|
ទទួលព័ត៌មានតាមអ៊ីមែល
សូមលោកអ្នកទទួលអត្ថបទថ្មីៗ តាមរយៈទូរសាអេឡិចត្រូនិច
|
| គ្រឿងញៀនៈ មេតំហ្វេតាមីនគ្រីស្តាល់ត្រូវបានរក ឃើញនៅប្រទេសកម្ពុជា? |
| ααα ស្ទេហ្វានី ហ្សេ | | | 14-08-2008 | 
ភ្នំពេញ ថ្ងៃទី១៧ មីនា ២០០៤ ក្មេងហិតកាវ © ចន វីង / Magnum យោងតាមរបាយការណ៍ប្រចាំឆ្នាំរបស់អាជ្ញាធរជាតិប្រយុទ្ធប្រឆាំងគ្រឿងញៀនកម្ពុជា ចេញផ្សាយនៅថ្ងៃអង្គារ ទី១២ សីហា តាមរយៈការជួយគាំទ្របច្ចេកទេសពីការិយាល័យប្រឆាំងគ្រឿងញៀន និងឧក្រិដ្ឋកម្មនៃអង្គការសហប្រជាជាតិ ប្រទេសកម្ពុជានៅរក្សាលក្ខនិ្តកៈរបស់ខ្លួនជាប្រទេសមួយដែលមានគ្រឿងញៀនខុសច្បាប់ឆ្លងកាត់ ថែមទាំងអាចរហូតដល់ក្លាយជាកន្លែងដោះដូររកស៊ីគ្រឿងញៀននៅក្នុងតំបន់ ប៉ុន្តែ នៅតែជាទីផ្សារគ្រឿងញៀន ដ៏ «ក្មេងខ្ចី»មួយ នៅអនុតំបន់ទន្លេមេគង្គ។ ទោះជាយ៉ាងណា របាយការណ៍នេះបានសង្កត់ធ្ងន់ថា ស្ថានភាពគ្រឿងញៀននៅប្រទេសកម្ពុជា ក្នុងឆ្នាំ២០០៧ ឈានដល់កំរិតនៃការរិះគន់មួយ។ មេតំហ្វេតាមីនគឺជាសារធាតុញៀនខុសច្បាប់ដែលត្រូវបានប្រើប្រាស់យ៉ាងទូលំទូលាយនៅក្នុងប្រទេសកម្ពុជា ប៉ុន្តែ ឥទ្ធិពលរបស់វាមានកំរិតខ្លាំងជាង និងមានសារធាតុផ្សំបន្ថែមច្រើនជាង ជាមួយនឹងជាតិគ្រីស្តាល់ («ទឹកកក») ដែលជាកំរិតមួយមានអំណាចខ្លាំងជាងគ្រាប់ថ្នាំមេតំហ្វេតាមីន«យ៉ាម៉ា»។
របាយការណ៍របស់អាជ្ញាធរជាតិប្រយុទ្ធប្រឆាំងគ្រឿងញៀនបានសង្កត់ធ្ងន់ថា មេតំហ្វេតាមីនគ្រីស្តាល់ (អាចហៅបានថា «គ្រីស្តាល់» «ទឹកកក» «ដុំទឹកកក») បានបង្ហាញរូបរាងរបស់ខ្លួន នៅក្នុងស្ថិតិផ្លូវការប្រចាំឆ្នាំ២០០៥ នៃប្រទេសកម្ពុជា ហើយពាណិជ្ជកម្មជួញដូរគ្រឿងញៀនប្រភេទនេះមានលក្ខណៈជាអន្តរជាតិ។ ជនបរទេសជាច្រើននាក់ត្រូវបានចាប់ខ្លួន បន្ទាប់ពីពួកគេព្យាយាមនាំគ្រឿងញៀនចេញពីប្រទេសកម្ពុជា ទន្ទឹមនឹងនេះបរិមាណគ្រឿងញៀនបន្តិចបន្តួចបាននាំចូលក្នុងប្រទេស។ ការចុះបង្រ្កាបទ្រង់ទ្រាយធំចំនួនពីរលើកត្រូវបានធ្វើឡើងនៅព្រលានយន្តហោះអន្តរជាតិភ្នំពេញ និងពីរលើកផ្សេងទៀតកើតមាននៅឃុំប៉ោយប៉ែត ដែលជាច្រកព្រំដែនដ៏សំខាន់ ឆ្ពោះទៅកាន់ប្រទេសថៃ។
