរបបខ្មែរក្រហម។ ក្នុងអំឡុងពេល បីឆ្នាំ ប្រាំបីខែ ម្ភៃថ្ងៃ ពួកខ្មែរក្រហមបានគ្រប់គ្រងប្រទេសកម្ពុជា ហើយបានលុបបំបាត់ព្រះពុទ្ធសាសនា និងក៏ដូចជាសាសនាផ្សេងៗទៀតចោលទាំងអស់ ព្រមទាំងចាប់ផ្សឹកព្រះសង្ឃទាំងអស់។
ដូនជីទាំងអស់នេះ អាចនឹងមកធ្វើជាសាក្សី នៅចំពោះមុខតុលាការ។ គិតមកត្រឹមថ្ងៃទី ២៥ ខែធ្នូ ឆ្នាំ ២០០៧ នេះ តុលាការបានទទួលនូវពាក្យបណ្តឹងរបស់ជនរងគ្រោះពីរបបខ្មែរក្រហម ចំនួនជាង ៤០០បណ្តឹងហើយ៕
|
