| ដំណាក់កាលនីតិវិធីតុលាការលើករណីឌុច |
| ααα Stιphanie Gιe (Ka-set) | |
| 03-12-2007 |
ឌុចត្រូវបានចាប់ខ្លួន នៅថ្ងៃទី ១០ ឧសភា ១៩៩៩ ហើយថ្ងៃទី ៣ ធ្នូ ២០០៧ តុលាការបានសម្រេចច្រានចោលបណ្តឹងឧទ្ធរណ៍ ស្នើរសុំអោយដោះលែង មានសេរីភាព នៃអតីតមេធ្វើទារុណកម្ម នៃមន្ទីសួរចំលើយ S21
ថ្ងៃទី ១០ ឧសភា ១៩៩៩
ឌុច ត្រូវបានចាប់ខ្លួនដោយអាជ្ញាធរនៃព្រះរាជាណាចក្រកម្ពុជា និងបាននាំខ្លួនទៅកាន់តុលាការយោធាក្រុងភ្នំពេញ។ ឌុចត្រូវបានចោទប្រកាន់ពីបទឧក្រិដ្ឋកម្មប្រឆាំងនឹងសន្តិសុខក្នុងប្រទេស។
ថ្ងៃទី ៦ កញ្ញា ១៩៩៩
ព្រះរាជអាជ្ញាអមតុលាការយោធាបានចោទប្រកាន់ឌុចពីបទឧក្រិដ្ឋកម្មប្រល័យពូជសាសន៍។
ថ្ងៃទី ២២ កុម្ភៈ ២០០២- ថ្ងៃទី ២២ កុម្ភៈ ២០០៣- ថ្ងៃទី ២២ កុម្ភៈ ២០០៤
ចៅក្រមស៊ើបអង្កេតនៃតុលាការយោធាបានចេញដីកាឃុំខ្លួនឌុចពីបទឧក្រិដ្ឋកម្មប្រឆាំងនឹងមនុស្សជាតិ។
ថ្ងៃទី ២៨ កុម្ភៈ ២០០៥- ថ្ងៃទី ២៨ កុម្ភៈ ២០០៦- ថ្ងៃទី ២៨ កុម្ភៈ ២០០៧
ចៅក្រមស៊ើបអង្កេតតុលាការយោធាបានចេញដីកាឃុំខ្លួន ពីបទឧក្រិដ្ឋកម្មប្រឆាំងនឹងសង្រ្គាម និងឧក្រិដ្ឋកម្មប្រឆាំងនឹងមនុស្សដែលត្រូវការពារជាអន្តរជាតិ។
ថ្ងៃទី ១៨ កក្កដា ២០០៧
សហព្រះរាជអាជ្ញានៃអង្គជំនុំជម្រះវិសាមញ្ញនៅក្នុងតុលាការកម្ពុជាបានចេញដីកាសន្និដា្ឋនបញ្ជូនរឿងអោយស៊ើបសួរ ដែលក្នុងនោះស្នើសុំអោយសហចៅក្រមស៊ើបអង្កេតបើកការស៊ើបអង្កេតប្រឆាំងនឹងជនសង្ស័យមួយចំនួន រួមមាន ឌុច ផងដែរ និងស្នើរសុំអោយធ្វើការចាប់ខ្លួនជនសង្ស័យទាំងនោះ។
ថ្ងៃទី ៣០ កក្កដា ២០០៧
ឌុច ត្រូវបានផ្ទេរពីមន្ទីរឃុំឃាំងតុលាការយោធា មកកាន់មន្ទីរឃុំឃាំងសាលាក្តីខ្មែរក្រហម។
ថ្ងៃទី៣១ កក្កដា ២០០៧
បន្ទាប់ពីការធ្វើសវនាការតទល់គ្នា សហចៅក្រមស៊ើបអង្កេតបានចេញដីកាសម្រេចឃុំខ្លួនបណ្តោះអាសន្ន ដែលមានរយៈពេលកំណត់មិនលើសពីមួយឆ្នាំ។
ថ្ងៃទី ២៣ សីហា ២០០៧
មេធាវីរបស់ឌុចបានធ្វើការប្តឹងឧទ្ធរណ៍ប្រឆាំងនឹងដីកាសម្រេចឃុំខ្លួនបណ្តោះអាសន្ន និងដាក់សារណាចូលមកនៅថ្ងៃទី ៥ ខែ កញ្ញា ឆ្នាំ ២០០៧។
ថ្ងៃទី ២០ និង ២១ វិច្ឆិកា ២០០៧
សាលាក្តីខ្មែរក្រហមបានបើកសវនាការលើបណ្តឹងឧទ្ធរណ៍ជាសាធារណៈ។ បន្ទប់នៃអង្គបុរេជំនុំជម្រះមានលក្ខណៈតូច ហើយសាធារណៈជនត្រូវបានអញ្ជើញអោយចូលរួមទស្សនាតាមការបញ្ជូនរូបភាពវីដេអូពីបន្ទប់កាត់ក្តី។ ឌុចមានវត្តមាននៅចំពោះមុខចៅក្រម។ សេចក្តីសម្រេចត្រូវបានទុកពិភាក្សាសម្រេចនៅពេលក្រោយ។
ថ្ងៃទី ៣ ខែ ធ្នូ ឆ្នាំ២០០៧
អង្គបុរេជំនុំជម្រះបានបដិសេធចោលបណ្តឹងឧទ្ធរណ៍របស់មេធាវីឌុច និង បិទផ្លូវតវ៉ាបណ្តឹងឧទ្ធរណ៍បន្តទៀត។ អតីតប្រធាន មន្ទីរ ស ២១ ត្រូវបានបញ្ជូនមកកាន់កន្លែងឃុំខ្លួនវិញ។
ចៅក្រមរំពឹងថាការកាត់ទោសខ្មែរក្រហមនឹងត្រូវចាប់ផ្តើមធ្វើនាខែ មិថុនា ឆ្នាំ២០០៨។ |
