|
ទទួលព័ត៌មានតាមអ៊ីមែល
សូមលោកអ្នកទទួលអត្ថបទថ្មីៗ តាមរយៈទូរសាអេឡិចត្រូនិច
|
| ការងារ គ្រួសារ រថយន្តភីកអាប់ៈ ទីផ្សាររថយន្តថ្មីនៅប្រទេសកម្ពុជា |
| ααα រស់ ឌីណា | | | 02-09-2008 | 
ភ្នំពេញ (ប្រទេសកម្ពុជា) ថ្ងៃទី១៦ សីហា ២០០៨៖ ការតាំងពិពណ៌រថយន្ត Ford នៅសាលមហោស្រពចេនឡា
© ចន វីង / Magnum ខណៈពេលដែលស្ថានភាពផ្លូវថ្នល់នៅរាជធានីភ្នំពេញបាននិងកំពុងតែត្រូវបានធ្វើការអភិវឌ្ឍន៍ពីមួយឆ្នាំទៅមួយឆ្នាំ រថយន្តដ៏ថ្មីស្រឡាងដែលអាចធ្វើដំណើរលើគ្រប់ស្ថានភាពភូមិសាស្រ្ត រួមមានរថយន្ត៤×៤ រថយន្តភីកអាប់ និងរថយន្តមានប្រយោជន៍ក្នុងការដឹកទំនិញគ្រប់ប្រភេទនិងគ្រប់ម៉ាកជាច្រើន កំពុងតែធ្វើចរាចរណ៍លើដងវិថីនៅក្នុងរាជធានីនៃប្រទេសកម្ពុជា។ ដំបូងឡើយ យានយន្តប្រភេទនេះប្រើទុកសម្រាប់បើកបរលើស្ថានភាពផ្លូវលំបាកៗ រឺដើម្បីដឹកជញ្ជូនទំនិញប៉ុណ្ណោះ។ ប៉ុន្តែសព្វថ្ងៃនេះ រថយន្តទាំងនេះបានក្លាយជានិមិត្តរូបនៃផាសុកភាព និងភាពមានបានរបស់អ្នកក្រុងភ្នំពេញ។ ចាប់ពីពេលនេះតទៅ អ្នកប្រើប្រាស់ផ្ទាល់ខ្លួនក្លាយជាអតិថិជនដ៏សំខាន់បំផុតសម្រាប់ទីផ្សាររថយន្តភីកអាប់នៅប្រទេសកម្ពុជា ដែលកាលពីមុននេះ ភាគច្រើននៃអ្នកប្រើប្រាស់រថយន្តប្រភេទនេះគឺសម្រាប់តែអង្គភាពនៃអង្គការក្រៅរដ្ឋាភិបាល និង ស្ថាប័នរាជរដ្ឋាភិបាល។
គ្មានឡាន ជីវិតគ្មានន័យ
លោកហេងបានសំដែងអារម្មណ៍សប្បាយរីករាយយ៉ាងខ្លាំង។ នៅថ្ងៃទី២២ សីហា លោកបានទិញរថយន្តភីកអាប់ដ៏ថ្មីស្រឡាងមួយគ្រឿងម៉ាក តូយ៉ូតា វីហ្គូ (Toyota Vigo) នៅក្រុមហ៊ុនចែកចាយផលិតផលម៉ាកជប៉ុន ស្ថិតនៅសង្កាត់ទឹកថ្លា រាជធានីភ្នំពេញ។ សម្រាប់បុរសវ័យ៥០ផ្លាយរូបនេះ ការជិះរថយន្តប្រភេទនេះស្ទើរតែបង្ហាញអោយឃើញពីភាពជោគជ័យដ៏ត្រចះត្រចង់មួយរបស់គាត់៖ វាឆ្លុះបញ្ចាំងពីជោគជ័យ កំរិតជីវភាពធូរធារនៅទីក្រុងភ្នំពេញ ព្រមទាំងភាពសេចក្តីសុខនៅក្នុងជីវិតរបស់គាត់ រួមទាំងក្រុមគ្រួសារ។ អ្នកទីក្រុងរូបនេះបានបញ្ជាក់ថា «វាគឺជារថយន្តទំនើបនិងទាន់សម័យមួយគ្រឿង ដែលផលិតដោយអ្នកជំនាញពិតប្រាកដ។ ប្រសិនជាខ្ញុំចង់រស់នៅមានសេចក្តីសុខជាមួយគ្រួសារ ខ្ញុំត្រូវមានរថយន្តប្រភេទនេះ»។ លោកមិនបានសំដែងការនឹកស្រណោះចំពោះរថយន្តចាស់របស់គាត់ ម៉ាកកាមឺរី នោះទេ ព្រោះរថយន្តនេះតូចចង្អៀតសម្រាប់គ្រួសាររបស់គាត់។ លោកត្រូវចំណាយប្រាក់៣ម៉ឺនដុល្លារ សម្រាប់ទិញរថយន្តប្រភេទនេះ។ គួរបញ្ជាក់ថា GDPប្រចាំឆ្នាំ សម្រាប់ប្រជាជនម្នាក់ នៅប្រទេសកម្ពុជា គឺត្រឹមតែ៦០០ដុល្លារប៉ុណ្ណោះ។
លោកហេង ហាក់បីដូចជាមានអំនួតចំពោះរថយន្តថ្មីរបស់គាត់។ គាត់បានគូសបញ្ជាក់ថា គាត់មិនមែនជាមន្រ្តីរាជការ ហើយរថយន្តភីកអាប់ដ៏ស្រស់ស្អាតរបស់គាត់នេះមានសារៈសំខាន់ ក្នុងការដឹកភរិយារបស់គាត់ ដែលរកស៊ីនៅក្នុងផ្សារមួយកន្លែង នាទីក្រុងភ្នំពេញ។ ជារៀងរាល់ចុងសប្តាហ៍ ក្រុមគ្រួសារទាំងមូលអាចធ្វើដំណើរកំសាន្តយ៉ាងសប្បាយរីករាយ និងយ៉ាងមានផាសុកភាព។ ជាចុងក្រោយ លោកហេង និងគ្រួសាររបស់គាត់លែងព្រួយបារម្ភពីគ្រោះថ្នាក់ចរាចរណ៍នៅតាមផ្លូវ ដោយសាររថយន្តប្រភេទនេះបំពាក់ទៅដោយពោងការពារសុវត្ថិភាព។ សម្រាប់មេគ្រួសាររូបនេះ យានយន្តប្រភេទនេះមានភាពសមស្របយ៉ាងខ្លាំងនៅក្នុងប្រទេស ដូចជាកម្ពុជានេះ។ ដោយមិនចង់និយាយអំពីរថយន្តជជុះ រថយន្តថ្មីពិតជាមានតម្លៃខ្ពស់ ប៉ុន្តែ លោកហេងមានទំនុកចិត្តលើឡានប្រភេទនេះ វាអាចធ្វើអោយគាត់សន្សំសំចៃប្រេង ព្រមទាំងថ្លៃជួសជុលទៀតផង ព្រោះរថយន្តនេះត្រូវបានធានាជួសជុលរយៈពេលពីរឆ្នាំ ដោយក្រុមហ៊ុនចែកចាយ។ លោកហេងបានរៀបរាប់ថា «ខ្ញុំបានសម្រេចចិត្តក្នុងរយៈពេលដ៏សែនខ្លី ដើម្បីទិញរថយន្តថ្មីមួយគ្រឿង ព្រោះគ្រប់យ៉ាងសុទ្ធតែថ្មី និងមានការធានា។ ប៉ុន្តែ សម្រាប់ការទិញរថយន្តជជុះវិញ គេត្រូវចំណាយពេលយ៉ាងយូរដើម្បីសម្រេចចិត្តទិញវា ជាហេតុធ្វើអោយបាត់បង់ពេលវេលានិងថវិកា... ប្រសិនជាគេមិនចេះមើល គេអាចនឹងទិញប៉ះចំរថយន្តមិនមានគុណភាព ដែលឈ្នួញរកស៊ីលក់បន្តបានច្រើនតែផាត់ម្សៅបន្ថែមមើលមិនដឹង»។ លោកធ្លាប់មានបទពិសោធន៍ច្រើនពាក់ព័ន្ធនឹងរឿងនេះ ព្រោះកាលពីមុន លោកធ្លាប់ប្រើរយន្តជជុះ។
