ចាប់ពីពេលនេះតទៅ គណបក្សនយោបាយត្រូវចំណាយថវិកា បើសិនជាចង់ផ្សព្វផ្សាយកម្មវិធីរបស់ខ្លួននៅលើរលកធាតុអាកាស របស់វិទ្យុសំបុកឃ្មុំ ដែលជាវិទ្យុដ៏មានប្រជាប្រិយភាពមួយ © វណ្ឌី រតនា អ្នកជួលរថយន្ត ម្ចាស់រោងពុម្ព ស្ថានីយប្រេងឥន្ធនៈ អ្នកផលិតក្រមានិងមួក... អាជីវកម្មមួយចំនួននេះសុទ្ធសឹងតែបានទទួលអត្ថប្រយោជន៍យ៉ាងច្រើន នៅក្នុងអំឡុងពេលធ្វើយុទ្ធនាការឃោសនារកសម្លេងឆ្នោត។ ទន្ទឹមនឹងនេះ ស្ថានីយវិទ្យុក៏អាចរកប្រាក់ចំណូល នាឱកាសនេះផងដែរ។ ប្រព័ន្ធផ្សព្វផ្សាយទាំងនោះបានអនុញ្ញាតិអោយគ្រប់គណបក្សនយោបាយទាំងអស់ទិញម៉ោងផ្សាយរបស់ខ្លួន ដោយមិនរើសអើងគណបក្សណាមួយឡើយ។ មិនមានស្ថានីយទូរទស្សន៍ណាមួយដែលបានលក់រឺជួលម៉ោងផ្សាយដល់គណបក្សនយោបាយឡើយ លើកលែងតែស្ថានីយទូរទស្សន៍ជាតិកម្ពុជា (ទទក) ដែលបានផ្តល់ម៉ោងផ្សាយដល់គ្រប់គណបក្សឈរឈ្មោះបោះឆ្នោតទាំងអស់ តាមរយៈការគណនាបែងចែកពេលវេលាផ្សាយយ៉ាងជាក់លាក់បំផុត នៅក្នុងក្របខ័ណ្ឌនៃការផ្សាយមួយដែលដឹកនាំដោយកម្មវិធីអភិវឌ្ឍន៍សហប្រជាជាតិ (UNDP) ដែលមានឈ្មោះថា «ព័ត៌មានសមធម៌»។ ក្រៅពីនេះ មានតែស្ថានីយវិទ្យុប៉ុណ្ណោះ ដែលបានលក់ម៉ោងផ្សាយអោយគណបក្សនយោបាយ។ ដោយសារតែអតិផរណាបានផ្ទុះឡើងភ្លាមៗ ហើយតម្លៃប្រេងសាំងបានឡើងខ្ពស់ ដែលមិនធ្លាប់មានពីមុនមក នាយកស្ថានីយវិទ្យុនានាបាននិយាយថាពួកគេមិនចង់ផ្តល់កាដូសម្រាប់គណបក្សឈរឈ្មោះបោះឆ្នោតជ្រើសរើសតំណាងរាស្រ្ត នាថ្ងៃទី២៧ កក្កដា ខាងមុខ នេះទៀតទេ។
គណបក្សនយោបាយនានាបានស្នើសុំអោយស្ថានីយវិទ្យុលក់ម៉ោងផ្សាយពាណិជ្ជកម្ម សម្រាប់ពួកគេផ្សព្វផ្សាយពីគោលនយោបាយបក្ស ប៉ុន្តែ មិនទទួលបានជោគជ័យ។ វិទ្យុភាគច្រើនបានបដិសេធសំណើនេះ។ មានតែស្ថានីយវិទ្យុចំនួនបួនប៉ុណ្ណោះតែបានយល់ព្រមលក់ម៉ោងផ្សាយអោយគណបក្សនយោបាយ។ វិទ្យុទាំងបួន សុទ្ធតែជាវិទ្យុឯកជន ដែលរួមមានវិទ្យុមហានគរ (FM៩៣.៥) វិទ្យុសំបុកឃ្មុំ (FM១០៥) វិទ្យុសុវណ្ណភូមិ (FM១០៦) និងវិទ្យុអង្គររដ្ឋា ដែលធ្វើការផ្សព្វផ្សាយនៅតែខេត្តសៀមរាបមួយប៉ុណ្ណោះ។
វិទ្យុមហានគរផ្តល់អាទិភាពដល់គណបក្ស