នៅឆ្នាំ២០០៧ ជាដំបូង ប្រទេសកម្ពុជាបានបង្ហាញខ្លួនដូចជាប្រទេសផលិតមេតំហ្វេតាមីនដ៏មានសក្តានុពលមួយ។ ប៉ុន្តែ ចាប់តាំងពីប៉ុន្មានឆ្នាំកន្លងមក ជាពិសេសបន្ទាប់ពីយុទ្ធនាការចុះបង្រ្កាបយ៉ាងហឹង្សាមួយ នៅឆ្នាំ២០០៣ ពីសំណាក់អាជ្ញាធរថៃលើទឹកដីរបស់ខ្លួន ប្រឆាំងនឹងឈ្នួញរកស៊ីរត់ពន្ធគ្រឿងញៀនធំៗ ប្រទេសកម្ពុជាចាប់ផ្តើមត្រូវបានគេចាត់ទុកដូចជាមូលដ្ឋានពីក្រោយខ្នងនៃការផលិត។ ប៉ុន្តែ នៅខែឧសភា ឆ្នាំ២០០៦ លោកស ខេង រដ្ឋមន្ត្រីក្រសួងមហាផ្ទៃ បានប្រកាស ជាមួយនឹងអាជ្ញាធរថា «ប្រទេសកម្ពុជាមិនមែនជាប្រទេសផលិតគ្រឿងញៀននោះទេ»។ បន្ទាប់ពីកន្លែងពិសោធន៍និងផលិតគ្រឿងញៀនខុសច្បាប់ធំៗនៅតាមព្រំប្រទល់ជាប់ប្រទេសថៃត្រូវបានបិទទ្វារ កាលពីបីឆ្នាំមុន អាជ្ញាធរកម្ពុជាបាននិយាយថាកន្លែងផលិតទាំងនោះលែងមានទៀតហើយ ប៉ុន្តែនៅមានត្រឹមតែបន្ទប់ពិសោធន៍តូចៗ សម្រាប់កិនគ្រាប់ថ្នាំ ដើម្បីយកទៅលក់នៅលើទីផ្សារក្នុងស្រុក និងមិនមែនផលិតគ្រឿងញៀននោះទេ។
ការចុះបង្រ្កាបទ្រង់ទ្រាយធំនៅឆ្នាំ២០០៧ បានផ្លាស់ប្តូរស្ថានការណ៍
នៅខែមេសា ឆ្នាំ២០០៧ អាជ្ញាធរកម្ពុជាបានចុះបង្រ្កាបគ្រឿងញៀននៅកសិដ្ឋានមួយកន្លែងស្ថិតក្នុងខេត្តកំពង់ស្ពឺ (ចម្ងាយប្រមាណ៨០គីឡូម៉ែត្រ ភាគនិរតី នៃទីក្រុងភ្នំពេញ) ហើយបានរឹបអូសបន្ទប់ពិសោធន៍ឯកទេសដ៏ធំមួយសម្រាប់ផលិតសារធាតុមេតំហ្វេតាមីននៃតំណាក់កាលទីមួយ ក្នុងចំណោមទាំងពីរតំណាក់កាល។ នេះគឺជាការរកឃើញលើកទីមួយនៅក្នុងប្រទេស ដែលបានបង្ហាញអោយឃើញពីលទ្ធភាពនៃការផលិតក្នុងស្រុកមួយ។
តាមរយៈជំនួយរបស់ «Drug enforcement administration» នៃសហរដ្ឋអាមេរិក និង ការិយាល័យប្រឆាំងគ្រឿងញៀននិងឧក្រិដ្ឋកម្មនៃអង្គការសហប្រជាជាតិ អាជ្ញាធរជាតិប្រយុទ្ធប្រឆាំងគ្រឿងញៀនកម្ពុជា (អ.ជ.ប.គ.ញ) អាចកំណត់អត្តសញ្ញាណលើតំបន់នៃការផលិតសារធាតុមេតំហ្វេតាមីនគ្រីស្តាល់។ សារធាតុគីមីក្លរ៉ូអេហ្វេឌ្រីនច្រើនជាង១តោនអាចនឹងត្រូវបានផលិតនៅទីនេះ មុននឹងមានការដុតបំផ្លាញមូលដ្ឋានផលិត។