ហ៊ ង៉ែត ពិធិករព័ត៌មានកីឡាប្រចាំស្ថានីយទូរទស្សន៍ប៉ុសិ៍្តលេខប្រាំ បានក្លាយជាអតិថិជនពិសេស ក្នុងចំណោមអតិថិជនពិសេសៗដំបូងគេ ដែលប្រើប្រាស់រថយន្តម៉ាកជប៉ុនដ៏ល្បីល្បាញមួយនេះ។ លោកបានទិញឡានភីកអាប់នេះ កាលពីពីរឆ្នាំមុន»។ លោកមានមូលហេតុដូចគ្នា ដែលបានជម្រុញអោយលោកចំណាយថវិការាប់ម៉ឺនដុល្លារដើម្បីទិញវា ព្រោះវា «មានផាសុកភាព» «ទាន់សម័យ» និង «សាកសមជាមួយនឹងគ្រួសារធំមួយ»។
លោកសម សុខវីវៈ ប្រធានមណ្ឌលកុមារកំព្រាព្រៃសំរោង ស្ថិតនៅជាយក្រុងភ្នំពេញនៃខ័ណ្ឌឫស្សីកែវ មិនបានគិតឃើញថារថយន្តភីកអាប់របស់គាត់ ប្រៀបបានដូចជារថយន្ត «ទំនើបនិងទាន់សម័យ»នោះទេ។ សម្រាប់លោក រថយន្តនេះគឺជាយានជំនិះការងារ ដែលមានសារៈសំខាន់ សម្រាប់ធ្វើដំណើរនៅតាមខេត្តដែលមានផ្លូវលំបាកៗ ដូចជាខេត្តរតនគិរី និងខេត្តមណ្ឌលគិរី។ ប្រធានរូបនេះបានកត់សម្គាល់ថា «ខ្ញុំប្រើរថយន្តភីកអាប់នេះសម្រាប់ការងារច្រើនជាងសម្រាប់គ្រួសារ។ មណ្ឌលកុមារកំព្រាមានកសិដ្ឋានមួយកន្លែងនៅខេត្ត ហើយដោយសាររថយន្តនេះ ខ្ញុំអាចដឹកជញ្ជូនសម្ភារៈបានយ៉ាងងាយស្រួល»។
អ្នកប្រើប្រាស់ផ្ទាល់ខ្លួន នាំមុខរដ្ឋាភិបាល និងអង្គការក្រៅរដ្ឋាភិបាល
ការងារ គ្រួសារ រឺសញ្ញាខាងក្រៅបញ្ជាក់ពីភាពមានបាន...។ គោលគំនិតទាំងនេះអាចធ្វើអោយលោកលី ប៊ុនហៃ អគ្គនាយកសេវាកម្មលក់និងជួសជុលនៃក្រុមហ៊ុនចែកចាយរថយន្តម៉ាកតូយ៉ូតានៅក្នុងប្រទេសកម្ពុជាបានភាពសប្បាយរីករាយ។ អ្នកទទួលខុសត្រូវផ្នែកទីផ្សាររូបនេះបានអះអាងថា នៅឆ្នាំនេះ អតិថិជនធម្មតាមានចំនួននាំមុខអតិថិជនមកពីអង្គការក្រៅរដ្ឋាភិបាល ស្ថានទូត រឺស្ថាប័នរដ្ឋ។ ចាប់ពីពេលនេះតទៅ ទីផ្សារឯកជនគ្របដណ្តប់ចាប់ពី៦០ ទៅ៧០% នៃការលក់ ចំនួនអតិថិជនប្រើប្រាស់ផ្ទាល់ខ្លួនបានកើនឡើងជិត២០% នៅអំឡុងរយៈពេលបីឆ្នាំចុងក្រោយនេះ។ «លោកបានពន្យល់ថា ចាប់តាំងពីឆ្នាំ២០០៥មក ទីផ្សារនៃអ្នកប្រើប្រាស់ផ្ទាល់ខ្លួនបានកើនឡើងគួរអោយកត់សម្គាល់ ហើយបច្ចុប្បន្ននេះ ចង្វាក់នៃកំណើននេះនៅតែមានសន្ទុះយ៉ាងខ្លាំងក្លា។ ទីផ្សារនៃអ្នកប្រើប្រាស់តាមស្ថាប័នរដ្ឋាភិបាល អង្គការក្រៅរដ្ឋាភិបាល ស្ថានទូត និងក្រុមហ៊ុនឯកជនក៏មានការកើនឡើងផងដែរ ប៉ុន្តែ មិនសូវខ្លាំងក្លាដូចជាទីផ្សារនៃអ្នកប្រើប្រាស់ធម្មតា»។
លោកលី ប៊ុនហៃ ប្រធានផ្នែកទីផ្សារ បានបញ្ជាក់ថាលទ្ធផលទាំងនេះអាចសម្រេចទៅបាន ដោយសារតែភាពល្បីល្បាញរបស់ម៉ាករថយន្តតូយ៉ូតា និងគុណភាពរបស់វា «ដែលអាចសម្របទៅនឹងស្ថានភាពភូមិសាស្រ្តនិងការចូលចិត្តរបស់ប្រជាជនខ្មែរ»។ ប្រធានសេវាកម្មលក់និងជួសជុលរូបនេះ បានមានប្រសាសន៍យ៉ាងរីករាយថា «ក្រុមហ៊ុនរបស់យើងមានវត្តមាននៅក្នុងប្រទេសកម្ពុជាចាប់តាំងពីឆ្នាំ១៩៩៣មកម្ល៉េះ។ យើងបម្រើសេវាកម្មគ្រប់ប្រភេទ មិនមែនត្រឹមតែការលក់ប៉ុណ្ណោះនោះទេ។ យើងបានរៀបចំបង្កើតជាយានដ្ឋានដ៏ធំមួយ ដើម្បីជូសជុលរថយន្ត ដោយមានអ្នកបច្ចេកទេសដែលត្រូវបានបណ្តុះបណ្តាលដោយក្រុមហ៊ុនតូយ៉ូតា រួមទាំងមានឧបករណ៍បច្ចេកវិទ្យាទំនើបៗទៀតផង»។
គោលដៅបានសម្រេច ហួសពីការគ្រោងទុក
ប៉ុន្តែ ក្រុមហ៊ុនជប៉ុននេះមិនមែនជាក្រុមហ៊ុនតែមួយគត់ ដែលបម្រើសេវាកម្មសម្រាប់រថយន្តប្រភេទភីកអាប់នេះនោះទេ។ នៅអំឡុងរយៈពេលប៉ុន្មានឆ្នាំចុងក្រោយនេះ ក្រុមហ៊ុនអាមេរិកកាំង Ford ក៏មានសន្ទុះនៃការលក់រថយន្តយ៉ាងខ្លាំងផងដែរ។ លោកសេង វឹង នាយកចែកចាយរថយន្ត Ford នៃក្រុមហ៊ុនR.M Asia ដែលជាក្រុមហ៊ុនចែកចាយស្របច្បាប់នូវរថយន្តម៉ាកអាមេរិកនៅប្រទេសកម្ពុជា មានអំនួតថា គោលដៅសម្រាប់ឆ្នាំ២០០៨បានសម្រេចតាមគម្រោងដែលបានគ្រោងទុក។ តាមគំនិតរបស់លោក