វិទ្យុមហានគរបានត្រៀមម៉ោងជួលចំនួន១១ម៉ោង ជារៀងរាល់ថ្ងៃ ទុកសម្រាប់បម្រើតាមតម្រូវការរបស់គណបក្សទាំង១១ ដែលបានចូលរួមប្រកួតប្រជែងនៅក្នុងការបោះឆ្នោតជ្រើសរើសតំណាងរាស្ត្រនេះ។ នាយកវិទ្យុបាន ពិនិត្យឡើងវិញពីការបង្កើនតារាងតម្លៃនៃការជួលម៉ោងផ្សាយ ដោយបានលក់ម៉ោងផ្សាយរបស់ខ្លួន ក្នុងតម្លៃ១០ដុល្លារ ក្នុងមួយនាទី ខណៈពេលដែលស្ពតផ្សាយពាណិជ្ជកម្មសុទ្ធសាធមានតម្លៃត្រឹមតែ២ដុល្លារប៉ុណ្ណោះ។ លោកកង ចិត្រា នាយកវិទ្យុមហានគរ បានបញ្ជាក់អោយដឹងថា « យុទ្ធនាការឃោសនាបោះឆ្នោតប្រព្រឹត្តទៅរៀងរាល់៥ឆ្នាំម្តង។ ដូចនេះ វាគឺរឿងធម្មតាទេ ដែលយើងត្រូវលក់ម៉ោងផ្សាយអោយគណបក្ស។ មិនត្រឹមតែប៉ុណ្ណោះ យើងក៏បានបដិសេធការផ្សាយពាណិជ្ជកម្មផ្សេងៗ ដើម្បីទុកម៉ោងផ្សាយអោយបានច្រើន ទៅតាមតម្រូវការនៃការឃោសនារកសម្លេងឆ្នោតរបស់គណបក្សនយោបាយ។ នៅក្នុងលក្ខខណ្ឌនេះ យើងមិនអាចលក់ម៉ោងផ្សាយក្នុងតម្លៃថោកបាននោះទេ ពីព្រោះថាគណបក្សមិនមែនជាអ្នកផ្សាយ ក្នុងរយៈពេលវែងរបស់វិទ្យុដូចក្រុមហ៊ុននោះទេ»។
សព្វថ្ងៃនេះ មានតែគណបក្សនរោត្តម រណឫទ្ធិ និងគណបក្សសម រង្ស៊ីប៉ុណ្ណោះ ដែលបានចុះកិច្ចសន្យាជាមួយនឹងវិទ្យុនេះ ដោយគណបក្សទាំងពីរបានទិញការផ្សាយចំនួន២ម៉ោង ជារៀងរាល់ថ្ងៃ។ នាយកវិទ្យុមហានគរបានសំដែងការសោកស្តាយថា «គណបក្សផ្សេងៗទៀតបានមកទំនាក់ទំនងជាមួយនឹងពួកយើង និងបានចរចារពីតម្លៃនៃការជួលម៉ោង។ ប៉ុន្តែ ក្រោយមក ពួកគេមិនដែលបានមកទំនាក់ទំនងពួកយើងទៀតឡើយ។
វិទ្យុសំបុកឃ្មុំ ទទួលបានជោគជ័យ
កាលពីមុន វិទ្យុសំបុកឃ្មុំ ដែលជាស្ថានីយវិទ្យុដ៏មានប្រជាប្រិយភាពធ្លាប់បានផ្តល់ម៉ោងផ្សាយមួយចំនួនដល់គណបក្សនយោបាយនីមួយៗ ដោយឥតគិតថ្លៃ ហើយ គណបក្សមានសេរីភាពក្នុងការផ្សព្វផ្សាយកម្មវិធីរបស់ខ្លួន។ ប៉ុន្តែ សម្រាប់ការបោះឆ្នោតលើកនេះ សប្បុរសធម៌របៀបនេះលែងមានទៀតហើយ គណបក្សត្រូវចំណាយថវិការបស់ខ្លួន។ សេវាកម្មជួលម៉ោងផ្សាយប្រចាំខែ (ចាប់ពីថ្ងៃទី២៦ មិថុនា ដល់ថ្ងៃទី២៥ កក្កដា) មានតម្លៃ២០០០ដុល្លារ ក្នុងរយៈពេល៣០នាទី ក្នុងមួយថ្ងៃៗ។ មានគណបក្សចំនួនប្រាំដែលបានជួលម៉ោងផ្សាយនេះ រួមមានគណបក្សសម រង្ស៊ី គណបក្សសិទ្ធិមនុស្ស (ដែលបានជួលម៉ោងផ្សាយរយៈពេលមួយម៉ោងក្នុងមួយថ្ងៃ) គណបក្សហ៊្វុនស៊ិនប៉ិច គណបក្សនរោត្តម រណឫទ្ធិ និងគណបក្សហង្ស ដារ៉ា ចលនាប្រជាធិបតេយ្យ។