ក្រៅពីនេះ ជនជាតិចិនមួយនាក់(មួយឆ្នាំមុនការរកឃើញកន្លែងផលិតនៅខេត្តកំពង់ស្ពឺ) និងជនជាតិថៃពីរនាក់ត្រូវបានចាប់ដាក់ពន្ធនាគារពីបទរត់ពន្ធសារធាតុគីមី palladium (លោហធាតុពណ៌ស) ចូលក្នុងប្រទេសកម្ពុជា ដើម្បីផលិតសារធាតុញៀនគ្រីស្តាល់។
ការផ្តល់មួយនៅប្រទេសកម្ពុជាបានកើនឡើង
យោងតាមអ្នកសរសេររបាយការណ៍បានអោយដឹងថា ការផលិតគ្រឿងញៀនសំយោគក្នុងស្រុក «មានកំរិតខ្ពស់» និង«ត្រូវបានរៀបចំយ៉ាងល្អ»។ របាយការណ៍បានលើកឡើងពី
ទម្រង់មេតំហ្វេតាមីនជាច្រើននៅលើទីផ្សារប្រទេសកម្ពុជា ការកើនឡើងនូវចំនួនម្សៅ សារធាតុគីមី និងម៉ាស៊ីនកិនលាយថ្នាំយ៉ាម៉ា…។
នៅក្នុងរបាយការណ៍ដែលចេញផ្សាយកាលពីឆ្នាំ២០០៧របស់អ.ជ.ប.គ.ញ ទីប្រឹក្សារបស់ ការិយាល័យប្រឆាំងគ្រឿងញៀន និងឧក្រិដ្ឋកម្មនៃអង្គការសហប្រជាជាតិ ដែលបានសហការក្នុងការដកស្រង់ព័ត៌មាន បានទាញចំណាប់អារម្មណ៍ទៅលើលក្ខណៈសំគាល់នៃមេតំហ្វេតាមីនគ្រីស្តាល់ដែលត្រូវបានវិភាគនៅប្រទេសកម្ពុជា។ គ្រឿងញៀនប្រភេទនេះមិនដូចទៅនឹងសារធាតុគ្រីស្តាល់ដែលចេញពីប្រភពប្រពៃណីនៃការផលិតថ្នាំញៀនខុសច្បាប់នោះទេ។ មានន័យថាសារធាតុទាំងនេះកើតចេញពីប្រភពពីរផ្សេងគ្នា អាចចេញពីក្នុងតំបន់ រឺចេញពីប្រទេសកម្ពុជា។
លោក David Harding ទីប្រឹក្សាបច្ចេកទេសសម្រាប់កម្មវិធីគ្រឿងញៀននៃអង្គការក្រៅរដ្ឋាភិបាល មិត្តសំឡាញ់បានលើកឡើងថា «មេតំហ្វេតាមីនគ្រីស្តាល់បានកើតមាននៅលើទីផ្សារគ្រឿងញៀន នៅដើមឆ្នាំ២០០៦។ នៅឆ្នាំនោះ គ្រឿងញៀនខុសច្បាប់ ដូចជាហេរ៉ូអ៊ីន និងយ៉ាម៉ា មិនសូវសំបូរ និងមានតម្លៃកាន់តែខ្ពស់យ៉ាងឆាប់រហ័ស»។ លោកបានទទួលស្គាល់ថា ការមកដល់ភ្លាមៗលើទីផ្សារថ្នាំញៀនជាមួយនឹងបរិមាណដ៏ច្រើន គឺជា «ភាពមិនប្រក្រតី» ដោយសារលក្ខខណ្ឌជាច្រើនបានធ្វើអោយថ្នាំញៀនចាស់ៗផ្សេងទៀតមិនអាចនាំចូលបាន។ លោកអះអាងថាគ្រឿងញៀននេះមិនមែនចេញពីប្រភពធម្មតានោះទេ។