តួលេខការងារចាប់តាំងពីដើមឆ្នាំនេះមក បានកើនឡើងហួសពីការគ្រោងទុក ពី១០ទៅ២០% ហើយការលក់បានកើនឡើង២០% បើប្រៀបធៀបទៅនឹងឆ្នាំកន្លងទៅ។ «លោកសេង វឹង បានរៀបរាប់លំអិតថា នៅក្នុងអំឡុងរយៈពេល១១ឆ្នាំដំបូងនៅប្រទេសកម្ពុជា ពោលគឺចាប់ពីឆ្នាំ១៩៩០ ដល់ឆ្នាំ២០០១ គោលដៅរបស់យើងគឺផ្តោតសំខាន់ទៅលើទីផ្សាររបស់រដ្ឋាភិបាល។ មួយឆ្នាំក្រោយមក យើងបានវាយលុកទីផ្សារអង្គការក្រៅរដ្ឋាភិបាល បន្ទាប់មកទៀតគឺក្រុមហ៊ុនឯកជន។ ជាចុងក្រោយ បន្ទាប់បានជោគជ័យនៅលើទីផ្សារទាំងបីខាងលើ ចាប់តាំងពីឆ្នាំ២០០៤មក យើងបានងាកទៅរកទីផ្សារនៃអ្នកប្រើប្រាស់រថយន្តផ្ទាល់ខ្លួន។ ចាប់តាំងពីឆ្នាំនេះមក ទីផ្សារចុងក្រោយនេះ បានក្លាយជាទីផ្សារនាំមុខគេ ជាមួយនឹងអត្រាជិត៥០ %នៃការលក់ នៅក្នុងប្រទេសទាំងមូល ទល់នឹង៣០ %សម្រាប់ស្ថាប័នរដ្ឋ និងអង្គការក្រៅរដ្ឋាភិបាល ហើយ២០%សម្រាប់ក្រុមហ៊ុនឯកជន»។
អ្នកទទួលខុសត្រូវក្រុមហ៊ុន Ford ជនជាតិកម្ពុជារូបនេះបានវាយតម្លៃថារថយន្តជិត២ពាន់គ្រឿងគ្រប់ប្រភេទរបស់ក្រុមហ៊ុន Ford កំពុងចរាចរណ៍នៅក្នុងប្រទេសកម្ពុជា។ តើរថយន្តអ្វីដែលនាំមុខគេ? គឺពិតជារថយន្តភីកអាប់។ លោកសេង វឹងបានសំដែងការរីករាយថា«នៅបរទេស គេច្រើនប្រើរថយន្តប្រភេទភីកអាប់ ដើម្បីដឹកទំនិញ។ ប៉ុន្តែ នៅកម្ពុជា អតិថិជនជាច្រើនជិះរថយន្តទាំងនេះ ដូចជារថយន្តធម្មតា សម្រាប់ការដើរកំសាន្តជាលក្ខណៈគ្រួសារ រឺដើម្បីជិះទៅធ្វើការ»។ លោកសេង វឹង ក៏បានកត់សម្គាល់ពីបាតុភូតដូចគ្នានេះដែរ នៅក្នុងប្រទេសថៃផងដែរ។
លោកសេង វឹង បានគូសបញ្ជាក់ថា «នៅឆ្នាំ២០០៨ យើងបានទទួលការកុម្ម៉ង់ទិញចំនួន២០% ច្រើនជាងច្រើនកន្លងទៅ។ ផ្ទុយពីក្រុមហ៊ុនផ្សេងដែលផលិតតាមការកុម្ម៉ង់ យើងមានរថយន្តជាងមួយរយគ្រឿងនៅក្នុងស្តុក សម្រាប់ទីផ្សារនៅកម្ពុជានិងនៅឡាវ»។ លោកបានបន្ថែមទៀតថា ក្រុមហ៊ុនរបស់លោកក៏មានរោងចក្រតំឡើងរថយន្តមួយកន្លែងនៅក្រុងព្រះសីហនុ ជាងមួយឆ្នាំមកហើយ ដើម្បីធ្វើការនាំចេញ។ សម្រាប់ពេលនេះ នៅមិនទាន់មានគម្រោងបង្កើតរោងចក្រផលិតរថយន្តណាមួយនៅប្រទេសកម្ពុជានៅឡើយទេ។