លោក ម៉ម សូណង់ដូ ស្ថាបនិកនិងនាយកវិទ្យុសំបុកឃ្មុំ បានពន្យល់ពីមូលហេតុនៃការតំឡើងថ្លៃនេះថា «នេះគឺជាលើកទីមួយ ដែលយើងរកស៊ីជាមួយនឹងអ្នកធ្វើយុទ្ធនាការឃោសនាបោះឆ្នោត ប៉ុន្តែយើងគ្មានជម្រើសនោះទេ។ វាគឺជារឿងមួយដ៏គួរអោយសោកស្តាយ សម្រាប់គណបក្សតូចតាច ដែលគ្មានធនធាន ប៉ុន្តែ យើងមិនអាចបន្តធ្វើសកម្មភាពមនុស្សធម៌ទៀតបានទេ។ យើងត្រូវធ្វើអោយវិទ្យុរបស់យើងមានដំណើរការ»។ លោកបានគូសបញ្ជាក់ថា ប្រាក់ចំណូលដែលទទួលបាននេះនឹងធ្វើអោយអ្នកយកព័ត៌មានវិទ្យុរបស់លោក អាចធ្វើការផ្សព្វផ្សាយការឃោសនាបោះឆ្នោតយ៉ាងរលូន។ លោកម៉ម សូណង់ដូបានបញ្ជាក់ថា «ប្រេងឡើងថ្លៃកប់ពពក ឧបករណ៍វិទ្យុតែងតែត្រូវជួសជុលជាប្រចាំ ហើយបុគ្គលិកត្រូវទទួលបានប្រាក់បៀវត្សសមរម្យជាងមុន ព្រោះពួកគេមានការងារលំបាក នៅក្នុងអំឡុងពេលធ្វើការផ្សព្វផ្សាយយុទ្ធនាការឃោសនាបោះឆ្នោតនេះ»។ លោកបានអះអាងថាគណបក្សនយោបាយណាដែលចង់តាំងជំហរអោយបានត្រឹមត្រូវនៅក្នុងការបោះឆ្នោតនេះ គឺគ្មានជម្រើសអ្វី ក្រៅពីជួលម៉ោងផ្សាយរបស់ស្ថានីយវិទ្យុលោកនោះទេ ព្រោះថាវិទ្យុសំបុកឃ្មុំផ្សាយចេញយ៉ាងទូលំទូលាយក្នុង១៥ខេត្ត-ក្រុង ហើយមានឯករាជ្យ មិនរើសអើងគណបក្សណាមួយឡើយ។
វិទ្យុគឺជាមធ្យោបាយឃោសនារកសម្លេងឆ្នោតដ៏ល្អប្រសើរមួយ
ចាប់តាំងពីមួយឆ្នាំមកហើយ ថវិកាជាទឹកប្រាក់ចំនួន៧០ ០០០ដុល្លារ ត្រូវបាន គណបក្សសម រង្ស៊ី ចំណាយក្នុងការផ្សព្វផ្សាយកម្មវិធីគណបក្ស នៅតាមរលកធាតុអាកាស ក្នុងអំឡុងពេលយុទ្ធនាការឃោសនាបោះឆ្នោត ដែលស្មើនឹង៣០%នៃថវិកាប្រចាំឆ្នាំរបស់គណបក្ស។ សរុបមក គណបក្សប្រឆាំងនេះមាន ៦ម៉ោងជារៀងរាល់ថ្ងៃ តាមរយៈវិទ្យុឯកជនចំនួនបួន ដែលបែងចែកការផ្សាយចាប់ពីពេលព្រឹក រហូតដល់ពេលល្ងាច ដើម្បីធ្វើអោយគេស្គាល់គណបក្សរបស់ខ្លួន។ លោកយឹម សុវណ្ណ តំណាងរាស្រ្តគណបក្សសម រង្ស៊ី បានអះអាងថា «១០នាទី ដែលគណៈកម្មាធិការជាតិរៀបចំការបោះឆ្នោត (គ.ជ.ប) ផ្តល់អោយយើង នៅក្នុងក្របខ័ណ្ឌការផ្សាយ «ព័ត៌មានសមធម៌» មិនគ្រប់គ្រាន់ទៅតាមតម្រូវរបស់យើងនៅឡើយទេ។ ប្រជាពលរដ្ឋទូទៅទទួលព័ត៌មានដែលចេញពីគណបក្សកាន់អំណាច ហើយមិនបានដឹងលឺពីការពិតជាច្រើន។ ស្ថានីយវិទ្យុគឺជាកូនសោដ៏សំខាន់ក្នុងការធ្វើយុទ្ធនាការឃោសនាបោះឆ្នោត។ រយៈពេលមួយឆ្នាំ ដែលយើងបានផ្សព្វផ្សាយគំនិតរបស់យើងនៅវិទ្យុសំបុកឃ្មុំកន្លងមកនេះ យើងសង្កេតឃើញថាប្រជាជនបានចាប់អារម្មណ៍លើគណបក្សយើងជាច្រើន»។ លោកក៏បានប្រកាសអោយដឹងផងដែរថាគណបក្សរបស់លោកចំណាយទឹកប្រាក់កាន់តែច្រើនឡើងៗ ដើម្បីផ្សព្វផ្សាយតាមប្រព័ន្ធឃោសនានានា។
លោក ណាន ស៊ី អ្នកនាំពាក្យរបស់គណបក្សហ៊្វុនស៊ិនប៉ិច បានធ្វើអធិប្បាយទាក់ទងនឹងឥទ្ធិពលរបស់វិទ្យុមកលើអ្នកបោះឆ្នោត។ លោកបានពន្យល់ថា «នៅពេលយើងដឹកនាំធ្វើយុទ្ធនាការតាមផ្លូវ មានមនុស្សតែមួយចំនួនប៉ុណ្ណោះដែលបានស្តាប់ដឹងលឺពីគោលនយោបាយរបស់យើង បើប្រៀបធៀបទៅនឹងចំនួនអ្នកស្តាប់រាប់ពាន់នាក់ មកពីគ្រប់ច្រកល្ហកទូទាំងព្រះរាជាណាចក្រកម្ពុជា ដែលបានទទួលព័ត៌មានរបស់យើងតាមរយៈវិទ្យុ »។ លោកបានមានប្រសាសន៍ ជាមួយនឹងទឹកមុខសប្បាយរីករាយថា វិទ្យុឯកជនជាច្រើនបានឆ្លើយតបទៅតាមសំណូមពររបស់គណបក្ស បើប្រៀបទៅនឹងការបោះឆ្នោតជាតិលើកមុន។
នៅគណបក្សសិទ្ធិមនុស្ស(គ.ស.ម) វិញ គេបានឃើញការបង្កើនថវិកាបម្រុងទុកសម្រាប់ជួលម៉ោងផ្សាយតាមរលកធាតុអាកាស ដោយសារ គេបានទទួលស្គាល់ពីប្រសិទ្ធភាពរបស់វិទ្យុនៅប្រទេសកម្ពុជា។ លោក គ្រី សុង អគ្គលេខាធិការរងគណបក្សសិទ្ធិមនុស្សបានពន្យល់ថា «ជាភ័ព្វសំណាងដែលស្ថានីយវិទ្យុមួយចំនួនបានយល់ព្រមជួលម៉ោងផ្សាយរបស់ពួកគេអោយពួកយើង។ ទោះបីជាយើងត្រូវចំណាយថវិកាលើសកំណត់ក៏ដោយ ក៏យើងត្រូវជួលម៉ោងផ្សាយនៅវិទ្យុសំបុកឃ្មុំ ដោយហេតុថាប្រជាជនខ្មែរធ្លាប់បានទទួលព័ត៌មានពីគោលជំហរនយោបាយរបស់យើងតាមរយៈវិទ្យុនេះ»។ ទោះជាយ៉ាងណា លោកគៀត សុគន្ធ អនុប្រធានគណៈកម្មាធិការនាយកគណបក្សសិទ្ធិមនុស្ស បានចូលរួមក្នុងក្បួនដង្ហែរឃោសនាបោះឆ្នោត និងបានចុះទៅជួបប្រជាជនផ្ទាល់ ដើម្បីរកសម្លេងឆ្នោត។ លោកបានសន្និដ្ឋានថា «ប្រព័ន្ធផ្សព្វផ្សាយបានទាមទារតម្លៃជួលថ្លៃពេក ហើយម្យ៉ាងវិញទៀត ប្រព័ន្ធឃោសនាទាំងនេះមិនអាចជំនួសការចុះទៅជួបដោយផ្ទាល់ជាមួយអ្នកភូមិបានទេ ដោយហេតុថាប្រជាជននៅតាមជនបទដាច់ស្រយាលខ្លះមិនមានទូរទស្សន៍មើល និងវិទ្យុស្តាប់ទេ»។
| 