នៅក្នុងរបាយការណ៍របស់ខ្លួន អ.ជ.ប.គ.ញ បានពន្យល់ពីការធ្លាក់ចុះនៃការចាប់និងរឹបអូស ការរត់ពន្ធគ្រឿងញៀន «ដោយសារមានការផ្លាស់ប្តូទម្រង់នៃការជួញដូរក្នុងតំបន់ ដោយសារសកម្មភាពប្រឆាំងគ្រឿងញៀនដឹកនាំនៅប្រទេសថៃ បន្ទាប់ពីមានការផ្លាស់ប្តូររដ្ឋាភិបាលនៅខែកញ្ញា ឆ្នាំ២០០៦។ កត្តាទាំងនេះបានជម្រុញអោយមានការធ្លាក់ចុះនៃការរត់ពន្ធគ្រឿងញៀនឆ្លងកាត់តាមប្រទេសកម្ពុជា ទៅកាន់ប្រទេសថៃ តាមរយៈ «ផ្លូវទឹកទន្លេមេគង្គ»។
សារធាតុញៀនគ្រីស្តាល់កាន់តែទទួលបាននូវការពេញនិយម
អ.ជ.ប.គ.ញ បានធ្វើការសង្កេតថា ប្រសិនបើការរឹបអូសមេតំហ្វេតាមីនគ្រីស្តាល់បានធ្លាក់ចុះជិតប្រហែលពីរភាគបី ប្រៀបធៀបទៅនឹងឆ្នាំ២០០៦ ការជក់គ្រឿងញៀនប្រភេទនេះមានសន្ទុះយ៉ាងខ្លាំងក្លាដែលមិនធ្លាប់មានពីមុនមកនៅឆ្នាំ២០០៧ «ដូចជាអត្រាជក់គ្រឿងញៀនគ្រីស្តាល់របស់កុមារនៅតាមដងផ្លូវនាទីក្រុងភ្នំពេញ មានកំរិត៤២,៦% និងអត្រា៣៤%នៃអ្នកជក់គ្រឿងញៀនគ្រីស្តាល់នៅតាមមណ្ឌលដែលគ្រប់គ្រងដោយរដ្ឋាភិបាល»។
នៅក្នុងចំណោមគ្រឿងញៀនខុសច្បាប់ដែលពេញនិយមប្រើប្រាស់បំផុតនៅប្រទេសកម្ពុជា នៅឆ្នាំ២០០៧ ថ្នាំញៀនគ្រីស្តាល់ត្រូវបានចាត់ចូលក្នុងលំដាប់ថ្នាក់ទីពីរ បន្ទាប់ពីយ៉ាម៉ា។
របាយការណ៍បានក្រើនរំលឹកថា ដោយសារគ្រឿងញៀនប្រភេទនេះមានឥទ្ធិពលខ្លាំងជាងប្រភេទយ៉ាម៉ា ការប្រើប្រាស់ថ្នាំ នេះពិតជាបង្កផលប៉ះពាល់ដល់សុខភាព។ គ្រឿងញៀនគ្រីស្តាល់ត្រូវបានដាក់បញ្ជូលទៅក្នុងបញ្ជីគ្រឿងញៀនដែលត្រូវបានប្រើប្រាស់នៅក្នុងប្រព័ន្ធតាមដានការប្រើប្រាស់សារធាតុញៀនប៉ះពាល់ដល់ស្មារតី។
សព្វថ្ងៃនេះ មិនមានភស្តុតាងដែលបង្ហាញបានថាការប្រើប្រាស់គ្រឿងញៀន (ផ្សារភ្ជាប់ទៅនឹងការរួមភេទ និងការចាក់សឺរ៉ាំង ដែលមិនបានសម្លាប់មេរោគជាមុន) អាចភ្លាត់ស្នៀតបង្កអោយការឆ្លងរាលដាលជម្ងឺអេដស៍ នៅក្នុងសង្គមខ្មែរទាំងមូលនោះទេ។ ប៉ុន្តែ នេះគឺជាប្រភពនៃការព្រួយបារម្ភមួយសម្រាប់ថ្ងៃអនាគត។ ហេតុការណ៍បែបនេះក៏បានកើតមានឡើងនៅតាមបណ្តាប្រទេសជាច្រើនផងដែរ។