រថយន្តជជុះត្រូវប៉ាន់អ្នកមកពីខេត្ត
ទោះបីជាទីផ្សាររថយន្តថ្មីមានកំណើនគួរអោយកត់សម្គាល់ក៏ដោយ ក៏ទីផ្សាររថយន្តជជុះមានកំណើនមិនធម្មតាផងដែរ ហើយករណីនេះក៏មិនបានធ្វើអោយលោកហេង តូចចិត្តតូចថ្លើមអ្វីដែរ។ នៅតាមទីផ្សារលក់រថយន្តជជុះ នៅមិនឆ្ងាយប៉ុន្មានពីស្ថានីយរថភ្លើងភ្នំពេញ រថយន្តភីកអាប់ស្ថិតនៅជួរលំដាប់មុខគេ សម្រាប់ អតិថិជនមកពីបណ្តាខេត្តនានា។ លោក សូ កុយ ឈ្នួញកណ្តាល បានវាយតម្លៃថារថយន្តជិត៣០% ដែលលក់ចេញ គឺប្រភេទភីកអាប់។ អ្នកលក់បានកត់សម្គាល់ថា «អតិថិជនរបស់យើងភាគច្រើនមកពីខេត្ត និងបានជ្រើសរើសយករថយន្តជជុះ ដែលមានតម្លៃចាប់ពី១២ ០០០ ទៅ១៣ ០០០ដុល្លារ សម្រាប់រថយន្តផលិតមុនឆ្នាំ២០០៣។ ប្រជាជនដែលមានកំរិតធូរធាររស់នៅទីក្រុងភ្នំពេញ មាននិន្នាការទិញរថយន្តភីកអាប់ថ្មីស្រឡាង ដែលពេញនិយម ស្រស់ស្អាត និងមានកម្លាំងខ្លាំង»។
រថយន្តដែលមានប្រយោជន៍ ពន្ធទាប
លោកប៉ែន ស៊ីម៉ុន នាយកទីចាត់ការគយនិងរដ្ឋាករ បានមានប្រសាសន៍ថា ទីផ្សាររថយន្តចាប់ផ្តើមមានសន្ទុះនៅឆ្នាំ២០០៥។ យោងតាមតួលេខដែលលោកបានប្រកាសនៅចុងឆ្នាំ២០០៧ ជារៀងរាល់ឆ្នាំ ចំនួនរថយន្តនាំចូលក្នុងប្រទេសកម្ពុជាប្រែប្រួលចន្លោះពី២០ ០០០ ទៅ២៥ ០០០ គ្រឿង ហើយតួលេខនេះបានកើនឡើងដល់៣០ ០០០គ្រឿង ដែលក្នុងនោះ ២០% គឺជាប្រភេទរថយន្តថ្មី។
អ្នកទទួលខុសត្រូវជាន់ខ្ពស់រូបនេះបានកោតសរសើរពីគុណប្រយោជន៍របស់រថយន្តថ្មីៗ ជាពិសេស រថយន្តភីកអាប់។ លោកបានពន្យល់ថា«រថយន្តថ្មី និងជជុះ មានពន្ធនាំចូលដូចគ្នា។ កាលពី៥ឆ្នាំមុន អត្រាពន្ធរបស់រថយន្តថ្មី គឺ១២០% ទល់នឹងអត្រាសព្វថ្ងៃគឺ១១៥%។ ចំណែករថយន្តភីកអាប់ ត្រូវបង់ពន្ធក្នុងអត្រា៣៩% ព្រោះរថយន្តប្រភេទនេះត្រូវចាត់ចូលជាប្រភេទរថយន្តដឹកទំនិញ គឺមិនមែនប្រភេទរថយន្តទេសចរណ៍ទេ»។ រថយន្តភីកអាប់មានតួនាទីដ៏សំខាន់ វាអាចដឹកបានទាំងមនុស្ស ទាំងទំនិញ ខណៈពេលដែលរថយន្តទេសចរណ៍មិនអាចធ្វើដូចបាន។ ភាពទាន់សម័យ និងការចំណាយបង់ពន្ធតិច បានធ្វើអោយរថយន្តភីកអាប់ក្លាយទៅជារថយន្តដ៏ពេញនិយមប្រើប្រាស់នៅក្នុងប្រទេសកម្ពុជា។
|
|
α’ααααααααααα-រថយន្តកែច្នៃផលិតនៅកម្ពុជាសម្រាប់តម្រូវការរបស់អាមេរិកនៅក្នុងប្រទេសអ៊ីរ៉ាក់ និងអាហ្វហ្គានីស្ថាន (១៧-០៦-២០០៨)-កសិករចោលដីដូរម៉ូតូថ្មី (០៤-០៤-២០០៨)
-នៅពេលដែលក្រុងភ្នំពេញពោរពេញដោយ ខ្យល់កខ្វក់ (១៩-០៦-២០០៨)-កុមារគឺជាគោលដៅនៃការធ្វើជំនួញនៅក្នុង ប្រទេសកម្ពុជា (២៦-០៨-២០០៨)
រថយន្តមានកំណើន៣០% នៅប្រទេសកម្ពុជា
ទិន្នន័យរបស់ក្រសួងសាធារណៈការនិងដឹកជញ្ជូនបានបញ្ជាក់អោយឃើញពីកំណើនដ៏ខ្លាំងក្លានៃចំនួនរថយន្តដែលធ្វើចរាចរណ៍នៅក្នុងប្រទេសកម្ពុជា។ យោងតាមរបាយការណ៍ចេញផ្សាយខែមិថុនា ឆ្នាំ២០០៨ ចំនួនរថយន្តដែលចុះបញ្ជីមានការកើនឡើងជារៀងរាល់ឆ្នាំ ចំនួន៣០%។ នៅឆ្នាំ២០០៤ ប្រទេសកម្ពុជាមានរថយន្តសរុបដែលបានចុះបញ្ជីជាផ្លូវការចំនួន ១៥ ៥៩០គ្រឿងហើយកើនដល់២៤ ៤៧០គ្រឿង នៅឆ្នាំ២០០៧ ។ ទោចក្រយានយន្តគ្រប់ប្រភេទដែលចុះបញ្ជីជាផ្លូវការមានចំនួនសរុប ៦៧១ ០០០គ្រឿង ហើយរថយន្តគ្រប់ប្រភេទសរុបមានចំនួន១៩៧ ៨០០ គ្រឿង។ ជាសរុប ប្រទេសកម្ពុជាមានយានយន្តគ្រប់ប្រភេទសរុបចំនួន ៨៦៨ ៨០០ គ្រឿង ដែលចរាចរណ៍នៅទូទាំងប្រទេស។ យោងតាមទិន្នន័យដែលប្រមូលដោយព្រឹត្តិបត្ររបស់សភាពពាណិជ្ជកម្មបារាំង-កម្ពុជា ដែលមានចំណងជើងថា «La Lettre du Cambodge» ដែលបានបោះពុម្ពផ្សាយកាលពីខែធ្នូ ឆ្នាំ២០០៧ ប្រទេសកម្ពុជាមានរថយន្តជជុះគ្របដណ្តប់យ៉ាងច្រើនលើសលុប ជាង៩៥%នៃទីផ្សាររថយន្ត។
Cet e-mail est protΓ©gΓ© contre les robots collecteurs de mails, votre navigateur doit accepter le Javascript pour le voir
|