អ្នកជក់ថ្នាំញៀនក្មេងៗ និងប្រមូលផ្តុំនៅតាមបណ្តាខេត្តជាប់ព្រំដែន
តើអ្នកណាប្រើគ្រឿងញៀន? អ.ជ.ប.គ.ញ បានវាយតម្លៃថា បុរសៗគឺជាអ្នកជក់ថ្នាំញៀនច្រើនជាងគេ ខណៈពេលដែលស្រ្តីមានត្រឹមតែ៦,៥%ប៉ុណ្ណោះ។ កសិករនិងកម្មករមានកំរិតខ្ពស់ជាងគេ(៣៧,៨%) បន្ទាប់មកគឺកុមាររស់នៅតាមផ្លូវ(១៦,៨%) សិស្សនិស្សិត(១៥,៤%) និងអ្នកអត់ការងារធ្វើ(១៤%)។ យុវជនដែលមានវ័យក្រោម២៥ឆ្នាំ គឺជាអ្នកពាក់ព័ន្ធច្រើនជាងគេបំផុត (ច្រើនជាង៨០% នៃអ្នកជក់គ្រឿញៀន)។
យោងតាមស្ថិតិជាតិ ចំនួនអ្នកជក់គ្រឿងញៀនដែលបានធ្លាក់ចុះពី៧០៧៥នាក់ នៅឆ្នាំ២០០៥ មកត្រឹម៦៥០០នាក់នៅឆ្នាំ២០០៦ បានកំពុងបន្តធ្លាក់ចុះ ជាមួយនឹងចំនួនអ្នកជក់៥៧៩៧នាក់ នៅឆ្នាំ២០០៧ នៅប្រទេសកម្ពុជា។ អ្នកជំនាញការជាច្រើនបានតវ៉ាទៅនឹងតួលេខខាងលើនេះ ដោយពួកគេមិនសូវមានទំនុកចិត្តទៅនឹងស្ថិតិផ្លូវការរបស់អាជ្ញាធរ។ អ្នកជំនាញការបានគុណបន្ថែមតួលេខនេះ ៦ដងទៀតយ៉ាងតិចបំផុត។
យោងតាមការសិក្សាមួយរបស់ អ.ជ.ប.គ.ញ ចំនួនអ្នកជក់សារធាតុញៀនប្រមូលផ្តុំនៅរាជធានីភ្នំពេញច្រើនជាងគេបំផុត បន្ទាប់មកគឺនៅតាមខេត្តបាត់ដំបង និងបន្ទាយមានជ័យ។ ខេត្តនៅជាប់នឹងប្រទេសថៃនិងប្រទេសឡាវ ក៏ប៉ះពាល់ជាពិសេសផងដែរ។ នៅក្នុងចំណោមប្រជាជនសរុបតាមខេត្ត-ក្រុងនីមួយៗ សមាមាត្រនៃអ្នកជក់គ្រឿងញៀននៅក្រុងប៉ៃលិចមានកំរិតខ្ពស់ជាងគេបំផុត បន្ទាប់មកខេត្តស្ទឹងត្រែង ក្រុងព្រះសីហនុ កោះកុង និងរតនគិរី។ ការប្រើប្រាស់គ្រឿងញៀនសំយោគATS (ប្រភេទគ្រឿងញៀនសំយោគដែលមានសារធាតុយ៉ាម៉ា និងគ្រីស្តាល់) មានវត្តមានយ៉ាងច្រើនលើសលុបនៅតាម២៤ខេត្ត-ក្រុង ក្នុងប្រទេសកម្ពុជា (អ្នកជក់គ្រឿងញៀនជាង៨០% នៅប្រទេសកម្ពុជា គឺជាអ្នកជក់សារធាតុមេតំហ្វេតាមីន) លើកលែងតែនៅខេត្តក្រចេះ ដែល៩០,៥%នៃអ្នកជក់ថ្នាំញៀនខុសច្បាប់ គឺជាអ្នក «អ្នកហិតកាវ»។
ការចុះបង្រ្កាបនិងការរឹបអូសនៅទីក្រុងភ្នំពេញ
អ.ជ.ប.គ.ញ បានបញ្ជាក់ថា មេតំហ្វេតាមីនគ្រីស្តាល់ជិត៥០% និងជាតិហេរ៉ូអ៊ីន២៥% ត្រូវបានរឹបអូសនៅព្រលានយន្តហោះអន្តរជាតិភ្នំពេញ ជាមួយនឹងការចុះបង្ក្រាបសារធាតុមេតំហ្វេតាមីនផ្សេងទៀតនៅឆ្នាំ២០០៧។ ម្យ៉ាងវិញទៀត អាជ្ញាធរកម្ពុជាបានរកឃើញប្រតិបត្តិការកិនគ្រាប់ថ្នាំមេតំហ្វេតាមីនខុសច្បាប់នៅទីក្រុងភ្នំពេញ ហើយបានដកហូតម៉ាស៊ីនកិនគ្រាប់ថ្នាំមួយគ្រឿង ដែលអាចកិនបាន១០ ០០០គ្រាប់ក្នុងរយៈពេលមួយម៉ោង!។
កម្ពុជា គឺជាប្រទេស «ដ៏ទាក់ទាញ»មួយ
អ្នកសរសេររបាយការណ៍បានទទួលស្គាល់ថា « ចន្លោះប្រហោងនៅតាមព្រំដែនកម្ពុជាបាននិងកំពុងបន្តធ្វើអោយប្រទេសដ៏ទាក់ទាញមួយនេះ ក្លាយជាតំបន់ដ៏មានសក្តានុពលក្នុងការផលិតថ្នាំញៀន ជាកន្លែងឆ្លងកាត់ និងជាគោលដៅនៃការរត់ពន្ធនាំចូល ជាក់ស្តែងបរិមាណគ្រឿងញៀនខុសច្បាប់ទ្រង់ទ្រាយធំដែលត្រូវបានរឹបអូស បានចេញនិងចូលក្នុងប្រទេសដោយសេរី»។
|
|
α’αααααααααααការបន្សាបថ្នាំញៀននៅប្រទេសកម្ពុជា
អ្នកជក់គ្រឿងញៀនជាង១៧០០នាក់ត្រូវបានទទួលអោយស្នាក់នៅក្នុងមណ្ឌលបន្សាបគ្រឿងញៀនទាំង១៣កន្លែង ដែលគ្រប់គ្រងដោយរដ្ឋាភិបាលកម្ពុជា។ ចំនួននេះមានការកើន ៥៧,៧% ធៀបទៅនឹងឆ្នាំ២០០៦។ គេសង្កេតឃើញថាទិន្នាការនេះកើតមាននៅគ្រប់បណ្តាខេត្ត-ក្រុង លើកលែងខេត្តបាត់ដំបង។ អ្នកសេពគ្រឿងញៀនជាង៨០% ចូលចិត្តប្រើថ្នាំយ៉ាម៉ា និងមេតំហ្វេតាមីនគ្រីស្តាល់។ អ្នកសេពថ្នាំញៀន ប្រហែល១០% ត្រូវការផ្តាច់ខ្លួនពីការញៀនកាវ និងជិត២% ពីគ្រឿងញៀនហេរ៉ូអ៊ីន។ អ្នកប្រើថ្នាំញៀនជាង២ភាគ៣ មានអាយុចាប់ពី១៦ ទៅ២៥ឆ្នាំ ហើយភាគច្រើនជាសិស្សនិស្សិត រឺអ្នកគ្មានការងារធ្វើ។ មិនមានអង្គការក្រៅរដ្ឋាភិបាលណាមួយ ដែលធ្វើអន្តរាគមន៍ចំពោះអ្នកសេពគ្រឿងញៀន រឺសេវាសុខភាពសាធារណៈ បានបញ្ជូនអ្នកជក់គ្រឿងញៀនមកក្នុងមណ្ឌលទាំងនេះ នៅឆ្នាំ២០០៧ឡើយ។ អង្គការមិត្តសំឡាញ់ បានបង្កើតមជ្ឈមណ្ឌលបន្សាបគ្រឿងញៀនផ្ទាល់ខ្លួនមួយ ឈ្មោះ«មណ្ឌលផ្ទះបៃតង» ស្ថិតនៅជាយក្រុងភ្នំពេញ។
សម្រាប់ព័ត៌មានបន្ថែម សូមអានគេហទំព័រ៖
-វិបសាយ ភូមិសាស្រ្តនៅមជ្ឈមណ្ឌលជាតិស្រាវជ្រាវវិទ្យាសាស្រ្ត របស់ Pierre-Arnaud Chouvy។ វិបសាយព័ត៌មាននេះនិយាយពីបញ្ហាភូមិសាស្រ្ត-នយោបាយនៃគ្រឿងញៀនខុសច្បាប់នៅទ្វីបអាស ៊ី។
-ការយល់ដឹងពីសារធាតុអំហ្វេតាមីន នៅលើវិបសាយវិបសាយកាណាដា Infodrogue
ការផលិតប្រេងម្រះព្រៅក្រោមការត្រួតពិនិត្យ
ការរឹបអូសប្រេងម្រះព្រៅ ដែលត្រូវបានគេ ប្រើប្រាស់ ធ្វើជាសារធាតុគីមីសម្រាប់ផលិត គ្រឿងញៀនតំហ្វេតាមីនមានចំនួនកើន ឡើងគួរអោយកត់សម្គាល់នៅឆ្នាំ២០០៧ ក្នុងប្រទេសកម្ពុជា។ ប្រេងម្រះព្រៅទាំងនោះត្រូវបាននាំចេញយកទៅលក់នៅប្រទេសថៃនិងវៀតណាម។ ប្រេងនេះចំរាញ់ចេញពីគល់ និងឫសដើមឈើម្យ៉ាងដែលដុះនៅខេត្តបាត់ដំបង ពោធិ៍សាត់ និងកោះកុង។ ដើម្បីយកប្រេងនេះ គេត្រូវកាប់ដើមឈើទាំងមូល។ ដើមឈើប្រភេទនេះត្រូវបានចាត់ចូលក្នុងបញ្ជីពូជរុក្ខជាតិកម្រ ដែលត្រូវបានការពារដោយច្បាប់ព្រៃឈើ ឆ្នាំ២០០៤។ នៅខែកក្កដា ២០០៧ ក្រសួងសុខាភិបាលបានផ្សព្វផ្សាយនូវវិធានការណ៍មួយ ហាមឃាត់រាល់ការផលិត ការនាំចូល រឺនាំចេញប្រេងម្រះព្រៅនេះ ដើម្បីជៀសវាងការយកទៅប្រើប្រាស់ក្នុងការផលិតគ្រឿងញៀនតំហ្វេតាមីន។ ប៉ុន្តែ ប្រេងម្រះព្រៅនេះក៏មានតម្លៃលើទីផ្សារស្របច្បាប់ផងដែរ ព្រោះវាអាចផលិតជាទឹកអប់សម្រាប់ផលិតផលគីមី និងសាប៊ូ។ ប្រេងនេះក៏ត្រូវបានស្រាវជ្រាវដើម្បីធ្វើជាឱសថផងដែរ។ ទោះជាយ៉ាងណា របាយការណ៍របស់អាជ្ញាធរជាតិប្រយុទ្ធប្រឆាំងគ្រឿងញៀនកម្ពុជាបានបញ្ជាក់ថា មិនមានភស្តុតាងជាក់លាក់ណាមួយ ដែលអាចអះអាងនូវសម្មតិកម្មថាប្រេងម្រះព្រៅដែលផលិតនៅប្រទេសកម្ពុជាត្រូវបានប្រើប្រាស់នៅក្នុងការផលិតសារធាតុខុសច្បាប់នោះទេ។ នៅខែមិថុនា ឆ្នាំ២០០៨ អាជ្ញាធរកម្ពុជា និងនគរបាលសហព័ន្ធអូស្រា្តលី បានបំផ្លាញប្រេងម្រះព្រៅខុសច្បាប់ដែលមានទឹកប្រាក់សរុបចំនួន៧,៦កោដិ៍ដុល្លារ។
Cet e-mail est protΓ©gΓ© contre les robots collecteurs de mails, votre navigateur doit accepter le Javascript pour le voir
|
